2010-05-31

港姐讓路俾林峯?

自從1991年開始,每年港姐均移師香港紅磡體育館舉行決賽 (除98年去咗未正式啟用既新機場、04年去咗剛落成既將軍澳電視城、及08年因紅館裝修而去咗會展)。但今年卻留響邵氏影城,點解呢?  據明周講係TVB讓路俾契仔林峯開演唱會!

據報道講,其實TVB已經book咗紅館7月尾8月頭既一星期檔期,準備俾搭建港姐舞台及舉行決賽所用。但鑑於今年紅館檔期唔多,而眼見去年其契仔林峯既演唱會,吸引大批內地Fans來港觀看,由於呢舊肥豬肉實在太肥美,故TVB決定「棄姐保峯」,用紅館舞台舉行林峯演唱會,而港姐決賽則另覓地方舉行。不過最令人匪夷所思既係,負責人爆出一個"絕頂"既Idea:「林峯會同港姐有個crossover,8月1日TVB會響紅館為一班落選港姐舉行一場遺材賽,給落選港姐一個安慰獎!」   下....................???

咁即係點呀,好似港生咁有復活戰呀?  選多個出黎插入去三甲當四甲呀???  好心TVB咪再諗埋D屎橋搞衰港姐啦!!   (頂氣-ing)

林峯:我今年又嚟喇,原來響TVB心目中,
我重要過d港姐架,嘿嘿 (設計對白)

串咀Barbie: 我諗我冇機會響紅館出現囉,因為
我攞硬冠軍架嘛 (設計對白)

2010-05-30

乜咁經典 ─ 94港姐同臭四拍外景


時為1994年4月,一眾94候選港姐與當時仍然脾氣好臭既鄭秀文一齊出席酒會,預祝往意大利拍攝外景順利!  但唔見吳奇隆喎!

相裡面既譚小環仍然清秀,李綺虹好細路女,陳芷菁仍然好"大方",活麗明好sharp,張可頤幾上鏡,黃釲瑩同吳素珊影唔到,康華都仲係咁四線!

2010-05-28

2010so-called入圍名單

今屆港姐新聞之多,可謂歷年數一數二。TVB根本都未正式宣布邊個入圍,各大報章已經爭相報道面試佳麗既新聞,個個大起底,真係正式選嗰陣都未必咁多新聞呀。今日又有報章大字標題有新鮮出爐入圍名單,但細看下,原來只係講一兩位佳麗,又話某些佳麗"可能"會入,原來又係一個吹字!!

報道話由張天愛提名既「密實湯唯」李文萱及莊思敏個妹莊思明已經肯定入圍15名,而「菲版謝婷婷」陳鈺芸亦大有機會入圍,但洪天明前女友Lillian則被淘汰。據稱TVB今年想一洗港姐頹氣,要嚴選入圍佳麗,所以一眾失禮人既通通唔要,只揀一D學歷高形象健康既佳麗入圍。當中尤以李文萱Elle個底最標青,佢畢業於全球十大學府之一英國倫敦帝國學院(Imperial College London),修讀商科,係高錕師妹。之後去張天愛開設既北京文化藝術院進修,其鋼琴亦有八級。但記者向張天愛求證是否提名Elle選港姐時,她則支吾以對,不願多談,似乎係「有D野」。

Elle跟張天愛馬詩慧合照,咁睇Elle應該都算高喎!

都預咗莊思明實入架喇,強敵當前,自己執生啦

陳鈺芸無啦啦響中環跟師傅舞劍,騎呢咗D喎!

此外,傳媒繼續起各佳麗既底,今次主角係「漲爆王祖賢」張秀文。文章標題為"選港姐脫貧",內容指就讀城大既Sammi,家住馬鞍山公屋,又做Sales又做補習幫補家計。不過文章似乎對佢好客氣,讚多過彈。文章指佢中學讀沙田蘇浙(咦,咪我師妹?),A-Level考得唔錯,本應可以入港大,但因車費貴又山長水遠,不便於照顧患病媽媽,故選讀城市大學既工商管理系。舊年亦往法國做交流生。今次選港姐,無非想令屋企人生活好D!  嘩好孝順喎,十卜!

Sammi每日搭巴士返學

閒時做兼職模特兒賺錢

於法國睇歌劇時攝,呢張影得靚喎!


2010-05-25

慧妍雅集綠惜Ball驚聞港姐有人妖

日前慧妍雅集舉行旗艦籌款晚會,今年定名為「2010慧妍雅集綠惜慈善晚會」並假灣仔君悅酒店舉行。眾港姐均以性感打扮,惟獨永遠名譽會長朱玲玲則以一身密實高貴打扮亮相。由於早前有網上節目驚爆過去12年既港姐三甲中有一位為變性人,故是晚眾港姐均成為追訪對象。被傳為「大熱」既向海嵐大方回應:「唔會係囉,TVB係大機構,選港姐好嚴謹架,而且評判都係社會知名人士,咁講即係話評判眼光有問題啫,呢個可信性極低。」她續說:「係咪呢排冇新聞呀? 香港係有言論自由,但越講越離譜,要適可而止呢!」

而朱玲玲亦驚嘆此傳聞:「我唔知乜野事喎,但真係好shocked,好難相信喎,我就一定唔信,你地傳媒寫野都要對港姐公平D架。」而會長莫可欣則表認同:「我都有同事係變性人,而且佢地經歷比普通人更多,而且變咗性喺法律上都係女性,如真係參選我都會支持。」做得會長果然講野夠宏觀!!

「大熱1號」向海嵐當選時都有人話佢似人妖,而且主持人不多不少
講明係12年內既港姐,98年當選既佢首當其衝,加上話當事人係
「紅過吓」,表面證供實屬對Anne不利。不過Anne騷一騷佢既
事業線,似要話俾你聽佢係真女人呀!

「大熱2號」周美欣不嬲個樣都drag drag地,加上身高達
5呎9而且聲線低沉,難免令人聯想起來。咦,乜葉翠翠
突然咁有女人味既?

歷代港姐聚首一堂
第四排左起: 文健儀、李潔瑩、邵婉萍、周麗明
第三排: 林詩慧、詹德貞、李惠欣、陸詩韻、戚黛黛
第二排: 何傲兒、趙翠儀、朱凱婷、曹敏莉、張嘉兒、鄧源慧
前排 (歷屆會長): 向海嵐、朱玲玲、莫可欣、港姐褓姆Rosa、
陳法蓉、楊婉儀

1989 vs 2009,你地話邊個贏先?
連黃瑩都有份喎,係咪白撞架?
小姐Invitation Card唔該!!



2010-05-20

爛蒲港姐啫喱妹

而家選港姐真係唔容易,都未真係正式入圍,已經俾人狂揭瘡疤。如果已經選咗入圍TVB焗住俾你繼續都話定D,但而家又咪正式宣布,如果因為咁已被OUT,就真係好唔抵。

前Jelly Girls組合 (其實我未聽過)成員Suyen,日前順利進入港姐複試,隨即被起底。Suyen有「龍友甜心」既美譽,因為佢影相有好多pose擺,又唔介意性感或以不同造型演出,故大受歡迎。之前佢唔認選港姐,最後終於承認:「因之前好亂,唔想講咁多野,所以先至唔認。」其實選港姐正經野,做乜唔認喎。

而Jelly Girls組員亦十分支持Suyen參選,不過寄語佢戒爛蒲同戒粗魯喎,下.....  咁仲支持佢??

Suyen不介意性感演出

Suyen曾擔任張敬軒MV主角

另外,記者亦拍得部份佳麗面試後返歸靚樣,串咀Barbie同走Bra Rainbow不約而同搭地鐵,但兩個姿態截然不同喎。

而家都仲得,第日入咗圍做咗熱門,咪再咁做添喇

走Bra Rainbow本來著住一對高踭鞋,但未返到
屋企已換拖鞋,其實係咪核突咗少少呢?

2010-05-18

2010港姐第二輪面試 ─ 質素提升



(加按特別消息: 何麗全話今年質素太好,決定加碼佳麗名額有15個(包3個海外佳麗),哇今次終於講真!)


嘩..... 等咗成個禮拜,港姐終於進行第二次面試!  篩剩三十幾個,點睇都應該唔衰得去邊卦?  果然,初試大部份熱門佳麗都順到進入複試,而之前唔多起眼或帶黑超既,今次亮相似乎進步唔少,有D驚喜喎,我地一齊睇下啦!!
串咀Barbie
嚇死,我開頭立下眼認唔到佢,仲以為佢唔入覆賽添!
乜個樣變娘咗?

天明舊菜 Lilian
一路狀態穩定,打扮清純,力圖洗底

的骰子淇
點解變咗鄧萃雯既?

莊思敏個妹
講樣,差唔多係包底添啦,擺甫士亦唔見大方喎,
入到真係唔公平

Sweet版鍾麗淇
呢個不嬲係我買重既,今次仲好似好D添喎,
個LOOK有D似楊婉儀拎標準體態獎時咁呀

漲爆王祖賢
面圓圓予人有親切感,觀眾緣幾好

迷你郭可盈
件衫?   唔係,唔係上次果件

濃粧佘詩曼
今次變憂鬱佘詩曼喎

港版蕭亞軒
今次好好多,幾有character!!  應該入啦!

唔除黑超活希兒
呢位佳麗上次同今次都死唔肯除黑超喎,
個打扮仲要一樣

老薑陳爽
呢個幾有型格,可以執下

長髮萬寶寶
有入複試喎,今次順眼好多

2010沈德寶莉

明珠台李璧琦

闊面張雪芹




乜咁經典: 莫可欣有陪六叔架!

時為1993年台慶,當年有傳六叔對新出爐港姐冠軍莫可欣有意見,故此很多時出席公開活動都要求搵藝員曹眾陪伴,而不是照慣例的應屆港姐冠軍。不過呢張相證實六叔唔係完全唔搵Hoyan陪啦!

莫可欣在08年ATV「選美風雲五十年」亦有提及此事,她稱當年不斷出國作親善訪問,故不可能每次出席場合均陪伴六叔,她並說相信六叔這麼大的人物,不會計較由誰陪伴出席等咁小既事。莫可欣真係答得好得體喎!

原來莫可欣眨下眼已經係17年前既港姐!
今年台慶係咪43年呀?


2010-05-15

2010港姐PK戰 - 加時戰!!!

TVB官方網昨日發放首批80位面試佳麗既照片,並將今屆口號訂為 「用心打造  妳的美麗大道」 (註: 之前的為招募口號)!  睇哂咁多位佳麗,發覺原來有D滄海遺珠喎,而且睇TVB提供既Clips,發覺大部份佳麗比硬照更漂亮更自然,相信今年都幾competitive!  響呢度同大家介紹下!

清麗版魏綺珊
呢位佳麗在TVB.com好多人講喎,睇落係幾清秀,
點解冇報紙登架呢?

唔臭寸袁彌明
輪廓幾深,有李嘉欣影子添呀!  唔知
佢幾高呢?  不過略嫌少少老態!!

濃裝佘詩曼
個裝係濃咗D,下次輕D手啦! 有
D角度似龔嘉欣喎!

揮手蔡潔雯
我真係覺得佢好似02年才藝小姐蔡潔雯喎,
希望身型唔似啦!

Exotic姚子羚
好鍾意D Exotic既佳麗

港版A-Mei
笑容好好,擺POSE唔錯

仲有....................................


恐怖無頭谷 之 搵返個頭版

闊面鄺文珣

長髮萬寶寶

學校管弦樂放學

作狀吳幸美

社區中心幹事

港姐版娛樂金魚眼


2010-05-14

2010年港姐首輪PK戰

大家唔駛驚,港乜姐冇死到,仲「生歐歐」響度,只係呢幾日我大病加上尋日同家人郊遊一天,一時間miss咗今次咁重要既2010年首輪面試!  我承諾日後會緊貼2010年港姐風起雲湧既戰情!

好喇,返正題先,等到頸都長既2010年港姐準候選佳麗終於曝光,計埋海外開始招募各選美Fans大大話話等咗兩個月,真陰公!  今年賽制大改革,少不免令一眾人士對今年參賽佳麗多咗一分好奇,起碼睇下會唔會多咗中女或大陸妹參加都好。由於TVB不嬲都鍾意懶神秘,逼令一眾佳麗封咀,甚至連名字歲數都不能透露半句,故興起傳媒幫佳麗起花名的抵死玩意,以識別佳麗身份。而近年各大傳媒更將此舉發揚光大,越起越啜核越搞笑,已變成選港姐唔可以錯過既一個精彩環節,最經典之花名莫過於「耶魯象腿」、「選美麥玲玲」、及「女版許愿」等

但一如所料,今屆普遍質素未算有太大驚喜,但仍可發現幾位「可執之材」,算係咁啦!  不如大家睇下首輪面試各佳麗既「芳容」先啦!

有機群

串咀Barbie
講樣超哂班,個人覺得有d似Kelly同郭可盈混合體喎,
身型骨肉相稱,打扮亦得宜,so far係今屆首選。
但個名叫Barbie就真係要扣20分,呢D咪係未見官先打二十大板囉,
好人好姐叫呢D名。另外因傳媒追訪佢名字時,佢彈一句:
「選到冠軍先講你聽啦下!」惹來傳媒"串咀"惡號,實屬不智,
唔通你選緊時唔叫你呀 (未贏冠軍架喎)!

的骰子淇
今屆頭號省鏡之一,落落大方淡淡定定,希望你再下一城。

港版Leah Dizon
無限青春加笑容可躬,呢D女仔醜極有限啦。
但其實似"口細李珊珊"喎! 不過佢如果有李珊珊咁高,
就真係加唔少分啦! 有報道指此女名叫Tianna,
23歲,響澳洲讀緊大學喎

厚墊 Liz
曾參加「喜劇之王2」既招募面試,但感覺好娘,
有八九十年代個劉玉婷既影子添呀! 下次試下唔好梳 All Back

迷你郭可盈
個樣同氣質係幾似,最慘連鎖骨同手臂都同正版一樣咁瘦,
不過我第一下係覺得似陳煒喎

思敏個妹
莊思敏個妹莊思明,講樣屬普普通通,但叫做係藝人個妹,
傳媒實俾下面,不過好彩佢成個款冇佢家姐咁annoying。

天明舊菜 Lillian
甚有Model風範,擺甫士望鏡頭冇難度,面型略長

大波劉彩玉
給人逼爆感覺,可惜胸大向來唔係港姐賣點,對入圍冇幫助,
但其實個樣可以執下,似外國讀書啲ABC,但首先
要減下一對麒麟臂

藐咀婷婷
個樣實屬冇事,但成個身好似搽左收縮水咁,緊哂!
笑下啦!

選美松松
成個look同笑容十足十松松姐姐,希望佢把聲
唔好同正版一樣咁"騷擾"就好喇

港版嚴正花
報紙個朵"粗腰帶Tony Jaa好唔掂喎,只因此妹戴條粗腰帶,
無語.....。其實似韓國個嚴正花多D,同埋擺pose都幾有型

漲爆王祖賢
似喎呢個,個樣斯斯文文,學莫可欣話齋:
港姐選乖乖女架嘛

Sweet版鍾麗淇
呢個幾得喎其實,但只得一份報紙有登,走漏眼??


雜質群

鬚麗珍
呢個綽號笑到碌地,驟眼睇係冇事,但睇真D汗毛
若隱若現,好似岩岩發完育咁喎

酒凹張耀揚
其實此女個樣唔算出事,錯在雙唇同酒凹勁似
善演反派既大隻佬張耀揚,即時要打交叉啦

粉紅射喱姊
睇個名加埋張相唔係唔笑卦,不過其實佢著tubetop黎
面試都算有誠意,如果港姐仲有20強佢都唔係冇機架

港版蕭亞軒
個樣笑得黎好有性格,唔知點形容

飄零燕蘭子
一身瑞士山區放羊姑娘打扮既陳淑蘭,
你見過未?

扭計秘書寶寶
一身打扮同甫士十足向老闆咋嬌既秘書咁

求叉其Krusty
個樣好似Boy'Z成員Stephen個家姐張詠恩,但一身落街
買碗粥既打扮真係令人接受唔到囉

鬆拋拋凌緣庭
個樣有d似91華姐凌緣庭,但衣不稱身問題
好嚴重。

鬥雞張舒雅
佢係咪響恒生d理財專櫃收工即刻趕過黎架呢?


無機群


如花 2.0
相似度真係達九成,唔知係咪請教過真如花先黎面
試架呢?  不過其實就咁睇髮形同套衫都OK架喎

白撞朱唇
此女堅稱陪朋友黎面試,但甘願冒險出鏡,義氣可嘉。
但後來陪友人上小巴後被趕落車,我懷疑佢其實都
係參賽者,可惜被小巴上既褓姆發現佢個樣真係好
「白撞」,所以趕佢出車。

膠袋花姑
記者話此女操勁大陸口音,何麗全話今年有十分一
內地佳麗,莫非佢就係當中既精英????

天然Jolin
天然Jolin: 呢位阿生,牙"肉"村響邊度呀? 嘿嘿

女版李思捷
又會似到咁既

Chok爆甫士王
名為王慧雲,為今年騎呢族表表者。
又拉裙又搣唇,真係少D定力都暈!


你憎超群

好人好姐選得怕咩人影,但每年都有佳麗堅持唔肯正面或除鏡俾記者影,其實咁閃縮,評判都好難選你出黎啦。
豪乳拉姑

黑超高海寧

白面姚安娜

恐怖無頭谷

大家睇完以上各佳麗既尊容,係咪覺得今年港姐好刺激呢,我地岩岩先開始咋,仲有排玩架!!

最後何麗全話唔排除質素好既話會將名額加至15個喎,而海外名額就鐵定3個,車又係得個噏字!