港乜姐

港姐40載大搞玩花臣

2012-02-16T15:04:00.000+08:00

係港姐粉絲都知今年係40周年，我成日都諗如果可以請哂歷屆港姐冠軍再亮相於螢光幕，個畫面應該非常震撼，尤其係卸任後好多年都冇出現過既林良蕙、陳文玉、梁韻蕊、李美珊等等。今年呢個"夢想"可能有機會實現喎，事關今年港姐已由余詠珊全權接手，一向gimmick多既佢話會力邀歷屆40位港姐 (係咪全部冠軍就不得而知) 加40位社會具公信力既人士組成龐大評判團一齊選出第40屆香港小姐，就咁聽都覺得有啲興奮。

噱頭當然唔止一個，據聞余小姐有意將今屆港姐素顏上陣，等觀眾可以睇清楚佢地「真面目」喎! 哇睇返呢幾年質素，化行粧都係普普通通咋喎，咁搞法真係TVB唔想死啲港姐唔罷休咁，好整唔整!

高海寧話素顏上鏡夠創意，好期待喎!

(擦鞋都唔好擦到咁核突吖)

陳庭欣素顏唔算走樣喎，因為本身都係plain

朱晨麗就爭啲喇

郭靄明個妹可以選下

2012-02-07T12:44:00.000+08:00

今日有報道提到郭靄明出席一個品牌宣傳活動，並透露或會幫王維基既新免費電視台拍劇，不過就唔會簽長約喎。佢仲話唔會生龍B，好enjoy同劉青雲既二人世界咁話! 都好既，而家又雙非又搶奶粉又咩蝗蟲論，生BB真係要諗過度過呀!

同場Amy既會計師妹妹郭靄欣都有到場喎。話說當年佢家姐選91港姐時，佢都有見過下報，啲傳媒仲大讚佢都應該參加港姐添! 就呢張相所見，都keep得幾好喎，不過而家應該超級超齡咗架喇，試下亞姐囉.... 哈!

佢地平時應該用唔少"神仙水"啦

07夠好戲

2012-02-01T12:01:00.001+08:00

近日07港姐亞軍王君馨在微博上傳了劇集的造型照，事有湊巧當中幾位女角都係同佢同屆出身的，包括近期在「缺宅男女」飾演刁婦一角而有極大迴響既黃智雯，及現改名為趙希洛既14號趙嘉迪Candice。

講開2007年港姐，最經典莫過於我地一行5位選美粉絲拉大隊入紅館現場睇騷，及同行友人在宣布張嘉兒入5名時驚叫一聲被狠狠的收錄於鏡頭下最為人津津樂道。講質素2007年實在係令人難以接受，但講到部份佳麗既演技，就不得不俾個讚! 當中尤以4號黃智雯Mandy最為突出，出道短短4年已經在多部電視劇擔當二線女主角，堪稱係近10年冒起得最快，幕前成績最好既落選港姐，部份著作包括「巴不得爸爸」飾演一名怕醜妹、「搜下留情」同羅仲謙一對，贏得"港版松隆子"美譽既鄭笑雯、「潛行狙擊」裡面既臥底、現正播放既「缺宅男女」裡飾演冇大冇細開口"目及"著脷既港婦、及即將推出既「On Call 36小時」裡面既見習醫生。相信過多幾年，黃智雯應該可以上到一線，有機挑戰師姐佘詩曼既成績添!

而另外我覺得兩位好戲既07港姐，就係1號麥皓兒同旅遊大使2號何傲兒。Joey Mak演技講真好過好多阿姐級花旦，好似入行13年都亳無進步既郭羨妮，奈何個樣爭咁啲，苦無機會上位。而何傲兒演技自然，在多部處境式喜劇均有發揮機會，但近期好似冇乜劇出，要加把勁先可以同黃智雯爭一日長短喇!

咁其他佳麗又點呀? 14號趙嘉迪有拍下啲處境喜劇咁囉，但多屬閒角；5號鄭瑩瑩去收費電視兒童台教細路英數；6號王卉霖去咗講股；10號黃彥欣又係做下啲閒角咁囉。

三甲呢? 冠軍張嘉兒都係行行企企，主力出席所有宣傳港姐活動，及處理慧妍事務。亞軍王君馨主力做飲食及偶有劇集，聲氣仍然難頂! 季軍周美欣就完約後冇簽，返咗Vancouver一排，而家好似話簽咗香港經理人諗住出唱片喎!

2007年5強佳麗：4號黃智雯、9號王君馨、14號趙嘉迪

咦? 仲有其他演員都係選美出身喎!

左一06港姐季軍呂慧儀、左二08華姐冠軍朱璇、

右三04港姐亞軍朱慧敏

華姐閃電落幕

2012-01-17T16:18:00.002+08:00

2012國際中華小姐星期日晚圓滿結束，冠亞季軍分別係來自芝加哥既11號張曦雯，新加坡既9號黃馨慧，吉隆坡既5號林家冰。而「大都會魅力獎」則由林家冰兼得，佢同時得到「亞太區時尚風采大獎」，15號紐約既海莉鈴則奪「歐美區活力動感大獎」，而香港代表26號朱晨麗則在攞硬既情況下奪得「大中華區典雅氣典大獎」，「友誼小姐」則由17號來自多倫多既洪美珊贏得。

(左起)亞軍9號黃馨、冠軍11號張曦雯、季軍5號陳法.. 噢林家冰

友誼小姐17號洪美珊

老實講，起初對今年華姐係完全 (對! 係完全)冇任何期望，因為得1星期真係唔知follow唔follow好。但當晚睇成個比賽過程，又比想像中流暢喎，起碼唔會死dum時間，加上抹走中華色彩，唔係part part 小鳳仙裝或唐朝民女服裝，有返啲時代感。個人最鍾意10強泳裝環節，10位佳麗質素奇佳唔在講，在後台catwalk出黎都好睇，可以好好睇到各佳麗既儀態同catwalk skill，而且TVB轉死性幫啲佳麗放哂啲頭髮落黎，真係個個都養眼咗好多! 老實講，紮個死人髻或all back頭配泳衣真係好鬼趕客架! 好希望TVB繼續keep住咁，抵讚! 不過最唔滿意嗰part係宣布入十強，開頭司儀宣布頭5位好地地，因乜事又要變咗由佳麗宣布呢? 硬係要加啲騎呢野得黎個效果又唔見好咗，汗顏!

好多華姐粉絲都會覺得2004年係歷屆質素最高既1年，但睇完今年覺得今年好似有得fight下喎。28位入圍華姐裡面，係大中華嗰批比較plain(唔明TVB啲選美一掂大陸既質素都麻麻，好似港姐就有李天縱呢啲，華姐就係呢啲質素，反而亞姐搵既就靚既多多都有!)，其他都質素不錯! 基本上10強裡面，求其揀3個入3甲都得，真係好耐冇見過咁competitive既本地選美喇! 而且今年有好幾位能操流利廣東話既"資優"佳麗，相信TVB又會多一批新血喇!

不如講下十強佳麗：

1號林曉賢 (奧克蘭)

幾上鏡，而且能操流利廣東話，TVB應該會搵下佢試鏡

3號畢利雅 (曼谷)

又高又靚又甜美，一貫曼谷佳麗熱情開朗風格，但又貫徹泰姐溝通唔到既弊病，如非英文非常流利，通常都變咗牛頭唔搭馬咀收場

5號林家冰 (吉隆坡)

堅似陳法拉，連講廣東話個tone都似埋，不過仲要係艷啲嗰隻。十強後台時嗰shot影親佢都好搶鏡，某啲角度成個鄺美雲咁添呀，只得第三真係有啲陰公! 佢師姐陳泳錦"咁"都得冠軍啦!

7號范文雅 (墨爾本)

又一省鏡廣東話大使! 成晚淡淡定定有錢剩嗰隻，不過略嫌低調。10強問題想舉手答極都爭唔到，如果TVB簽你就真係要aggressive啲喇

9號黃馨慧 (新加坡)

雖然新加坡試過有兩次華姐冠軍，但整體黎選華姐既代表都係唔多掂居多，今年竟然有黃馨慧呢啲咁既質素真係叫人喜出望外。成晚我都覺得好似呂晶晶響度選緊咁，答問題時又似江珮瑩喎(不過係斯文版)，故令評判揀佢入三甲都不無道理。宣布後好多人都戥佢拎唔到冠軍不值，不過我就覺得佢拎亞軍已經係超額喇，因為佢實在唔高，10強得佢一個凹咗落去，有咁多得揀都揀個高架啦!

11號張曦雯 (芝加哥)

歷屆華姐芝加哥代表差唔多年年有參加，但只有98年既黎美齡攞過友誼小姐，成績乏善足陳。今屆有現職模特兒既張曦雯代表，果然不同凡響，殺入三甲更奪得冠軍! 身高達5'9"既張曦雯在首次記招時已抽中試戴后冠，而幸運之神亦冇離開過佢。雖然有時稍稍有老態，但大多時候都係狀態十足，舉手頭足都有冠軍風範，亦都係近年較為有"港味"既華姐冠軍!

12號陳藝蓉 (倫敦)

倫敦既過往戰績都係慘敗居多，今年呢位倫敦代表就一反常態，質素奇高。陳小姐外型具古典美，傳統美人胚子格，加上有5'7.5"高，屬越睇越襟睇既類型! 可惜強敵當前，如果唔係有機入三甲!

15號海莉鈴 (紐約)

高眺身型加鬼鬼地既camera face輕易令海莉鈴成為頂頭大熱，響Facebook有好多朋友都係貼佢冠軍，連答問題都能用國語輕鬆回答，真係唔知衰乜連三甲都入唔到，夾硬講係咪因為佢個樣太鬼妹唔fit"中華"呢個theme呢?

25號于淼 (大連)

屬大中華區最省鏡佳麗，各方面都好平均，不過行路成日仆親，係咪唔慣啲高踭鞋呀?

26號朱晨麗 (香港)

從來冇期望佢入到三甲，老實講佢呢晚比港姐時靚咗，不過強敵當前都好難有咩作為。依然係好拘謹，唔夠放，不過已經比選港姐時改善咗。始終感覺佢係有啲娘，缺乏港姐既時代感，如果唔係孭住"香港"既綵帶，分分鐘十名都唔入!

Well，今屆華姐對我黎講算係無期望下有少少驚喜，希望TVB有心繼續搞既就真係搞好佢，唔好半桶水咁要搞又搞得cheap。咦其實華姐都算請幾多表演嘉賓喎，咁係咪港姐其實仲慳皮仲cheap d?

等到頸都長既華姐

2012-01-07T22:04:00.001+08:00

前身為"國際華裔小姐"既"國際中華小姐"，自從07年換湯不換藥地加入大中華地區佳麗以圖打入國內市場，一路越做越怪。首先舉辦日期及地點極不穩定(09年年頭搞，到10年年尾搞，11年索性冇搞)，及後佳麗編號以英文城市名稱排名但又出錯(好像奧克蘭Auckland排先過阿姆斯特丹Amsterdam)。

到今年，華姐更騎呢到盡，先係時間方面，昨日1月6日各佳麗在記招首晤傳媒，9日後1月15日就進行決賽，堪稱TVB歷年搞既最短選美，而且安排在晚上9時才開始，應該是記憶中最"晏"開波既選美show! 而又因為11年冇搞既關係，為咗吸納10年尾選出黎既冠軍，個別城市竟然有兩名代表，好似多倫多、溫哥華、墨爾本等，唔知佢地既彩帶會唔會多倫多A，溫哥華B咁呢? 所以就算有28位佳麗參與，其實參與城市卻下降。28位佳麗亦分為3區，分別為亞太區、歐美區、大中華區，分區後再以佳麗城市英文名稱排名，所以香港代表朱晨麗是大number 26號! 而每個區亦有一大獎，咁咪好似世姐既亞洲皇后咁囉?

好喇，睇返今年一眾華姐，個人覺得整體質素不俗，貫徹近幾年中華小姐傳統，篩走專派怪獸既城市，換來整體質素差極有個譜。雖然今年香港小姐朱晨麗係近年叫做睇得下兼零投訴既代表，但相信今次都要苦戰一番，希望可以為港吐氣揚眉啦!

28位佳麗先禮後兵，黎個大合照先啦

28位佳麗官方照，影到啲色一撻撻，核突!!

亞太區代表

1號林曉賢(奧克蘭)、2號蔡健萍(奧克蘭)、3號畢利雅(曼谷)

4號葉伊秀(吉隆坡)、5號林家冰(吉隆坡)、6號林啟莉(馬尼拉)

7號范文雅(墨爾本)、8號馬穎杰(墨爾本)、9號黃馨慧(新加坡)

10號劉夢倩(悉尼)

佢地會競逐「亞太區活力動感大獎」，個人建議搵亞洲皇后楊寶玲

頒呢個獎!!

歐美區代表

11號張曦雯(芝加哥)、12號陳藝蓉(倫敦)、13號余文杭(蒙特利爾)

14號鍾雅雯(蒙特利爾)、15號海莉鈴(紐約)、16號譚曉榆(多倫多)

17號洪美珊(多倫多)、18號蘇慧文(溫哥華)、19號徐穎堃(溫哥華)

佢地會競逐「歐美區時尚風采大獎」

大中華區代表

20號王安琪(安慶)、21號許敏(安陽)、22號黃月蓉(北京)

23號謝佳妤(北京)、24號李俐璇(大連)、25號于淼(大連)

26號朱晨麗(香港)、27號李婷(天津)、28號郝心言(鄭州)

佢地會競逐「大中華區典雅氣質大獎」

相信朱晨麗可以好融入一班大中華佳麗喇，因為背景相近嘛

19號徐穎堃原來係大俠徐少強同雪梨既囡囡喎，

有姨媽米雪射住，問答時曾志偉唔會挖苦佢啦

5號林家冰與26號朱晨麗均被指似陳法拉，

今次有番惡鬥喇!

藍衫佳麗均身材豐滿有睇頭

11號張曦雯抽中試戴后冠，由應屆冠軍岑麗香加冕，

呢個幾省鏡喎

唔知一個星期華姐會有咩宣傳搞作呢? 聽講時間緊逼都有外景喎，原來係香港特色景點，會唔會學亞姐咁去廂街食煲仔飯或者黃大仙祠上注香呢? awwwwww...........

慧妍行善30年

2012-01-06T15:15:00.000+08:00

由歷屆港姐組成，於82年成立既慧妍雅集，一直秉承港姐傳統，積極參與慈善工作，並且係全球唯一獲政府認可而由選美佳麗組成既慈善機構。今年慧妍踏入30周年，據講將會舉辦一連串活動紀念呢個咁特別既年份，到時肯定會見到好多歷屆港姐亮相。咁岩今年又係港姐40周年，唔知會唔會搞啲cross-over慶祝活動呢?

永遠榮譽主席朱玲玲當然親身出席，被問到仔仔同郭晶晶既婚事，

Loletta當然例牌"優雅地耍太極"啦!

應屆主席趙雅芝與4位港姐冠軍人馬合照，喂呀原來

佢40年前選架，乜整鬼仲咁靚架啫........

(左起)03曹敏莉、07張嘉兒、95楊婉儀、89陳法蓉、

73殿軍趙雅芝)

5000円上的郭藹明

2012-01-05T09:32:00.002+08:00

嘩哈哈哈....... 真係好似

亞洲超級男出爐

2011-12-19T15:45:00.000+08:00

自2005年一屆亞洲先生後，事隔六年ATV再度舉辦亞洲先生選舉。賽前大熱台灣的13號邱士峻差唔多在"冇得輸"情況下成為新一屆的亞洲先生並奪得魅，亞軍則由甚有風度既2號韓國代表尹雅嵐奪得，而香港(其實都唔係土生土長)代表12號林睿就得季軍。被形容為翻版胡兵的9號大連代表徐丁則榮膺"型男大獎"，可惜人如其名連10強都不入，被"叮"出局。而猛男大獎則以極之兒戲的"評審準則"評分，參賽者以鬥做引體上升及掌上壓多少而定奪獎項，最後由大隻潮州佬7號陳景國及12號林睿瓜分! 另一獎項「魅男大獎」則由冠軍邱士峻兼得，正正常常既獎點解會改個咁騎呢既名? 唔知係咪Rexona贊助架呢.....

我都好多年冇正正經經睇哂一個亞視製作既節目，睇完之後不禁要嘆一句，ATV is ATV afterall! 成個製作(硬件)預咗係ATV level都算喇，點解連軟件都係要cheap啲? 成個節目好似求其綵排一兩次就算咁，司儀參賽者頒獎嘉賓可以成日企錯位，你推我講咁。個節目又dum得長，搵18銅人黎表演都搞咗你9個字，啲問答又長又噚。最死係連台下都要unprofessional過人，啲藝員個個悶樣，趙Gum玩電話打喊露乜都齊，評判又黑口黑面，唔想做就咪鬼應承啦 (雖則個show係dum都訓著)。好彩一班亞生質素唔算差，起碼好過香港先生，身型又高又fit，先叫做有返啲睇頭。

2011亞洲先生三甲(左起): 季軍12號林睿，冠軍13號邱士峻，

亞軍2號尹雅嵐，3位得獎者身高均過6呎。

我想問點解亞生個logo咁似港生既?

13號邱士峻雖然身型不算十分健碩，但勝在笑容燦爛

2號尹雅嵐身型在外援黎講只是普通，但有6'2"高，

著長褸非常有型

12號林睿只得19歲，外型不俗但作狀到暈，

爆小冷得第三

有大隻呂良偉之稱的7號陳景國全晚均以普通話作答，

不致出醜於「八両金腔」廣東話，如果唔係連豬肉獎都冇份呀

9號徐丁身型屬上等貨色，可惜樣貌三尖八角，

十強不入

開場既「戰狼300」一幕，擺明抄07年港生

成萬蚊條既泳褲，點解要加條白腰布上去呢? 搞到好似一班有

失禁困擾既男人著住紙尿片咁囉。同埋個backdrop又係抄08年港生

身為評判的薛芷倫到比賽中段已"不能再笑"，

下次打botox輕手啲啦

成晚節目鏡頭係咁影住一班亞姐，驟眼睇到唔錯喎

胡囧囧終於吐氣揚眉

2011-12-06T14:23:00.000+08:00

「萬千星輝頒獎典禮2011」終於圓滿結束，五年前憑肥田臨門撻Q既胡杏兒憑「萬凰之王」沅宛一角終於吐氣揚眉，升呢榮登視后，亦都係第四位港姐出身既萬凰之王。

雖然我就唔算係胡杏兒既die hard fans，但對佢選港姐時既印象非常深刻。99年正值互聯網開始普及，TVB亦設立99年港姐既網頁Forum，俾一眾粉絲留言。當時因為佢響準決賽係最後一位入圍既，所以喊到喊包咁，我就響forum留言支持佢，但估唔到亦有其他網民評擊佢扮哂野。當年既我好在意啲人點睇港姐，搞到我花好多時間同其他網民互駁，而家諗返起都好幼稚。好彩佢都選到季軍，記得當年類似東張西望既節目追訪佢當選後返科大宿舍，佢竟然響個書包度拎個后冠出黎，當時感覺呢個都係走傻大姐路線既港姐。

胡杏兒之後開始有戲拍，拍「流金歲月」時飾演有輕度智障既少女贏得好評，以為佢既戲路唔會局限十三點路線，點知之後啲戲枕住苦情樣，乸埋口面既演技被一眾網民惡搞為"胡囧囧"，肥田一角都幫唔到佢。之後有一排沉咗響谷底，估唔到巴不得爸爸搞笑角色又有啲noise喎，到今年終於榮登視后，而其他劇集角色亦發揮得唔錯，憑「怒火街頭」奪得我最喜愛的女角色一獎，又由視民投票奪得非凡風采女藝員，可謂係冇乜反對聲下奪后。

睇胡杏兒攞獎時我都有啲感慨，原來佢出道咗12年架喇，今次仲同bosco發表愛的宣言，實在係雙喜臨門!

胡杏兒成為第四位港姐勇奪視后，咁岩之前蔡少芬同佘詩曼都係季軍，另一

張可頤亦只係頭五名，唔通港姐名次同視后成績係成反比既??

戀情終於浮上面，梗開心啦

而另一位港姐焦點係奪得「飛躍進步女藝員」既馬賽，擊敗同屆港姐高海寧短短三年獲得此獎，難怪得獎時都非常激動啦!

同是港姐季軍既馬賽奪飛躍進步女藝員

徐子珊個髮型幾型仔，但條裙會唔會累贅咗啲

鍾嘉欣偶有佳作，但年年都係坐冷板櫈，從來未被視為熱門，

究竟衰乜呢?

李詩韻無懼其美容院負面新聞，心情

靚靚出席盛會

點解陳茵媺唔係拖陳豪既?

陳法拉受面癱困擾，希望佢早日康復啦

伍姑娘今次騷一騷令人嘩然，不愧為

亞姐經典之一

高海寧選08港姐時輸咗個馬(賽)鼻，估唔到今次

角逐飛躍進步女藝員又歷史重演

久違了的「最美麗相中人」陳妙瑛做盼獎嘉賓，今次一輪

咀講咁多野都冇騰雞喎，個樣又keep得好，俾個讚你!

久違了的楊美儀

2011-11-29T15:08:00.000+08:00

近日港姐亞軍朱希敏在微博放了一張四位港姐出席電台節目與主持人的一張合照，而該主持人正是佢地既師姐88年參選港姐楊美儀。照片中楊美儀儀態優雅，與一眾在任港姐合照絕對冇比下去，不過四位港姐亦出奇地醒神，個個笑容燦爛，尤其應屆世姐第107名的朱希敏狀態更加止跌回升，省鏡咗喎! 好啦，今次5位都贏!

楊美儀當年挾譚詠麟歌迷會會長之身份出戰港姐，甫出場

已份屬熱門，可惜當年對手太強勁，而且表演略厭生硬，

最終落選....

長腳蟹嫁港生

2011-11-25T10:39:00.000+08:00

現年29歲既06年港姐季軍呂慧儀昨日在微博傳婚訊，雖然張相影得唔清唔楚，不過從輪廓及高度黎睇應該就係08年落選香港先生黃文迪Dickson! 尋晚呂慧儀在娛樂新聞報道裡都冇直接承認新郎係黃文迪，不過下個月13號都擺酒喇喎，仲賣咩關子啫?

恭喜哂一對新人

呂慧儀同黃文迪雙雙憑選美入娛樂圈，

可惜男方發展不算理想

黃文迪08年選港生時大熱倒灶輸俾朱允祟，

連復活戰都輸俾呂熙，係咪因為甫士太chok呢?

前亞姐田琪有個漂亮女兒

2011-11-05T17:32:00.000+08:00

2011珠寶小姐正在進行，原來已經辦到第二屆! 而上屆季軍嘉芙蓮原來就係87亞姐13號田琪個女! 嘉芙蓮是中英混兒，15歲去了英國留學，機緣巧合下返港參加去年珠寶小姐! 嘉芙蓮樣貌標緻，被指似梁詠琪，真係好難相信田琪會有咁靚既女囉!

評判鄧達智為嘉芙蓮作狀加冕，

　堅似Gigi喎

87亞姐田琪當年份屬冷門，塊面超巨，

　很難相信生咗個咁靚既女!

世姐國姐又黎喇

2011-11-01T15:08:00.000+08:00

猶記得幾星期前大家親眼見證TVB美術總監陳惠英為朱希敏及許亦妮設計的「經典」晚裝後，眨下眼又黎到世姐及國姐的「結局篇」。今年呢兩個重頭國際選美都係11月6日選喎，幸好世姐在倫敦選，而國姐在成都選，因有時差關係才不致於重疊，選美迷唔洗趕到氣咳。

今年國姐既coverage特別多，一來係中國傳媒關注度高，二來隔離台FUN少個囡囡冼韻怡代表澳門選喎，梗係多最新滾熱辣update啦! 反觀世姐嗰邊靜英英，相都唔多張，一貫世姐乜都爭啲既風格!

不如睇下兩位港姐代表連日來既花絮先啦!

聽講許亦妮好忟先去到成都，初黎步到梗係黐下啲佳麗影相啦

佢同中華台北小姐同房架喎

四位大中華佳麗：中國小姐白雪玉婷 / 澳門小姐冼韻怡 /

香港小姐許亦妮 / 中華台北小姐力桂英

Whitney正欣賞各外國佳麗以中文寫的"音樂"二字，

覺得很特別吧

稻香旗袍出場喇

Whitney輕輕一坐都散發魅力

Whitney參選以來最索最省鏡的一張相(雖然其他相都好少出事)，

張相影得鬼鬼地充滿神采，說她是歷屆最好的國姐香港代表都不為過

又係一張美艷既相

港姐澳姐正面PK戰，誰勝誰負呢?

世姐Miss Sports單項賽，呢個係乜玩意呢?

Hyman果真係扁口扁面女

岩岩浸完油黎呀?

佳麗們在Big Ben前留倩影，近5'10"的Hyman

一啲都唔輸蝕架

Karen套傑作出場喇，難得Hyman一臉自信，

值得嘉許啦

呢張相令我諗起周嘉玲選國姐既狀態，

三個字：一團糟!!

施熙瑜再續宮雪花神話

2011-10-26T10:08:00.000+08:00

2011年亞姐港澳區入圍名單出爐，面試時風頭一時無兩既，以47之齡參加既8號施熙瑜順利入圍，與其他14位"女仔"齊齊競逐亞姐總決賽入圍資格。事有湊巧，施熙瑜正正抽中企響全場最細既7號康馨月隔離! 年齡相距三十年既兩女來個生死戰，似乎幾有睇頭!

施熙瑜直言參加選美係佢既畢生夢想，年青時因為家人反對無法參加，後其母認識其好友89年港姐冠軍陳法蓉後才對選美改觀，覺得選美既女仔都好好，而Monica跟07年港姐亞軍王君馨更傳授catwalk及選美秘技俾佢，務求令到佢發揮得最好，可以無憾咁一圓呢個選美夢!

而令一焦點係來自巴西既14號胡主莉，她自稱曾與陳法拉一齊選過美國華埠小姐添，點解無啦啦搬去巴西住既?

做得7號康馨月阿媽既8號施熙瑜稱年齡

相隔30年冇尷尬，佢對選美既熱誠果真令人欽佩

14號胡主莉話記憶中陳法拉係個好有性格既女仔，

呢句說話好玄喎

另一大熱6號馮雪冰在北京做製片，其實

佢可以試下選港姐喎

施熙瑜2000年參加過TVB舉辦既健美小姐，

最終3甲不入! 其實點解佢唔試下85年嗰屆健美小姐呢?

肉酸到冇朋友

2011-10-18T10:14:00.000+08:00

我唔係講啲港姐!

港姐俾人話一年差過一年，問心講比起80年代，現今港姐確實少咗啲氣質，但其實又唔係真係好似傳媒或坊眾講得咁差，以前都有大把醜! 但講到港姐d styling喇喎，就真係不得不佩服TVB既堅持，唔醜既都唔出黎獻世! 好似啱啱試戰衣既世姐香港代表朱希敏同國姐香港代表許亦妮，又示範了兩套"驚為天人"既晚裝，難得兩位港姐敬業樂業，仲笑騎騎一副滿意狀咁俾傳媒任影，戲劇科仲唔斟下兩位姐仔客串下?

其實太陽報既記者好好人，影唔哂成件衫。其實件衫一味死駁，好似

粵語殘片黃曼莉家窮唔夠布做衫俾個女咁，求其搵啲碗布駁埋下半截。

啲色水又唔討好，而且又一貫港人致愛乜都加啲上件衫度，慌死蝕底!

其實呢個港人傳統真係死症，唔信你睇下結婚啲新娘，簡簡單單一條婚紗

唔得既，死加閃珠又加朵花咁，唔夠busy唔收貨!

真係好想同許小姐講句：四位食小菜吖唔該! 點啫，成個稻香知客咁，

拎埋個walkie-talkie就真係神似過繆非臨@志明與春嬌呀! 呢件旗袍聽講

係民族服裝黎架，而家都唔興中國風啦，仲整啲咁鬼out既款式，做乜

對鞋唔整埋橙色啫，要醜都醜盡啲吖嘛! 唉，真係希望可以憑Whitney

既標緻樣貌拉返高少少分啦!

其實Karen Chan或其他服裝同事明唔明簡單就是美既道理呢? 就算冇fashion sense，睇下其他國際選美或時裝雜誌都知而家選美既晚裝應該係點架啦，唔需要嘩眾取寵以為香港人就鍾意呢啲!!! 有冇人有Karen Chan既Facebook呀? 真係好希望佢知道自己啲「傑作」有幾咁震撼!!

朱晨麗：你地兩個玩得開心啲喇，著呢兩件衫carry得

好睇啲喇，希望你地唔好俾其他佳麗笑啦!

朱希敏&許亦妮：睇下到華姐時你點死!

梁麗翹：好彩我唔洗出去選啫!

林淑敏勇對病魔

2011-10-07T17:43:00.000+08:00

2000年網上最奪目小姐林淑敏近日在微博提到自己患上癌症。原來她在去年11月證實患上乳癌，之後便常進出醫院醫病。只有35歲的她接受化療導致頭髮脫落，而且亦非常消瘦。說真的我聽了這消息感覺很難過，咁後生就有呢個病其實都好陰公，我有幾個讀多倫多大學的朋友聽到這消息也非常震驚。雖然Mandy並非什麼主角，但她做的角色我都有留意，近期的「真相」裡做那個貪錢的女人非常乞人憎，但做「點解阿Sir係阿Sir」裡面傻更更的Miss又好鬼好笑，可塑性甚高!! 我真心希望她能早日康復，讓大家可以再在螢光幕前見到她!

因化療關係要改skinhead，不過Mandy，你仍然好靚架!

Mandy現在係虔誠既教徒，相信神必定與她同在!

姚婷芝閃電出嫁

2011-10-03T09:52:00.001+08:00

近排港姐喜事一蘿蘿，繼99年冠軍郭羨妮前日出嫁後，08港姐參選佳麗姚婷芝亦會於今個月15號同美籍韓裔男友拉埋天窗。據知婚後姚婷芝將跟丈夫定居美國，她笑言要學整泡菜做個好韓婦喎!

姚婷芝參選港姐態度進取，曾將港姐音樂填上中文詞於競逐旅遊大使獎時獻唱。落選後憑口齒伶俐加入東張西望做主持，之後亦曾主持電台節目，其後到美國讀書增值自己。

佢老公果真係典型美籍韓裔look喎!

郭羨妮出閣了!!

2011-10-02T12:24:00.000+08:00

99年港姐冠軍郭羨妮，經歷一段又一段坎坷情路，終於修成正果，與內地武指朱少杰共諧連理，踏入人生新階段! 希望佢地白頭到地，恩恩愛愛! 恭喜哂!

譚小環解約無線

2011-09-02T16:04:00.000+08:00

94年港姐冠軍譚小環決定結束與TVB 17年賓主關係，主動解約! 由於TVB政策為先安排工作與親生子女，所以非親生女既佢慘遭冷待，但譚小環指明白呢個係商業決定，離開只係想有健康啲既生活同放多啲時間響屋企，而家最唔捨得反而係一班同事。

Halina擁有多項港姐經典紀錄；1. 唯一一位以1號奪冠既港姐 2. 未當選已經成為信和賣相皇后，人氣直逼四大天王及當紅姐仔 3. 首位競選時有粉絲拉Banner撐場的港姐 4. 星途起落幅度最大既港姐，初當選時人氣爆燈，更進軍樂壇，後因掛住拍拖，荒廢事業，早幾年更淪為三四線藝員，成發展最不理想既港姐冠軍!

Halina參選時氣質大方，總決賽更以接近完美之表現摘冠，惟之後派演角色多為倀雞及尖酸刻薄，與參選時確實大相逕庭。

經典泳裝照

歲月催人

04港姐鄧慧琦出嫁

2011-08-30T17:28:00.000+08:00

恭喜04年落選港姐4號鄧慧琦結束愛情長跑，下嫁百仁基金主席施榮忻，婚期訂於9月25日。原來佢地已經係舊年6月在外國註冊，今次只係補辦手續! 港乜姐響度祝佢地百年好合，永結同心啦!

聽講Jaymee同當屆港姐冠軍徐子珊好friend架喎，

唔知會唔會請佢飲呢?

香港代表在Miss Supranational勇奪友誼小姐

2011-08-29T17:42:00.000+08:00

恭喜哂! 由隔離台葉Fun湊既首位Miss Supranational香港代表吳懿凌在波蘭華沙舉行既第三屆選舉中贏得一眾佳麗珍貴友誼，在75位佳麗中獲投票成為本屆Miss Friendship(友誼小姐)，果真分享國際友誼。

吳懿凌以一身民族服裝出場

吳小姐將香港人友誼帶到世界每一個角落

賽果

(左起)季軍波多黎各小姐、冠軍波蘭小姐、

殿軍越南小姐、亞軍白俄羅斯小姐，

第五名既美國小姐唔知去咗邊

蔡慧欣捲入謙謙緋聞

2011-08-23T14:07:00.000+08:00

近日羅仲謙與傅穎分手不是朋友的新聞鬧到熱哄哄，傅穎臨去北京前忍唔住大爆承認同謙謙有一段情，更指佢曾以暴力對待佢，亦暗示佢有第三甚至第四個女朋友，當中涉及今屆港姐13號蔡慧欣。受到事情影響謙謙急急召開記招回應緋聞，承認曾情緒激動緊握Teresa雙手，但否認與蔡慧欣有露骨短訊，大家只係普通朋友。而到目前為止蔡慧欣並未回應傳聞。

咦? 由始至終我都唔明13號點解係傳媒大熱，原來熱響度!

呢個傅穎都真係算吧啦

Gemma: 我呢套桃色泳衣係咪好.. 好襯

我呢單... 呢單桃.. 色...糾...紛呢?

友誼小姐告人誹謗

2011-08-17T10:27:00.000+08:00

88年「最受佳麗歡迎獎」得主丘碧瑜，近年做生意頻頻惹官非。經營寵物生意的她最近控告一位客人在Facebook誹謗她指她做生意不老實，入稟高等法院索償。

歲月催人

88年準決賽兩位得獎者17號丘碧瑜及

最上鏡小姐2號陳淑蘭合照! 陳最後奪

亞軍但丘卻不能打入12名決賽

香港小姐新聞檔案

2011-08-16T23:56:00.000+08:00

原來今屆香港小姐選完翌日，TVB既新聞檔案主題亦都係香港小姐，片段裡有75張瑪莉，80戴月娥，88李嘉欣，及89陳法蓉專訪! 最好笑最後一段記者訪問陳法蓉，話有條較敏感問題，原來只係問佢會唔會留響香港! 車!!

香港小姐新聞檔案

港姐獲繳上美國母艦參觀

2011-08-16T10:01:00.001+08:00

當選後才一星期，四位應屆港姐就獲邀上美國核動力航空母艦"列根號"參觀作首次親善任務，實屬榮幸。四位港姐上船後周圍參觀及與海軍作近距離交流，季軍許亦妮稱穿梭於軍艦中猶如置身於電影中，亦驚嘆原來船上也有許多女軍人。而朱希敏則見到軍人用膳時有兩大塊三文魚，感覺膳食不錯。冠軍朱晨麗說此軍艦會作緊急救援工作，好似剛剛日本地震也有協助，所以覺得呢艘軍艦跟香港小姐也有共通點! 嘩.... 再牽強啲添!

4位港姐在控制室留倩影，呢張相影得Nicole靚呀

朱小姐應該同Karen Chan好friend

四位港姐致送得獎官方照給船長作紀念品，

唔知船長會放張相響邊呢

又到哂英文環節，船長親自接待喎，乜咁大面

8個想留2個棄

2011-08-11T17:51:00.000+08:00

前日一班落選港姐例牌獲TVB邀請試鏡! 每年都有佳麗決定過返自己想過既平淡生活，放棄試鏡，今年就有8號蘇文及15號梁蔚翎決定放棄試鏡機會，我衷心祝福佢地有個美好既生活同發展啦。

當然有人會漏夜趕科場，另外8位佳麗就算搏一搏，反正有機會。當中只得20歲還未畢業既蔡慧欣則覺得娛樂圈比讀書更適合自己，所以想留低發展。不過計我話後生應該好好完成個大學課程，而且蔡小姐既演藝潛質，就咁睇就相當麻麻，想有好發展肯定要付出比人更大既努力先得到囉!

10號李天縱說想做普通話主持，不過以佢呢個look

可以做韓瑪莉替身喎! 9號麥美恩可向主持方面諗諗!

13號蔡慧欣則說自己唱歌主持都麻麻，咁想點啫???!!!!

2011充滿淚水的港姐夜

2011-08-10T16:48:00.001+08:00

2011年港姐終於曲終人散，所有獎項都塵埃落定。似乎今年係近幾年首次冇乜網友狂炳既一年，選完後幾乎係"零"鬧，評判終於順應民意，揀咗個眾望所歸既2011年度香港小姐。

賽果

(左起)亞軍: 14號朱希敏

冠軍兼最受歡迎獎: 5號朱晨麗

季軍兼最上鏡小姐: 3號許亦妮

國際親善小姐: 6號梁麗翹

各佳麗之表現容後再講，想先講講成個製作。基本上今年縮皮地唔用紅館，先係呃人地話會去九展舉行，搞下搞下索性返電視城搞，所以舞台設計都唔可以expect好grand。雖然睇得出成個show在視覺效果上幾有心機，不過始終硬件所限，所以感覺仍然好似綜藝show咁，無甚驚喜。

成個rundown頭半截感覺好趕，好多佳麗Last Shot都未擺好，個鏡頭已經影咗去下一位佳麗度(泳衣環節尤其更甚)。但到後期做母女相擁加佳麗抱頭痛哭環節又嫌拖到好長，淚水都算，講黎講去都係"好多謝你"、"佢照顧我好多，好似大姐姐咁"、"我為你驕傲呀"咁，雖則我明，但重覆咁多次真係UN感動都麻木啦。其實俾我製作我會刪除母女嗰part，咁眾佳麗講下少少感受咪算，送禮呢樣2000年做過啦。不過我幾鍾意播眾佳麗由抽號開始嗰段片，張大合照當時仲有12號王冠架喎，唔知啲佳麗而家睇返兩個月前呢張相有咩感覺呢?

除咗前趕後DUM既問題，今年既所謂新賽制又係奇怪，做兩part就選評判 top 5 favourite，之後先黎個真top 5，跟住復活戰又揀多3個入，咁其實呢3個都係搵黎擺架咋喎，點樣可以在亳無環節底下爭分入3甲呢? 到最後，啲司儀一時又話top 8，一時又話top 5，點知原來係插入一個宣布top 4環節先，啲佳麗都未企定就即刻宣布季軍，呢個動作真係非常多餘，在top 8直接宣布三甲咪仲刺激! 最大敗筆係宣布冠軍，拖個贏既阿媽出去，其實此舉仲衰過06年打開獎狀，緊張程度大減! 從來都係靠司儀宣布先可以睇到佳麗奪魁既激動一刻，唔知邊個TVB監製諗埋呢啲野出黎架呢下?

服裝方面出場套衫顏色鮮艷幾搶，不過Karen Chan最鍾意花，係佢個字典裡面死要加啲花上去先夠靚! 第一套泳衣幾好，在沙灘椅上擺pose影top shot雖然05/06都用過，不過好野唔怕用，效果都幾好。中古服飾我一睇，下乜呢啲係中古? 以為係star trek裡面敵方既妖怪添! 女強人服裝冇乜發揮，點整都係咁。但第二part泳裝無啦啦點解要戴頸鏈呢? 成條鏈攝咗落去心口，真係.....! 髮型方面就做得幾好，起碼冇古靈精怪野出現，放頭髮落黎個個女仔都省鏡咗後生咗! 到最後旗袍紮起都冇咩事，算係幾好!

不得不提既係司儀，其實我仍然係喜歡80年代那種莊諧並重既主持方式，但既然成個勢都係要窒下啲佳麗，咁起碼要好似曾志偉同森美咁，識收識放，窒佳麗都要窒得有紋有路，亦都要窒得過癮，到尾又會幫個佳麗兜。但陳百祥做咗咁多年仍然係一樣咁衰，成個款係hea住做，冇一次講佳麗個名講得清清楚楚，急才又久奉，俾佳麗問返轉頭又口啞啞，成日執人口水尾係咁講，更加唔識得幫下口及收口，次次搞到同佳麗相對無言作ending。好似有一幕15號講自己唔識得分唔該同多謝，解釋一輪完後森美即刻問佢呢一刻應該係講乜，15號即刻答: 多謝! 賺得全場鼓勵掌聲。我相信呢啲場面阿叻永遠都做唔到出黎!

嘉賓方面，咦原來全晚係零嘉賓喎! 以前既港姐年年都有大型歌舞環節，美其名為俾時間評判計好啲分，實質係吸引廣大電視觀眾收睇港姐而設。而每年呢個環節都係主打selling points，被選中表演既都係當紅明星或TVB力捧既新星。到90年代幾乎每個環節都有嘉賓，帶領眾佳麗載歌載舞。可惜近年既所謂嘉賓號召力欠奉，但都叫做有，好似舊年都有一班慧妍港姐撐下場! 但今年呢?? 估唔到TVB連呢樣都慳埋，出年港姐40週年喇，希望唔好搞成咁!

彭慧中成今年唯一"嘉賓"，出現約5秒

首part泳衣環節擺出野性一面

第二part泳衣成條鏈攝哂落條罅，陰功

開場環節以花為題，視覺效果唔錯

中古服式唔三唔四，擁model身型既

朱希敏都搞佢唔掂

女強人服飾冇乜得發揮

落淚場面稍嫌太多

好係時候講下今屆各佳麗既表現：

冠軍兼最受歡迎獎

5號朱晨麗

港姐史上首位奪冠既5號佳麗Rebecca由頭帶到尾，不過始終唔係我最喜歡的一位，當然佢得冠軍亦有道理。Performance-wise其實唔算特別標青，開頭太緊張所以非常拘謹，催淚環節亦堅持唔喊，停留"索下索下"狀態。及後較為自然，catwalk亦好，不愧跳開舞。五官端正加有清雅氣質得到唔少觀眾芳心，更成為近年冇點俾人踩既出爐冠軍，實為港姐省靚個招牌。好多人都話佢似陳法拉，但點解我完全唔覺呢?

亞軍

14號朱希敏

14號呢晚既表現非常突出，一洗參選期間被傳媒完全ignore既慘況。其實佢硬件幾好，夠高度加上有壓場感，惜嘟咀樣似選超模多過選港姐。不過真情剖白特輯加現場有好幾位佳麗揀佢為送禮對象，似乎佢真人並唔係想像中咁串，屬外冷內熱佳麗。通常亞軍都是但有機會去世姐或國姐，希望朱希敏憑身高可以為港人爭光啦。

季軍兼最上鏡小姐

3號許亦妮

可算係近10年樣貌最標緻的一位港姐，更係近幾年名副其實既"最上鏡小姐"，講真論美貌係拍得住李嘉欣郭羨妮嗰啲，惜身高身型加負面新聞拉咗佢落馬只得季軍，以今時今日TVB既奇特選美標準算係執身彩。整晚表現相當唔錯，雙眼有神采，笑容甜美。假以時日應該好快上到位。

國際親善小姐兼五強

6號梁麗翹

五官非常出事，大細眼歪咀兼怪下巴，好彩夾埋一齊唔算好難睇。答問題一流，就算唔記得台詞，都可以好漂亮咁兜返打圓場，反而搞到阿叻一時間唔識接落去老貓燒鬚! 成個勢都係要拎國親嗰隻，如果眼耳口鼻執返好少少應該可以做下東張西望主持。

四強

9號麥美恩

9號麥美恩在賽前亳無期望下入到4強真係超額完成! 司儀在宣布入圍名單時不斷有9號真係嚇壞成屋bloggers' choice評判架! 不過好老實講佢個樣係好過平時好多，而且談吐大方，如果6號臨場病咗分分鐘拎走國際親善架!

八強

1號甄敏婷

全場俾到大家最大驚喜既佳麗，個樣好咗不特止，亦唔係想像中咁卡通聲。而且對答流暢真情流露，令大家有好感。加上骨肉相稱，我差啲想將blogger's choice既"最佳泳衣演譯獎"俾佢。不過係又喊唔係又喊呢家野真係有啲趕客。

八強

4號林慧倩

全晚都係成個容祖兒咁行黎行去，講真樣同身材都係麻麻，惟一對答可以令佢入八強架咋。

八強

7號胡中慧

全晚最令人失望佳麗。硬件非常好既7號一開場已經係訓唔醒look出場，冇神采真係點可以贏呀。一開聲把卡通聲嚇親人不特止，講說話亦詞不達意，俾司儀問多兩句又口窒窒，講真佢阿媽同司儀對答嗰幾句仲得體過佢。

2號關曉琳

好多人話佢似藍潔瑛，但一定唔係"靚絕五台山"。2號一出場都好似冇乜自信心咁，對答環節更加凸顯呢個問題，估唔到連佢惟一強項都徹底摧毀，入圍無望。

8號蘇文

第一位被宣布為評判初步5強之一時，真係成屋人尖叫一下，以為今年啲評判都係鍾情另類之選! 蘇文整晚表現都係唔會令人有驚喜嗰隻，低調到差啲數漏佢。

10號李天縱

睇佢出場好似睇緊亞姐咁，但佢啲廣東話係仲差啲添。基本上要以國語問問題，以廣東話回答亦答唔到幾多句。不過整體表現冇想像中咁搏命，交換禮物環節更收到兩份咁多，應該份人唔算好aggressive。

11號劉思希

全晚最唔知衰乜既佳麗，當然個南亞裔妝係累咗佢，但整體係咪咁差先? 佢身高身形不俗，而且談吐自然得體更勝4號，如果4號都入得8強，咁即係評判覺得11號個樣差佢好多所以唔入??

13號蔡慧欣

其實唔多知佢響度做乜，整晚個樣不情不願咁選，咀扁扁就黎想喊咁樣，真係鬼選你咩。難為啲傳媒仲話佢係大熱倒灶。得5'3"個樣又唔係特別標緻講野一舊舊表現一團糟真係唔知熱響邊。

15號梁蔚翎

其實有佢響度好過13，起碼俾到我地笑下，競選時間更加係FB裡面大熱topic添! 樣就無謂再講，不過佢全晚最靚個shot應該係做女強人環節後面張大頭相喎! 講真佢講野都係怪，不過睇得出係有俾心機改善，起碼好過7同13，最後佢一句"多謝"更獲得全場鼓勵掌聲，成為是晚Highlight 之一!

喂喂.... 仲有啲花絮架.....

最上鏡小姐評判趙式芝無啦啦話啲佳麗僭建，

問非所答。如果你覺得港姐係呢個場合可以咁樣踩既，

咁不如索性唔好應承做評判啦。

慶幸今屆評判陳豪及周慧敏均講明以靚行先，

最終選出一個順應民意既香港小姐。如果

年年都係佢地做評判就好喇!

呢兩件蛋散出年可唔可以

"冇得留低"??

莊思明變"有心事唐老鴨"，其實除咗15號，

全場最醜會唔會係佢?

今年總結到此為止，不過其實今年港姐未完架，大家密切留意稍後公布既blogger's choice，睇下你同我地普羅大眾既心水一唔一致?

新鮮滾熱辣賽果

2011-08-08T01:49:00.001+08:00

終於由港姐gathering返到屋企喇!! 一整晚成班bloggers' choice既評審都嗌到七彩，個喉嚨勁痛而家! 唔講咁多住，同大家講下賽果先 (相片稍後提供):

冠軍: 5號朱晨麗
亞軍: 14號朱希敏
季軍: 3號許亦妮
最上鏡小姐: 3號許亦妮
國際親善小姐: 6號梁麗翹
最受歡迎獎: 5號朱晨麗

4強: 9號麥美恩
8強: 1號甄敏婷、4號林慧倩、6號梁麗翹、7號胡中慧

其實整晚3號狀態甚佳，只得第3有啲可惜。5號初段冇乜自信，又強作鎮定，不過應該之前已俾評判有好印象，故順利當選。朱希敏表現幾好，不過仍然有啫咀情況，笑容不夠。不過整體3甲個樣叫做正正常常，今年應該唔會再有人鬧豬扒喇卦。

成個show開頭趕頭趕命，但後尾好似underrun咁，催淚環節要整兩個，實在too much喇! 不過泳裝環節放頭髮幾靚，唔好再紮髻喇真係! 全晚最大敗筆係宣布冠軍時拖阿媽出去，一啲都唔緊張仲整到個氣氛唔三唔四，要打大交叉啦!

哇兩點喇，講住咁多先，聽日會詳寫!

係今晚喇!!

2011-08-07T15:10:00.000+08:00

等咗咁耐，今晚終於選港姐喇，雖然普羅大眾已經對港姐競選興趣大不如前，不過我仍然好似80年代時候咁，一早落街買幾份報紙睇下各佳麗既泳衣綵排狀態點樣，另一方面又好好整妝待發出席今晚同一班選美粉絲既pageant gathering，實在十分期待呀!

一如以往昨日14位佳麗以泳裝作綵排俾傳媒影相今日交差，基本上睇呢日狀態都略可估到各佳麗最後走勢會係點，指標性非常高。觀乎佳麗相片，容光四射既不多，有啲更略顯疲態添，真戥佢地擔心。

1號甄敏婷 - 狀態唔錯，雙腿略粗

2號關曉琳 - 有啲老態，談吐搭夠

3號許亦妮 - 全場最靚，慎防債仔

4號林慧倩 - 稍為走樣，不再祖兒

5號朱晨麗 - 身樣皆佳，缺乏自信

6號梁麗翹 - 狀態平穩，甫士唔得

7號胡中慧 - 狀態止跌，再度發力

8號蘇文 - 穩穩定定，平平無奇

9號麥美恩 - 從未修身，入圍嘖奇

10號李天緃 - 身材睇頭，粵語搖頭

11號劉思希 - 狀態大勇，入圍唔難

13號蔡慧恩 - 唔知憑乜，成為大熱

14號朱希敏 - 自信十足，態度趕客

15號梁蔚翎 - 買定機票，返多倫多

上屆冠軍抽返當年參選號碼13號試戴后冠，

真係橋

13號蔡慧欣戴穩啲個后冠喇

14位佳麗加油喇!!!

仲有2日, 你緊張未?

2011-08-05T16:49:00.001+08:00

講下講下2011港姐仲有2日就舉行了，雖然我呢兩個月有啲自己野忙，搞到今年競選新聞勁少update，不過其實我都有緊貼港姐最新行情。臨近決賽夜，自己都有啲失落，好似follow開既野突然又要停落黎，就如班港姐即將要各散東西，依依不捨。

雖則今年唔多update，不過臨門review點都要做下，要讚要彈主觀客觀乜都講下，唔知今次各位讀者會唔會又同我有共鳴呢?

1號甄敏婷 Janey

22 5'8" 119lbs

學生

甄敏婷曾參選溫哥華華裔小姐競選，5'8"既身高立即吸到到一班港姐粉絲既注目，不過樣貌未見突出，一把BB聲更係同佢大方既樣子格格不入。由參選至今都堅守零新聞既記錄，相信決賽夜亦都冇乜機會打破。另帶一提既係佢請咗佢叔婆參與長隆外景，令到大家一時間想搞清楚叔婆究竟係你邊一位親戚呢?

2號關曉琳 Iris

22 5'6" 107lbs

學生

才藝表現獎

應該係首位由Edmonton選返黎既海外佳麗。Iris甫出場時頗為師奶，大方斯文look儼如09黃嘉麗既翻版，而官方相更將呢個特質凸顯出黎，O哂咀。不過佢響個blog登出黎既casual照就好得多，起碼叫做斯文靚女。在台灣特輯中表現出流俐說話技巧，不過略嫌mono-tone冇乜情感位，適合做紀錄片旁述多過做主持。而上鏡個樣亦變返成熟，有幾個Shots成個曾華倩咁添，有啲搞笑。估唔到乖乖女look既佢原來係舞林高手，憑一支Irish Dance奪得才藝表現獎，不過唔單止咁，竟然傳佢爛蒲兼喪界仔，我就真係link up唔到佢可以係一個咁既人囉。

3號許亦妮 Whitney

22 5'4.5" 110lbs

學生

亮麗奪目獎

許亦妮絕對係今屆，甚至係近幾年樣貌最標緻的佳麗，甫出場已得「翻版梁詠琪」的稱號。不過樹大招風，佢亦成為今年各大傳媒既Target，全天候火力集中煲佢，先傳佢專黐有錢仔連界13件，又話佢同12號王冠鬧交鬧到人地要退選，跟住又話佢在英國生過仔整過容，到今日又話佢爭人十萬唔還，告密者更揚言在決賽當日拉大隊去電視城抗議喎，搞到曾醒明都要出黎講話會調查一下。雖然係咁，但似乎佢既美貌已經overwhelm所有負面既野，在觀眾投票中一直穩佔前五名，更加台灣照片展中經觀眾投票奪得「亮麗奪目獎」，總算唔會空手而回。而佢亦出奇地說話有紋有路，見得下人，冇事冇幹應該三甲在望。不過近年TVB選美制度奇突，佢攞最上鏡小姐都唔可以叫十拿九穩，所以大家都唔好抱太大期望，可能個心會舒服啲。

4號林慧倩 Giselle

25 5'6" 113lbs

特約形象設計師

面試時被指化妝太濃而甚有風塵味既Giselle，入圍後樣貌稍有提升，不過竟然變到跟容祖兒有8成似，但今次係選港姐唔係選巨星3，似容祖兒都真係有啲該煨。雖然林小姐個樣唔係幾impress到人，不過講野十分靈巧生動，有感染力，唔多唔少應該係同佢工作有關。如未能當選TVB都可以斟下佢做東張西望主持喎，個樣起碼好過李漫芬吖，不過希望佢唔好好似麥皓兒咁有實力但不受重用啦。

5號朱晨麗 Rebecca

23 5'6.25" 107lbs

芭蕾舞蹈員

歡樂大使獎

時尚目光獎

周潤發做港姐評判嗰年 (90年)，佢話最鍾意女仔識跳芭蕾舞，所以梁小冰順利入咗三甲。雖然今年冇佢做評判，不過身為ballet dancer既朱晨麗一樣可以坐亞望冠，因為唔少網民甚至藝人都buy佢做冠軍。來至內地既Rebecca一心鋪好路要選港姐，未選時響微博已經大事張揚，但估唔到佢入圍後一直低調，負面新聞就算有都係好"輕KAN"，形象保持健康(雖然宣傳片有啲發姣)。佢先拔頭籌響長隆樂園拎咗個「歡樂大使獎」，細說與母親關係時令人動容；之後更奪大豬肉獎「時尚目光獎」，而且係港姐最具冠軍相佳麗投票中由頭帶到尾，決賽醒醒定定應該唔難入三甲。不過我就由始至終都麻麻地佢，始終覺得佢國產味甚濃，不過佢既廣東話好impress到我，感覺仲好過馬賽嗰啲。

6號梁麗翹 Nicole

26 5'6" 115lbs

高級市場推廣主任

甫出場就有「Chok眼宋慧喬」之稱，一味死瞪大對眼令人感覺唔自然，不過呢個情況之後已經緩和唔少。全場最大既6號事實上最初時亦唔被睇好，但台灣特輯後唔少人都被佢溫婉有誠意既說話態度吸引，佢講野係令聽既人感到舒服嗰隻，印象分亦大大提高。而亦因為咁佢吸引到評判既芳心而選佢做「旅遊大使獎」既得主，奪冠呼聲大大提高。

7號胡中慧 Sandy

23 5'7.75" 115lbs

助理客戶服務主任

來自多倫多Mississauga(非海外佳麗)既胡中慧一出場已被媒傳稱為「高眺楊采妮」，大方樣貌甜美笑容加高眺身材仿佛就係今屆冠軍既"人辦"，而一眾粉絲亦對佢存厚望。點知一出聲就甚為趕客，聽佢講野就好似睇緊卡通片一樣，吱吱喳喳咁幾annoying。雖則係咁，既然符思思都可以拎季軍，咁胡小姐都未必冇可能既。

8號蘇文 Susan

26 5'5.5" 103lbs

投資銀行經理

最佳珠寶演譯獎

另一位來自內地佳麗，不過廣東話不俗。蘇文參選而來一直低調，跟1號一樣完全係零新聞，其實我好想知佢以investment bank manager既身份參選究竟係為咗啲乜。蘇小姐文筆流暢，睇佢既blog都知道佢甚為有內涵，而且衣著品味不俗，選唔到都可以走下才女路線。

9號麥美恩 Mayanne

24 5'5" 117lbs

項目統籌

每次見到佢都令我諗起02年既才藝小姐蔡潔文，一對酒凹加冇shape既身形簡直係twins一樣。不過話還話佢似乎甚受網友歡迎，可能係佢響Vancouver啲frd大力催谷卦。不過講野就唔錯，但今屆講野好既佳麗大有人在 (2,4,6號等)，要用呢方面突圍真係唔多容易。

10號李天縱 Lena

24 5'3.5" 108lbs

學生

首位純國產入圍港姐，李天縱可謂完全不諳廣東話，如果香港小姐最終要走呢條路線，希望佢at least可以揀啲好似亞姐咁既高質國產佳麗。10號除咗身材驕人外，基本上冇乜其他野令人留有印象，反而一口普通話對答成為佢既獨特標記。

11號劉思希 Lisa

25 5'8.5" 116lbs

市場總監

11號劉思希在澳門出世，之前曾參加中華小姐環球得賽得友誼小姐，待人接物應該駕輕就熟。劉小姐初入圍後一副眼鏡look嚇親街坊，以為係一位貌似廖安麗既Miss入錯電視城，好彩首次記招已經"執返正"，5'8.5"加一頭短髮令人眼前一亮。但之後冇乜作為，決賽都似陪跑居多。

13號蔡慧欣 Gemma

20 5'3" 103lbs

學生

第一次見記招時狀甚師奶，以為全場最大26歲既佳麗係佢，點知係全場最細，O哂咀。本來平平無奇講野又唔掂既13號近日竟然無啦啦成為傳媒大熱，亦受好多網友幫佢defend話佢sweet話佢好，真係難明難明。即係咁，就算你話個樣見仁見智 (老實講佢係好咗啲)，但作為一個選美粉絲，應該明白身高對佳麗出外參賽甚為重要，起碼唔好丟人架啦，咁你話一個5'3"點揀得落手啫。

14號朱希敏 Hyman

23 5'9.75" 121lbs

節目主持

剛出場時確實曾令一眾港姐粉為之眼前一亮，高朓、大方、有台型，成個model咁款，本來大力買重。點知俾TVB執過後即刻跌哂watt，變到扁口扁面起哂角，原來呢個都唔係最要害，成件事最錯係擺出一副"我係做過幕前"既姿態，講野作狀加翁口翁鼻，典型加拿大中文電視台主持口吻，非常annoying。不過其實Hyman既硬件係唔錯，如果成個感覺sincere啲，應該可以令人受落好多。

15號梁蔚翎 Wyling

22 5'4" 102lbs

學生

首先我想講我絕對相信梁小姐係一位善良既女仔，但唔好意思我真係唔可以唔講出我既感覺。其實佢究竟點解會響度架呢? 海外招募而落選既2000位女仔見到Wyling會唔會鬧爆TVB呢? Wyling呢張官方相其實已經救咗佢，平時嗰啲真係，10張有10張會嚇親人嗰隻，加上佢講野詞不達意，camera sense又欠奉，真係唔知佢選黎為咗啲乜。曾幾何時由一眾選美達人票選史上最醜港姐得主91年5號麥格盈，今次真係遇到勁敵喇!

好喇，終於寫哂2011既港姐review，我呢一Part就做完喇，不過佢地仲有兩日時間準備，我響度就祝佢地星期日有個good show啦。希望佢地enjoy呢個過程，就正如7號胡中慧在blog度所登既一張相，friendship forever!!

各佳麗既鎖匙扣都有自己既肖像，

有幾維肖維紗喎

經典Logo

林慧倩試著新袍

2011-08-04T09:36:00.000+08:00

今屆港姐在加晚斗蓬上有新設計，而昨日更抽到4號林慧倩試穿，大家唔好錯覺以為係容祖兒示範啊.....

候選港姐生死一戰

2011-08-03T14:12:00.000+08:00

昨日14位2011候選港姐首次會晤5位主審評判，當中包括陳豪、周慧敏、馬清揚等人。要知道今次見評判乃係成個競選最重要既一項活動，因為基本上只有呢個機會可以俾評判清楚了解自己，將自己最好一面表現出來，而且基本上評判會在這次面談中揀出心水佳麗，所以對一班佳麗黎講可謂背水一戰，食唔食糊都係靠呢舖架喇!

呢排廣告新寵兼同前港姐冠軍陳茵媺傳緋聞既陳豪當然成為傳媒焦點，被問到會否以Aimee作"藍本"，Moses笑言自己唔識揀冠軍，但評審準則以個人性格同談吐為主，而身材平均則OK! 而另一靚女評判Vivian則較著重樣貌，不過她自言很難看出佳麗有冇整容，只要自然便可以。她又謂會上網睇眾佳麗既blog，了解她們內涵。

而今年司儀則由曾志偉、陳百祥、森美擔任。曾志偉話佢既心水係3,5,7喎，都算正常!

13號蔡慧欣與3號許亦妮及5號朱晨麗並列

三甲熱門人選，令人O咀!

陳豪表示港姐係代表香港所以最基本

要識講廣東話，10號李天縱(右一)今次真係

凍過水。

周慧敏話選港姐外表漂亮尤為重要，咁唔知

15號Wyling(右一)響佢手中拎到幾多分呢?

你準備好未呀?

2011-08-02T00:27:00.000+08:00

響公司花咗啲時間，我地既blogger choice 2011 scoresheet終於搞掂喇，但唔知點解用Excel直接print係print唔到彩色的，但convert咗做PDF先print又得喎，真令人摸不著頭腦。不過點都好，有張靚靚計分紙點都覺得pro啲, 哈!

大家買咗今期TVB周刊港姐特刊未呀? 形式同舊年差唔多啦，都係登下之前活動同外景既相片，同埋每位佳麗寫下感受咁囉，新意欠奉，新相又冇。今年評判有王守業夫人、王英偉太平紳士、周慧敏、馬清揚、陳豪。而最上鏡小姐有丁生丁子高、趙式芝、鄭兆良、謝婷婷喎!

實在太期待喇!

5號再贏豬肉獎

2011-07-29T09:48:00.000+08:00

連續第4年舉辦「時尚目光獎」已經成為港姐主要既豬肉獎之一，雖則呢個獎對賽果指標性麻麻，不過都算係一眾粉絲幾期待知道的賽果。今年呢個獎評判包括89港姐陳法蓉，以Monica一向保持既戰鬥格狀態，真係將一眾姊妹比下去。Monica不諱言睇到一眾師妹令佢勾起當年選美驚到騰騰震的心情，而佢就睇好1號甄敏婷、3號許亦妮、6號梁麗翹、9號麥美恩。不過今次佢就俾5號朱晨麗最高分，而朱晨麗亦成為今年「時尚目光獎」得主。

另外有周刊盛傳因無線想力捧3號及5號，而下令兩人決賽當晚不能獲得任何獎項，以免她們要負起港姐責任而有礙力捧。不過計我話，應該俾佢地先攞獎後力捧，一來可以錦上添花，二來可以省靚港姐個招牌嘛。

3號及5號兩大熱門勝在樣貌夠省鏡，

唔係真係會俾條"靚"裙拖到新谷底呀!

時常保持作戰狀態既陳法蓉

輕易打贏一眾師妹啦

2011港姐博客之選

2011-07-26T19:57:00.001+08:00

估唔到隔離台阿FUN搞呢個MissHK Bloggers' Choice已經搞到第三年喇! 繼上年協辦後，今年我又好榮幸可以參與呢個咁有意義既活動! 不過呢個Fun博主好惡，下令我今晚要宣傳下，當然我作為協辦機構實在係義不容辭啦!

今年既選舉方式跟去年一樣，都係由十位主席評判加招募既客席評判一齊擔任。雖然話係有主客之分，不過我地既計分方式非常公平，每位評判既分數weighing一樣，冇話邊個佔重啲架!

如果你都想參與，不妨send個e-mail去mhkbloggerchoice@gmail.com報名參加啦，先到先得架!

曾志偉 + 候選港姐: 我地等緊你架!

我返黎喇

2011-07-13T15:03:00.000+08:00

咁多位，估唔到我又會返黎見大家，前排忙於搬屋，加上一些私人問題，令到情緒極度困擾，曾經"柄"埋自己乜都唔想做，更加想放棄寫港乜姐。不過事情終於過咗去，而且我姣婆守唔到寡，港姐喎，作為粉絲梗係想寫一寫啦!

成個台灣外景都冇報道，算啦唔想寫返轉頭，不過其實都冇咩好寫，啲衫肉酸唔在講，成個過程都冇乜睇頭，只係成日見到10號李天縱蒲頭，冇法啦，香港傳媒而家對港姐既定律係胸大等於熱門。

而每年既pre-final重頭戲旅遊小姐又誕生喇喎，6號梁麗翹以鋼琴表演盡顯才華，勇奪旅遊小姐獎，擊敗大熱5號朱晨麗。而一向質素幾OK既7號胡中慧，幾近零新聞底下終於有人提下，話佢加拿大時已經密謀入娛圈，並曾整容，不過記者話睇過之前既相，分別唔大喎，胡小姐又成功過關喇。

6號梁麗翹會唔會步陳庭欣後塵攞埋冠軍呢?

機會微啲囉

3號齋企定定唱歌，行到冇朋友

7號胡中慧應該係畫畫掛?

甄楚倩上身?

世上無絕對敵人

2011-06-16T10:16:00.000+08:00

97年港姐是非之多堪稱歷年之冠，又內定又你唔妥佢又鬧佢八婆又爭仔又杯葛又不滿港姐制度，單單野搞到滿城風雨! 當中參選佳麗劉綽琪更指參選後從來唔會有gathering約出黎食飯，一班佳麗既"友誼"可見一斑。不過世事無絕對既，廿個女仔裡面實有幾個傾得埋，好似早排微博上載咗一幅經典97港姐合照，當中有冠軍翁嘉穗，頂頭大熱19號歐陽妙芝，同埋之後都拍多個廣告既20號林翠鳳。其實過咗咁多年，乜都化啦，多個朋友咪仲好!

學當年15號伍燕妮話齋，但願呢份友誼，

永遠都唔會褪色吖....

咦? 隔離台阿FUN都搞過眼鏡派對喎，

我地啲眼鏡冇呢啲咁"行"啦... ，哈!

港姐"遠赴"台灣拍外景

2011-06-16T09:43:00.000+08:00

今日眾候選港姐將會連同嘉賓羅仲謙(him him yeah!!!)、袁偉豪及蕭正楠一齊"遠赴"台灣全島遊拍外景! 近年港姐外景地點甚有噱頭，好似08年加勒比海，舊年既印度，都令人有耳目一新既感覺。但今年則非常縮皮，只以台灣作為外景地點，加上決賽選擇在電視城舉行，相信今年既港姐一定唔會over budget，唔洗怕auditor check數啦!!

今年羅仲謙冧莊做嘉賓，show肌show肉屬意料中事，佢話今年會學精，唔會好似舊年咁同2號張莎莉失蹤幾個小時喎，咁袁偉豪同蕭正楠要多多"目及"實呢個兄弟喇!

Whitney而家每次見報都係解釋緋聞，

真戥佢慘

今年呢3位型男做嘉賓，期待呀

其實14號有冇高13號一呎???

陳倩揚生咗喇

2011-06-13T09:36:00.000+08:00

恭喜恭喜!! 08年"哎也"港姐冠軍陳倩揚終於尋日生咗BB，母子平安，相信老公陳浩然一定好開心。陳倩揚自從年初宣布懷孕四個月後，一直都有繼續幕前工作，而其健康大肚婆形象亦深得廣告垂青，拍了個奶粉廣告及出席多個宣傳活動。Skye講明好鍾意小朋友，所以希望生最少三個，我地都希望佢快快再傳喜訊啦!!

腹大便便既Skye雖然身陀巨B，但步伐輕盈，

影相拍寫真冇難度

No more crown!!!!

2011-06-10T17:41:00.001+08:00

收到可靠消息，有黑面樂易玲之稱的12號佳麗王冠已經退出本屆香港小姐選美，原因未明，相信是她不太習慣港姐競選過程吧，由始至終佢都好似投入唔到咁，而且完全唔識廣東話，真係好大障礙呢!

唔知TVB會唔會好似02年咁增設後補佳麗呢? 當年4號林曉維及17號余綺文均以"熱熱地"姿態甫亮相後不久便退出，TVB"罕有"地補上4號劉啟兒及17號劉若莉，惟兩位佳麗最終均不能進入決賽。

TVB.com內的港姐主版面(上)及pull list(下)

均已清除12號王冠的資料

林曉維 & 余綺文

劉啟兒 - 註定陪跑

劉若莉 - 本來平平無奇，到塞班島拍外景後

一鳴驚人，憑身裁日日見報。落選後做過

一陣獎門人歡樂小姐

2011港姐首次出席公開活動

2011-06-07T16:15:00.001+08:00

每年端午節都唔多唔少同港姐fans息息相關，以往多數係因為剛當選既港姐三甲會出席作主禮嘉賓，而現時則有應屆候選港姐出席打氣(有些年份甚至曾參與鳳艇比賽，不過多數都係原地打轉)，故此每年端午都係睇港姐既好時節。

昨日我就一早扭開電視等睇一班港姐出現，果然11點幾班港姐就出現，個個polo tee熱褲落力打氣。當中10號李天縱更被挑上為鼓手，自然要訪問下佢，點知...... 一口半鹹淡廣東話非常煞風景。今年TVB隊爬第六，上岸後司儀再次訪問10號感受，唔知係咪之前冇夾過既關係，佢索性放棄講廣東話，以全普通話作答，更一輪咀大發偉論，非常國產佳麗作風! 唉其實我鍾意睇選港姐多過亞姐多多聲係因為港姐始終係揀個香港女仔代表香港啫，點解而家搞到好似亞姐港姐選拔賽咁先? 強國既影響力已經蔓延到選美業喇!!!!

唔該TVB搵教陳法拉講廣東話既老師

操下一班佳麗啦

3號許亦妮雖然緋聞纏身，但

狀態仍大勇

4號林慧倩被一向中肯既明周指在首輪及次輪

面試時因對答得體甚得評判歡心，唔怪得

可以爆冷殺入15強啦

喂張秀文搞咩呀

13號去咗邊??? 陰功

2011港生靚仔何在??

2011-06-02T23:27:00.000+08:00

2011香港先生招募在接緊零宣傳底下結束，而昨日就在九龍灣舉行面試。今年既參賽者真係...... 一句講哂，搵個四正啲既都冇，靚仔既固然得一個半個，大隻佬亦都欠奉，而大多數更加係非常市井，即係求其搵個friend都正過嗰隻!!

今次本來有40個面試「佳麗」，但係有8個臨時甩底，所以只得32位! 噢我諗起我個FRD!

格仔豬油包

個肚腩都唔細喎

堅似張立基

Yes Sir張智霖

呢個好似06年個林祐飛喎，但身形欠奉

呢個真係市井到呢.....

好大隻老鼠呀，但比例會唔會怪咗啲

喂呢個算幾好架喇

走樣甄子丹

唔係唔笑下嘛

陽光蕭正楠

呢個參賽者咁岩又係姓蕭，叫蕭家浩，

拍過好多廣告，未入圍已成大熱

翻版"蔣進"

貌似09港生陳偉洪，但對眼好似浮咗啲

馬面陳智燊

本身係咪練馬師?

唔耐煩吳卓羲

個格都似埋

呢個算OK

CHOK樣laughing哥

2011港姐正式登場喇

2011-06-02T19:59:00.000+08:00

有跟開港乜姐既網友，記唔記得舊年港姐岩岩見記招嗰日，我地仲要周圍搜刮啲佳麗叫咩中文名，抽到幾號等等，但今年TVB真係快手，記招舉行完冇耐就post哂啲佳麗資料上網，唔洗我地左搵右搵，認真抵讚!

真係好心急呀，即刻介紹!

1號甄敏婷 (溫哥華)

佢選溫華姐時都係1號喎，希望唔好

好似當次選美咁一樣命運啦

2號關曉琳 (埃德蒙頓)

好似係第一次有Edmonton代表喎

3號許亦妮 (倫敦)

貌似郭羨妮既3號今日變髮相超得喎，成各大報章

大頭相熱門，可惜佢唔係太高

4號林慧倩

冇樣冇高度冇氣質，負責落選

5號朱晨麗

原來佢唔算特別高咋喎

6號梁麗翹

叫做有進步，加油喇

7號胡中慧

堅高喎，應該有5'8"，個勢似

舊年張秀文嗰啲

8號蘇文

keep住狀態，但佢係咪大陸佳麗呀?

9號麥美恩

又係平平無奇，過目即忘

10號李天縱

點解佢而家變咗似關寶慧??

11號劉思希

係順眼好多，而且都高，有記者貼

佢係4大熱門添，又好似過份咗啲

12號王冠

本來係cool cool地黑面樂易玲Gwen都叫有啲性格，

但一睇個咁既名即刻兜盤冷水淋過黎咁，不如叫Crown啦

13號蔡慧欣 (曼徹斯特)

唔知有冇5'2"

14號朱希敏 (多倫多)

應該係今屆鐵膽

15號梁蔚翎 (多倫多)

whew..... 正常返

1-5號合照

6至10號合照

11-15號凹字合照

形象總監Karen Chan啲衣著品味真係頂呱呱

準港姐另類美

2011-06-01T11:22:00.001+08:00

今日各大報章都大篇幅報道15位準港姐消息，當中傳媒繼續摑料，不過似乎一眾港姐fans既料仲快仲堅，邊個選過乜姐物姐一早起哂底。尋晚post咗TVB.com登既相，tvb梗係揀過篩過先登啦，但傳媒就唔會同你客氣，影得你衰啲既就越要登。咁我地又睇下各準港姐既另類美先啦!

來自英國既Whitney被全線看好，話佢省鏡之餘

仲好有禮貌，唔怪得咁易俾人影到寒背鞠躬相啦

全場最好笑組合，黑面620加正版620，

點解啲記者唔搵佢地合照啫

Giselle被指似容祖兒，如果有

佢咁高都好既

呢張似楊采妮似到

Hyman朱希敏曾參選2009多倫多華裔小姐(冠軍張慧雯)，

當年佢22歲，身高達5'9.5"，點解呢張相咁似恬忸既?

另一選美常客Janey甄敏婷曾參加2010溫哥華華裔小姐，

當時佢21歲，身高都有5'8"架

呢個Wyling，其實有冇得再醜啲????!!!!!

嘩咁大杯啤酒，朱小姐你飲唔飲得哂呀

拍埋朱敏希度，其實高朓楊采妮唔算好高咋喎

15位佳麗突擊亮相

2011-06-01T00:12:00.002+08:00

今年TVB玩大surprise，明明話6月2日先至公布名單，點知冷不防早兩日已經來個內部meeting先，仲破天荒叫啲佳麗企定定俾班記者影相，連官網都即刻登哂啲相，務求搶閘以最先消息搶客。難為我地一班港姐fans既驚且喜，早啲知道消息故然好，但霎時間要我地嘔時間出黎update個blog，確係好鬼倉卒。

講返啲佳麗先，今年有成6位海外佳麗喎，拍得住90年代既人數，即係其實TVB一早預咗咁多入架啦，又講咩視乎本地佳麗質素先決定人數比例啫。本地佳麗剩返得9個，但都唔係全部精英入哂喎，之前新聞多多既MK嘉欣及闊面周秀娜等預咗唔會入，但連正正常常被睇高一線既叉腰蔡少芬，爽朗宣萱同索爆李雪瑩都唔入，如果唔係關合約問題事，就真係唔知關咩事喇! 反而「點解Miss係Miss」Lisa就入，實在太離奇喇!

好，講多無謂，不如睇下今年15位佳麗係點樣先啦

Gemma (海外佳麗)

外型師奶，但未致於冇得執既，佢係咪

就係26歲嗰位?

Giselle

面試亳不起眼，估唔到殺到入黎，

可以減下邪牌味會好啲

Gwen

Cool爆變親切，但都係好夾硬，

似會成傳媒針對對象嗰啲

Hyman (多倫多)

貌似大S，質素奇高，身型又高，

唔錯唔錯

Iris (加拿大)

即係黃嘉麗嗰啲咁囉

Janey (溫哥華)

佢呢啲款似選華姐多啲，仲要係代表

夏威夷嗰隻

Lena

正氣甄楚倩果然入，我對佢印象

幾好架喎，希望佢會有好成績啦

Lisa 劉雅儀

被指在2009年中華小姐環球大賽得

友誼小姐榮銜，果真係友誼小姐level，

Mayanne

港姐有不明文規定，有酒凹多數

冇運行，睇黎呢位佳麗要醒定啲

Nicole

由頭到尾都鍾意chok眼既佳麗，

好心自然啲啦

Rebecca 朱晨麗

一早鋪定好路選，微博都拎定個驗證，

個記招clip有記者嗌"呢個靚喎"，但我

就對佢冇乜feel囉

Sandy

今趟塊面肥咗喎，記者話佢係「高眺楊采妮」喎，

希望真係係高，唔係只係高過楊采妮啦

Susan

淡淡定定tan版車婉婉，揀衫永冇失手

Whitney (倫敦)

驟眼睇有啲似郭羨妮，應該係有啲

外國血統

Wyling (多倫多)

我都係來自多倫多，但..... 我冇野想講囉

漫畫港姐會係點?

2011-05-24T17:37:00.000+08:00

近日在FB見到有人畫咗一幅港姐漫畫，幾靚架喎，想同大家分享下!

作者: Choi Takui

幾有日本漫畫feel呢! 各位女仔加油喇!

2011港姐亮麗覆試

2011-05-22T11:52:00.000+08:00

隔咗五日，2011年度香港小姐面試又進入第二階段。一如以往，騎呢佳麗大部份都被out，之前的LV小儀同買餸簡慕華冇哂，剩返低既都端端莊莊見得吓人，驚嚇指數大減。今次面試有34位女仔參加，大部份都企定定俾傳媒影，加上有第一次經驗，個個都淡定好多。

是次覆試啲女仔大部份都收起性感，以大方形象取悅評判，惟部份佳麗fashion sense仍然甚為唔掂，難為TVB既blogmaster要寫佢地著到"猶如前赴宮廷晚宴"咁誇張，唔知呢位博主寫時會唔會下唇微震呢？

唔講咁多，係時候睇下一班面試佳麗既五日蛻變究竟係點樣先！

Tanned版車婉婉

佢既fashion sense算係成班裡面幾唔錯既一位，起碼揀既衫

Fit自己身裁同style，成個package幾好

入圍度: 80%

叉腰蔡少芬

變化唔大，一樣既髮型、笑容、叉腰甫士、

及疑似反轉再著既黑衫

入圍度: 80%

疑似工展小姐楊潔雯

被指為第43屆(09)工展小姐季軍，更被認出曾面試

2009港姐，睇黎佢真係好鍾意選美 (下圖)

入圍度: 50%

疑似工展小姐(左)季軍

09年面試港姐，佢真係好鍾意黑色

瞪眼曹央雲

變身後激似許茹芸，今次件衫fit好多

入圍度: 70%

濃粧MK女

有「MK嘉欣」之名，英文名Jasmine，今次個樣冇咁MK，

不過好似跌咗watt，唔知係咪俾人登咗啲攬仔照唔係咁開心呢

入圍度: 20%

呢張相就影得幾好

甜美楊采妮

幾份報紙話佢係新面孔喎，其實明明有參加第一輪

面試，有幾難認呢? 佢成個格非常港姐feel，

評判恰埋眼都會揀佢入圍啦

入圍度: 95%

待續..................... (sorry我呢排好鬼忙，忙住搬屋啲野，所以決定都係POST咗呢啲先，過兩日會追加架!!!)

2011港姐走鬼面試

2011-05-06T00:15:00.000+08:00

等呀又等終於等到2011港姐既首輪面試日喇！其實每年既面試已經成為一眾港姐fans既關注重點，除了可以睇睇新一屆港姐質素係點之外，最緊要係睇下一批騎呢佳麗點樣凸圍而出，搶鏡出位，加上娛記甚有創意既冠名綽號，令整個沉悶面試生色不少，entertaining index爆哂燈。

講開娛記，大家真係要睇睇tvb.com上載既面試實錄。為增加新聞性，班娛記梗係唔留情面，誓要挑釁到啲女仔尷尷尬尬，最好發埋火咁先有新聞造啦。不過TVB都係衰，其實啲女仔都冇接受過任何面對傳媒既training，點解硬要佢地企定定俾人狂影及出言侮辱先，真係搞到啲女仔唔敢參選架咁樣。有時競選過程透明度太高都未必係一件好事。

係時候睇下一班準2011港姐喇，唔知有冇好似經典既「選美麥玲玲」咁既佳麗出現呢? 好，去片!

索爆李雪瑩

感覺係幾有李雪瑩feel，但比起佢面試時好好多啦，

算係今屆幾標青架喇

正氣甄楚倩

面對鏡頭幾大方，冇咗甄楚倩噚風塵味

MK娜姐

各大報章風頭之選，五官係幾Sharp，

不過減下啲MK味會好啲囉，話哂選港姐

Tanned版車婉婉

唔知佢唱歌好唔好聽呢?

奇峰異芭

呢個女仔一對不平衡胸秒殺各大傳媒，

果真殺出一條血路

長髮祖藍

又有啲似未執前既張嘉兒先死

甜美楊采妮

呢位女仔其實都似84年港姐11號

戚美燕喎，喂唔係戚美珍呀

LV小儀

佢真係好好笑

煎pan徐淑敏
Suki本身塊面都大，點知呢個女仔仲大，
好彩五官尚算標緻

爽朗宣萱
雖然有報章話佢係艾祖祖，但TVB呢張影得靚好多，
幾醒神又有性格

濃粧MK女
下次輕手啲

買餸簡慕華
點解唔搵阿賓賓幫手啫

瞪眼曹央雲
下次件衫買返中碼好喇

港版新聞女郎
有啲似鈴木保奈美喎，斯斯文文岩
哂港姐個theme

行緊去整容既dodo姐
做咩事呢而家??

Bob頭曾瑞珊
連膚色都似埋

嫩口沈穎婷
可以執下

呢位佳麗係咪屋企啲衫晾咗未乾，
臨急臨忙搵阿媽嗰件著住先呢?

嘩，堅似馬蹄露呀

睇完部份佳麗芳容，相信大家對今年既質素都心中有數啦，當然包裝過後點都會好啲既。監製何小慧及樂易玲指今年仍然會揀約15位女仔出黎角逐港姐后冠，而因為海外佳麗質素奇高(又係咁講)，所以會視乎本地佳麗質素才決定入圍比例。而今年港姐外景將為台灣環島遊，決賽將於8月7日九展star hall舉行，真係縮皮縮到冇朋友。

睇下你地見完仲笑唔笑得出

2011港姐本地招募Kick-off

2011-04-12T16:18:00.000+08:00

海外招募啱啱完，話咁快又到本地招募喇。一如以往TVB都係鍾意黎個歷屆港姐大哂冷，作生招牌吸引靚女參加，而御用「招募員」呂慧儀、高海寧、葉翠翠、及紙上明星陸詩韻等今年仍然繼續其「使命」，落力宣傳。不過招募還招募，焦點總離不開各港姐的衣著，當中呂慧儀最賣命，其DeepV成各報章力Sell之點! 相比下高海寧則稍為失色。

今屆港姐統籌何小慧指本來考慮今屆港姐到日本沖繩拍外景，但礙於近日日本地震，故另作他選。以俄羅斯亦是考慮之列，但最後屬意台灣環島遊，哇好縮皮啫。另外她說今年海外招募反應踴躍，收到申請達400多份! Well，講幾多份冇用架，你睇過去幾年最後揀咗嗰兩三件係乜野貨色先得架!!

Koni呢套衫性感中帶活潑，幾唔錯喎

總係覺得Samantha呢張相有啲似某卡通人物，

但又噏乜出，邊個呢下.......

喂喂Skye，粗身大細因住呀

其實如果新聞部女主播方健儀要呈辭，

TVB可以考慮搵葉翠翠頂佢喎

係呢張相怪定點呢，有啲港姐我竟然認唔出係邊個喎!

想請問左二係邊個，唔係吳日言卦? 右三應該係張秀文，

咁右四呢?

莊思明艷福不淺

2011-03-30T11:33:00.000+08:00

要數應屆港姐最緋聞多多既，必定係莊思明莫屬。當選後先後傳過同超級巨星大孖周志文逛街拍拖，又傳同陳慧琳細佬陳司瀚過從甚密，近排更被指搭上清洪契仔巫翊鳴添。昨日佢同最上鏡小姐李雪瑩一齊出席港生翟威廉既孭飛節目"廉遊韓國"宣傳，被問到同陳司瀚關係，佢話：「大家係朋友囉，佢呢種男仔係女仔都鍾意嗰隻，而家大家相處幾好，唔算係拍拖，但感覺舒服。」

就咁睇，似乎莊思明既感情生活比佢家姐精彩得多喎。

這邊廂，莊思明人逢喜事精神爽，

個look寧捨精神

但呢邊廂，點搞呀最上鏡小姐 >_<

久違了的黑白魚

2011-03-23T09:42:00.000+08:00

78年香港小姐季軍曾慶瑜，佢既新聞近年幾乎絕迹娛樂版，不過最近又有佢最新消息。今日蘋果報道現年54歲既曾慶瑜近日偕家姐同姐夫現身台北戲院睇戲，她雖打扮樸素，但精神不俗。曾慶瑜見到記者拍照有點錯愕，但仍禮貌說：「我沒什麼新聞價值。」而記者問到其感情生活時，她打趣說要記者幫幫她。

曾慶瑜當選後効力無線，拍過幾套經典劇集如「千王之王」、「射鵰英雄傳」、及「獵鷹」。其後到台灣發展其歌唱事業，由於常以黑白色服裝示人，被冠以花名"黑白魚"。

黑白魚穿衣始終離不開黑白色

78年港姐質素參差，曾慶瑜冷手

執個熱煎堆入三甲!

2011港姐招募眨下眼又黎

2011-03-20T05:47:00.000+08:00

眨下眼2011年港姐又開始海外招募喇，TVB尋日就搞咗個記招宣傳是次招募。今次出席嘉賓除咗應屆3甲港姐外，仲有06冠軍陳茵媺同09冠軍劉倩婷，而本來出席既04冠軍徐子珊則步師姐佘詩曼後塵，因受傷而缺席。

今屆港姐陳庭欣話自己就算唔簽TVB都唔愁出路，因出面有好多地方可以發展，但仍然會視TVB為首選咁話。而陳茵媺則會叫加拿大既契妹參加。

今屆港姐年齡限制依舊為17-27歲，而海外截止報名為4月4日，各位靚女記得把握機會喇!

(左起)莊思明，陳茵媺，劉倩婷，陳庭欣，張秀文

齊齊叫靚女參加港姐。呢張相黎講張秀文最

有戰鬥格喎!

陳庭欣狀態頗佳

嘩Aimee塊面搞咩呀

港乜姐未死得

2011-03-17T09:56:00.000+08:00

原來成個月都冇update港乜姐，冇法因為成個月個人身心都唔多舒服，冇乜mood寫下野，不過我唔可以再係咁繼續落去，我要的起心肝搞返起呢個港乜姐!

話時話都到3月中，點解港姐仲未搞海外招募架呢? 不過響大陸Forum，有人話差唔多喇喎，仲有招募宣傳照添，咁我地拭目以待啦!

講下應屆港姐陳庭欣，當選後見報率相當少，不過今日有新聞喎，孖住長腳蟹響蘋果有張相，話係錄影緊「甜心先生」喎，不過段報道梗係focus響呂慧儀度啦。Koni話佢肥咗7-8磅，所以要即極減磅迎夏日，真係鬆懈一陣都唔得架!

呂慧儀頸上既朱義盛..... 嗯.... 新劇扮大少奶??

講完新港姐，又要講下舊既。早幾日前亞視藝員寶佩如結婚喎，當然佢唔係咩選美出身，但佢既姊妹團裡面赫現發現久未露面既廿年前港姐李秀媚喎! 李秀媚係90年既3號，同屆冠軍係袁詠儀。落選後李秀媚都響電視圈撈過一排，做下主持拍下閒角咁囉，不過最為人熟悉既一單料係指佢當年被人氣幾高既細龜黃一山力追，不過係咪有拍過拖既就不得而知喇! 之後佢見撈極唔起都改過個藝名叫李欣曉，不過被人改花名叫李陰險喎，真係好改唔改!

圖中左三就係李陰險喇，話時話都keep得幾好咁喎

李秀媚總決賽問答時表現自信，話顏國樑如果

可以錫佢一個咁靚既女仔，一定會終身難忘!

李嘉欣終成靚媽

2011-02-10T22:55:00.000+08:00

恭喜哂! 被喻為最美麗港姐之一的88年港姐冠軍兼史上第一屆國際華裔小姐冠軍李嘉欣以40之齡終於在前日2月8日弄璋之喜，誕下囝囝Jayden Max。小JM出生時體重6磅7安士，取其名是因為JM是李嘉欣及其老公許晉亨之英文名第一個字母(Julian & Michele)。

其實當年李嘉欣當選後，我曾經以為佢會步朱玲玲後塵，快快

嫁入豪門生仔做少奶奶，估唔到要等接近23年後，Michele才有第一胎。

祝小JM健健康康，快高長大!

新春喜事一樁接一樁

2011-02-06T15:59:00.000+08:00

恭喜發財! 今日係年初四，唔知大家呢幾日飲飽食醉到點呢? 我就日日打牌食年糕蘿蔔糕，實程過個"肥"年。

一踏入新正頭，喜事接踵而來! 08港姐亞軍陳倩揚親證有咗4個月，肚裡面既嗰個仲係囝囝添，真係恭喜哂。Skye話其實舊年12月結婚前幾日已證實有孕，但為怕BB小器，所以過咗3個月先向外公布。Skye較早前更加陀埋個B同老公去沖繩度蜜月，實行影輯靚靚大肚相。

除咗Skye外，今年有多位港姐都會榮升媽咪級! 88港姐冠軍李嘉欣今個月會迎兔B，而91港姐季軍蔡少芬亦會5月做媽咪，唔知佢囡囡會唔會步媽咪後塵17年後選港姐呢?

祝大家兔年快樂!!

2011-02-02T23:10:00.000+08:00

話咁快又一年喇，祝大家兔年快樂，日日都開開心心，樣樣順順利利。

當馬賽無到

2011-01-21T15:41:00.000+08:00

近日Facebook港姐Page有位網友登了一張相，相信是08年港姐往馬來西亞作親善訪問時當地一些報章所報道的。相中該網友指住貼著三位港姐照片的壁報板，以英文打上三位的名字：Miss Hong Kong 2008 (Edelweiss Cheung)，1st runner up (Skye Chan)，2nd runner up (Sire Ma)，無咩唔妥，點知睇真啲......................

點解馬賽張相變咗高海寧既? 不過話時話，

呢個三甲組合我會鍾意多啲喎，起碼整體高啲啦!

張舒雅嫌唔夠高著6"高鞋

2011-01-18T09:24:00.000+08:00

近日強勢回歸娛圈既張舒雅，頻頻出騷及做商品代言人，積極過做港姐時好多。昨日她在會展擔任香港時裝節擔任模特兒行Catwalk，演譯設計師伊嘉2011的秋冬時裝。身高達5'10.75"既張舒雅著上6吋高Platform鞋時一步一驚心，不過佢坦言覺得行騷非常好玩，希望日後都朝多啲呢個方向發展喎!

其實張舒雅呢一刻有冇姚明咁高?

其實有知名度真係爭好遠，一列排開都可以打頭陣。

Edelweiss唔好嘥咗港姐個朵呀

總有出頭天之"日伽"

2011-01-12T10:09:00.000+08:00

果然有高人提下你個名，點都會吃香啲。好似早排義海豪情做大茄既日伽同楊證樺，俾李添勝係咁易讚下，就即刻有報紙做專訪，又上今日VIP咁，而家仲俾監製賞識，欽點做單元劇男女主角添! 呢套劇叫「你們我們他們」，由台灣幾米原著。

日伽在電話上係咁多謝添哥同小慧姐何小慧，佢話會盡力做好喎，預祝佢成功啦。

日伽原名傅韻如，參加2006年香港小姐預賽「美麗友營」環節，編號C7，當時以遊魂姿態參賽，最經典莫過於介紹自己時將其英文名Janice講成 "Janut"! 落選後參與做千金小姐，行行企企既角色! 今次有得發圍，希望佢把握呢個機會啦!

TVB俾多啲機會唔同人啦，唔洗成日睇黎睇去嗰幾個!

惡頂的湯寶聲

2011-01-10T23:39:00.000+08:00

TVB剛剛播完第一集旅遊特輯「紅葉瀛風」，由楊思琦、溫家偉、湯寶珍主持。一開始時接近約五鐘的簡介都由楊思琦聲演，都心知不妙，到正式介紹時湯寶珍把聲一出，嘩.... 點解可以衰成咁架呢? 比選港姐時更惡頂，咬字唔正、懶音重重、時而扮嗲時而扮低B，點解一個成年人可以咁樣講野先? 而另外溫家偉都唔係好得去邊，礙於廣東話唔靈光，講野逐個字"DUN"出黎，惟有以sell body轉易視線! 思琦姐呢? 查實佢不嬲都以"自然作狀腔"講野，不過比起呢兩件蛋散，即刻順耳好多。

我在FB帶出呢個話題，話恰埋對眼"睇"呢個節目，會以為做緊卡通片，點知有個FRD回應: 「咁套卡通應該係講一個家姐帶兩個智障弟妹遊日本! 」哈當堂笑咗出黎!

其實講樣湯寶珍係唔差，TVB唔該搵人train train佢

講野啦，再係咁好趕客架

工展小姐誕生喇

2011-01-05T10:27:00.001+08:00

咁多位新年快樂呀! 港乜姐寫下寫下又一歲生日，我響度祝大家新一年身心都健康靚爆鏡，乜野都順順利利咁啦!

第45屆工展小姐前兩日選咗喎，冠軍係由頭帶到尾既5號黃穎君(華發行)，佢仲囊括「最合眼緣佳麗獎」、「最具才藝獎」、「最具魅力獎」、及「最佳品牌推廣獎」四個大獎添，果真係同楊思琦或翟威廉有得揮喎! 而亞季軍分別係3號陳愛美(耀華行)及9號陳玉玲(東方紅)。

第45屆工展小姐有10位佳麗，質素參差

(左起): 季軍陳玉玲、冠軍黃穎君、亞軍陳愛美

話時話工展小姐搞咗45屆，歷史其實遠超TVB舉辦既香港小姐，而其實有位幾出名既香港小姐，佢之前都參加過工展小姐喎，並得到冠軍添，你又知唔知係邊個呢?

佢就係長腳蟹呂慧儀喇，參加05/06年度既工展小姐架!

而另外一位較出名既係98年既落選工姐麥美寶，點解佢咁出名? 因為佢選既時候被傳媒煲為「翻版譚小環」，見報率奇高 (90年代中期有幾屆工姐係電視直播)，所以令人留下深刻印象，而佢之後亦都短暫出現一些公開活動，亦有參與大電影做大茄，不過我就搵唔到佢張相，唔知有冇網友有佢既相可以醒張俾我呢? haha

聖誕快樂

2010-12-24T09:50:00.000+08:00

今日平安夜喇，真係眨下眼又一年，唔知大家今晚又約咗邊個一齊慶祝呢? 我就同往年一樣同一大班排球隊友去隊長屋企開Party，成班柴娃娃食下野玩下遊戲，又過一個聖誕!

原來港乜姐唔驚唔覺又開張咗一年，自從搞咗呢個blog之後其實收穫都唔少，認識咗唔少選美粉絲，又令我更投入follow港姐既news，真係好充實。好抱歉呢排真係少咗update，希望新一年可以投放多啲精神寫好個blog，等世界各地既讀者都可以有第一手港姐消息。

係度祝大家聖誕快樂，美貌與智慧新一年更加進步!

張舒雅食薯條爆瘡

2010-12-22T09:55:00.000+08:00

我其實不嬲都係New York Fries既粉絲，亦有加入其FaceBook裡的Fan Page。尋日睇睇下FB發現呢個專頁竟然post咗張舒雅既相出黎，點解咁奇怪呢? 原來係Edelweiss做咗呢個品牌尖沙咀新店既開幕嘉賓。同場仲有莊思敏同埋浸大E神楊梓瑤，見佢地三個不情不願咁作狀互餵薯條實在好笑，而Edelweiss塊面亦生咗啲瘡，但佢堅稱自己唔keep都咁索喎，哇.... 食少啲薯條啦，冇益架!

三女全無默契地作狀互餵

塊面確係油咗啲!

莊思明唱歌都OK

2010-12-13T09:28:00.000+08:00

唔知大家星期六晚有冇睇東華呢? 呢個一年一度既歲晚壓軸慈善節目已經冇乜藝員以高難度表演作籌款，反而過咗凌晨1點既卡拉之星先至係全晚高潮，因為幾位台柱如薛家燕、魯振順等表現鬼馬，帶起成個氣氛。嗰晚我都有捧場，本來睇到咁夜都想熄電視訓覺，點知見到莊思明都有份唱喎，當然要捧下場啦。莊思明其實把聲都ok，而且台型唔錯，唔知可唔可以在樂壇發展一下呢?

雖然莊思明前晚唱到三點先收工，不過第二日晨咁早又要仆去數碼港為一個長者步行籌款擔任主禮嘉賓，佢仲話好彩有兩位好姊妹做人肉鬧鐘call佢起身咋。

訓得咁少，難怪對眼係"矇"啲既...

唔知亞姐有冇3點?

2010-12-06T11:10:00.000+08:00

大家唔好諗錯隔離，講嗰3點，係講收視!

好老實，我冇睇亞姐，而且後尾先知原來尋晚亞姐唔係live架喎。

不嬲都唔係咩亞姐粉絲，以前還好，亞姐多噱頭，佳麗仍以本地為主，雖然啲橋都係騎呢居多，但勝在好笑，不論ATV以及佳麗本身都搞到成個騷唔少生氣，唔當選美當場笑片睇都好。

但自從04年亞姐翻生後，吸引力大減，雖則佳麗質素有保證，但已變為內地佳麗同鬼妹既爭霸戰，冇哂利智同宮雪花呢啲令人難忘佳麗，冇咗司儀挖苦操鄉音佳麗既對答，冇哂啲絕核問題考智慧既環節。最慘係ATV一邊面想幫亞姐樹立一個殿堂高貴形象，但成個製作又極之意淫低俗，搞到high又唔係，cheap又唔夠抵死好笑，簡直兩頭唔到岸。

上星期TVB播兩套劇大結局，搞到ATV同時段節目慘食零收視。今次亞姐迎戰全城關注既萬千星輝頒獎典禮，收視係點應該聽日會知，不過以我所睇，可能只得兩三點。其實有幾多人知道尋晚選咗亞姐呢?

好，而家報告下賽果先!

冠軍: 18號王欣

亞軍: 8號維他芝寶絲娃

季軍: 15號劉曉智

殿軍: 11號權潓珠

最上鏡小姐: 8號維他芝寶絲娃

友誼小姐: 9號邱淑芬

亞洲魅力女性大獎: 19號張毅

最完美體態大獎: 2號何婭

晶瑩美麗肌膚大獎: 3號萬嘉麗

最完美秀髮大獎: 18號王欣

佳麗兩個一組，一入圍一淘汰

身高6'1"既泰國佳麗9號邱淑芬拎完「友誼小姐」後

十強不入。呢套泳衣儼如救生衣，肉酸到冇朋友

粉色泳衣系列色彩繽紛，但下身超性感喎

keep住呢個pose做問答，辛苦哂

呢套晚裝咁似糖紙既?

嘩著住泳衣揮"掃"，咁似90年代華姐既?

亞姐驚現爛面佳麗

2010-11-30T10:39:00.001+08:00

眨下眼又到11月最後一日喇，明日又到一年最開心的一個月 - 12月。話時話，2010既選美賽事都搞得七七八八，而亞姐決賽亦會於本週日晚(12月5日)舉行! 剛過去的星期日TVB播出「天天天晴」同「義海豪情」既大結局，搞到亞視嗰邊慘食"零收視"，情況令人痛心。今個星期到亞姐迎戰TVB既頒獎禮，情況更未許樂觀，不過希望亞姐都有三四點收視，不致於慘過做"神功戲" (做俾鬼睇)啦!

亞姐雖然長期處於劣勢，但有時其騎呢風格亦令人爭唔落，繼早前澳洲佳麗無啦啦退出之後，ATV又有新招，在合肥拍外景時突然加多一位"合肥代表"21號殷媁，其參賽時間只有一星期，實屬謊謬之極! 而各佳麗亦視紀律如無物，港澳賽時"寸咀芭比"已可連缺席活動5次，而到正式競選期間，全體佳麗可以齊人出席的活動亦寥寥可數，就算現在全體佳麗上了合肥拍外景，在昨日泳裝外景拍攝仍可有3位佳麗缺席。風頭躉11號權潓珠話胃痛因病缺席冇得好講，但14號貝安琪同16號何婭萌亦因事缺席，唔通佢地在合肥都有大把人要見，唔得閒參加拍攝?

9號邱淑芬左邊面爛哂，幾多粉都冚唔到

8號維他芝斯寶華骨肉相稱，good fit啦

11號權潓珠到下午晚裝環節先胃痛完現身

21號新血殷媁好多謝亞視俾1個星期佢積極備戰

最後想講下，上星期日同朋友竹戰時，因有朋友愛賭馬，所以轉睇亞視的賽馬節目。ATV宣傳亞姐好落力喎，基本上每個廣告時段都有亞姐消息，但宣傳手法cheap到冇朋友，譬如介紹各佳麗宣傳片時，會加插一四字成語形容佳麗，當中有些十分過火，好似"性感尤物1號xxx"、"名眸女神2號xxx"、"熱情如火3號xxx"，而螢幕中佳麗則騷首弄姿亂撥頭髮，感覺猶如深夜宣傳易某夜總會介紹啲女，唉........................... >_<

失蹤廿年既李美珊蒲頭

2010-11-21T14:44:00.000+08:00

86年港姐冠軍李美珊，卸任後立即淡出幕前，佢既新聞亦可謂係零，但近排佢又蒲頭喎，出席大陸江門市節目「群星閃耀江門情」，以江門鶴山客家人身份自我介紹。佢既樣一啲都冇變喎，不過膚色好似黑咗啲。響慧妍既網頁亦見到佢加入咗做會員，唔通諗住返黎發展?

http://www.tudou.com/programs/view/MAuBkDMEPWc/

港姐台慶拋胸上頭版

2010-11-21T14:30:00.000+08:00

TVB 43週年台慶星期五晚舉行，一眾小生花旦例牌扮到靚靚出席啦。今年難得所有國際性選美都係11月頭之前舉行，所以4位得獎港姐可以歷史性「齊腳」著得靚靚咁出席台慶喎，真係唔記得有幾多年唔係咁咯。

4位港姐當晚以低胸GOWN賀六叔，估唔到咁樣係咁易都可以上到蘋果頭版報頭喎，乜星期五真係冇乜大新聞咩? 當晚陳庭欣同張秀文因為坐在六叔隔離，所以頻頻出鏡，就咁睇狀態唔差喎，不過陳庭欣好鍾意叫六叔揮手，呢個手勢亮燈嗰晚已經頻頻出現，睇黎又要收下喇喎。

係喎，點解冇出爐華姐岑麗香既呢? 唔通又係要等到大年初一先亮相?

4位港姐盛裝加燦爛笑容，唔怪得六叔OK哂啦!

似乎張秀文坐得直啲喎

苟芸慧同呂慧儀玩FING波遊戲時非常狼狽

高海寧條裙上半身好OK喎，但下半身啲花....

葉翠翠同周家蔚條GOWN就正常得多

楊秀惠話佢條裙值八千幾蚊喎

亞視又用小動物搞噱頭

2010-11-18T09:33:00.000+08:00

應屆20位亞姐又做宣傳喇，今次亞視照辦煮碗用2001年選女優既技倆，叫參選佳麗玩小動物! 不過今次亞姐好D，唔洗好似當年班女優咁要食麥皮蟲飲曱甴酒，只係需要拎起D蛇呀蛙呀擺下pose影相就得。講真呢啲咁既小動物男人拎起都唔多開胃，何況一班嬌滴滴既細路女，不過一班佳麗嚇到花容失色，聲淚俱下，亞姐又可以再一次衝擊見報率。

18號王欣被蛇尾撩起條裙，果真尷尬。

15號劉曉智拎住隻牛蛙慘過捧

住計時炸彈

17號潘佳星最鎮定，可以同

隻蜥蜴擺個靚pose!

11號權蕙洙真大膽，陳博士都敢嚇!!

Zing光下之港姐

2010-11-10T09:55:00.000+08:00

被喻為星級化粧師既Zing日前推出新書及慈善攝影展"The Most Beautiful Women in Hong Kong wear Zing"，多位殿堂級女星如王菲、劉嘉玲、及舒淇等均俾面出席其酒會中。講到Most Beautiful Women in HK，當然唔少得一些經典港姐，而Zing的影展中亦有3位港姐成為他的模特兒，透過獨特化粧將她們的美艷表現出來。

朱玲玲平時雍容華貴既一面大家見得多，

今次既形象有否為大家帶來驚喜呢?

鍾楚紅一對"青光眼"非常搶喎

電眼美人李美鳳今次沒有誇張既眼部化粧，

但有更誇既「飛碟」招牌髮型

華姐俏俏落幕

2010-11-08T10:33:00.000+08:00

2010年既國際中華小姐終於誕生，由於賽事係非直播關係，所以我都忍足1日唔上網，希望唔好事先知道賽果咁無癮，我又竟然做得到喎，真係服咗自己。

大眾對華姐既關注度接近零，估唔到我都唔係好得去邊，轉播當晚竟然出現邊打麻雀邊觀看的情況，實在是近年收睇港姐/華姐的第一次，呢個選美吸引度去到咁真係令人無話可說。

今年華姐又偏向中國傳古典美形式，由宣傳片以至外景片段均用古裝，我就真係唔多buy，因為一採用呢種方式，多數悶爆。一如所料，整個賽事都係沉悶無奇。賽制以24選12，12選6，6選3，然後宣布冠亞季方法，其實每次篩選後都冇乜特別比賽環節 (除第一次外)，真係無謂搞咁多野，港姐時已經係咁啦! 而且宣布時對疊兩組的佳麗，高下立見，刺激性可謂大減。

12強名單 (依宣布時序):
18 張慧雯 (多倫多)
10 王美艷 (墨爾本)
19 岑麗香 (溫哥華)
16 陸曼 (悉尼)
6 陳庭欣 (香港)
22 劉婕 (河南)
2 陳心慰 (阿姆斯特丹)
12 張聖女 (紐約)
7 陳美妤 (吉隆坡)
11 陳美詩 (蒙特利爾)
5 白鷺 (佛山)
1 張滿 (奧克蘭)

之後到問答環節，其實各佳麗答問題都幾得體，冇乜邊個出事，當然亦唔會有什麼爆笑驚人語錄啦!

最後六強:
18, 7, 1, 6, 19, 5

最後三強:
18, 7, 19

大家有冇發現，每次淘汰都係叫18號出黎先架呢? 係咪因為佢係大熱，叫咗佢先咁之後既宣布會更緊張呢?

一宣布三強後，便立即宣布季軍，都話每次淘汰都叫18號先，今次都唔例外，所以季軍就係18號既張慧雯喇!

季軍: 18號張慧雯 (多倫多)

台上只剩兩強7&19，首先兩位佳麗拉票，7號陳美妤講得係唔錯既，但略嫌太rehearsed同好"行"，穩穩陣陣咁囉。反而19號岑麗香夠真情流露，又話自己當初選美俾人潑冷水話佢廣東話唔掂，但用咗一年時間係咁學廣東話，仲喊住口叫所有女仔唔好放棄自己既夢想，我睇到都好感動，亦都覺得評判會選呢啲女仔! 最後各評判以投票方式選出冠軍，成個過程有啲似抄Miss Astro Chinese 2009咁，而當年陳美妤亦都係參賽者，唔知呢個票選方式係咪佢提議俾TVB架呢?

當然一如所料，岑麗香以4票對1票，擊敗陳美妤登上2010國際中華小姐寶座!

亞軍: 7號陳美妤 (吉隆坡)

冠軍: 19號岑麗香 (溫哥華)

2010國際中華小姐三甲

TVB"大搞"既華姐今晚舉行

2010-11-05T14:38:00.000+08:00

大家可能會問，港乜姐近來是否好懶，所以冇乜心機update一下今年國際中華小姐既新聞呢? 其實絕非係咁，我不之幾想知道華姐消息，可惜今年TVB口口聲聲大搞既華姐，竟然落得接近零新聞既收場，絕對係對一眾選美粉絲大失所望! 如果唔係今日各大報章"係咁易"提下，我想應該全香港市民都唔會知華姐會今晚在天津選，到明日才在TVB播喇! 唉，好心TVB無謂再丟人現眼，平平淡淡選咗華姐，冇人會話你架，衰就衰在雷聲大雨點小，做唔到既野唔好下巴輕輕啦!

雖然係咁，這個選美我就點都會睇架喇，情意結嘛。但因為今年新聞奇少，所以對很多佳麗都印象不深，而到現在為止甚至未聽過她們說話的聲線及語氣，感覺猶如80年代選港姐，因當年很少賽前特輯，所以多數在準決賽前才有機會聽到佢地把聲，好鬼好笑。

今年24位佳麗，其實質素比過去幾屆稍低，冇乜邊個特別跑出，換句話說其實今年會幾competitive，選到邊個都唔奇，不過呢輯官方相亦繼續反映TVB求乸其既態度，點解可以用咁casual既styling做官方相架呢，啲makeup又唔得，衰過讀中學啲yearbook畢業相呀!

另外我好想問，究竟天津電視台星期六係咪台慶或者要播放領導人特輯，所以逼不得已華姐一定要星期五晚搞，然後星期六才在香港轉播呢? Anyway，final rehearsal今日都上哂報紙，明日惟有忍住唔好睇報紙報導賽果，等夜晚睇show有一點「懸念」啦! (學大陸網友的說)

5號白鷺(佛山)奪第一個獎，咩獎?

咁大隻字響backdrop都睇到啦

6號陳庭欣(香港)、18號張慧雯(多倫多)、19號岑麗香(溫哥華)

並列為"樣好佳麗"，多謝哂!

10號王美艷(墨爾本)上圍逼爆，

咦原來腰圍都唔差!

陳倩揚選美路與眾不同，明明係港姐亞軍，又要選世姐

又要選華姐，做足Acting冠軍大半年，而家無啦啦又做

接近兩年華姐亞軍兼友誼小姐! 好喇，今晚終於可以卸任，

officially脫離"現任選美titleholder"之列!

問我有咩心水? 真係冇乜印象喎，就咁睇18號多倫多啦，21號李曼姿都ok既，唔好咁遊魂就得。咦評判有康泰老總黃士心喎，咁揀埋香港陳庭欣啦，佢揀Toby做旅遊大使架嘛，又同佢個仔咁熟，實要省靚個招牌既!

亞姐雲集香港

2010-11-03T10:41:00.001+08:00

那邊廂TVB所謂大搞的國際中華小姐雖然今個星期六選(有說當地星期五會選，星期六才在香港播)，但竟然接近一個星期零新聞，唔通一班華姐只顧閉門綵排，冇乜外景宣傳活動?

ATV的亞洲小姐卻在港進行得如火如荼，除本地六位佳麗外，ATV昨亦陸續宣布海外入圍佳麗，中包括澳洲、日本、越南等地佳麗。昨日她們一行13人到保齡球賽切磋球藝，來自澳洲的7號娜培妮亞卡娜斯娃(唔知係咪俄羅斯移民當地?)因身材出眾而成眾人焦點，她坦言已有男友，亦從無考慮過會跟中國男仔拍拖。而來自日本的10號川島聖良則表示不會因為中日釣魚台主權爭拗而擔心人生安全，最緊要係參選可以挑戰自己喎。

7號澳洲佳麗為模特兒，但個名

可唔可以譯短啲，譯個姓咪得囉

10號日本小姐原來係法日混血兒喎，

唔怪得個樣鬼鬼地啦

7位海外佳麗，澳洲唔係好高咋喎

亞姐港澳特區六強鬼祟選出

2010-10-26T23:38:00.000+08:00

今晚得閒無事在網上瀏灠一下選美新聞，赫然發現原來亞姐港澳特區今日已在亞視大埔總台選出六強，多次缺席亞姐活動既13號Barbie廖祉甯今日有「蒲頭」，可惜幸運之城沒有眷顧佢，六強不入，大熱倒灶!

是次亞姐選拔模式猶如五六十年代在麗池花園選香港小姐一樣，簡陋得很，只是自選泳裝見評判，然後換上便服等待宣布! 評判團包括幾位前亞姐，包括黎燕珊、羅霖、羅麗莎等，而入圍六強名單如下：

4號祁翼、5號萬嘉麗、6號李瑩瑩

9號陳明月、10號何婭、12號閔蘭

而一向以講野九唔搭八出位既Barbie姐卻無緣入決賽，有指她得悉被淘汰後扁咀黑面，而被問到落選後有否結婚打算時，卻突然淚如雨下，變臉速度令人驚奇!

唔知Barbie姐下次再有咩搞作呢?

原來Barbie只有5'3.5"高，不過身材幾好

入圍六強將會聯同亞洲其他城市14位佳麗共20位一同爭奪2010亞洲小姐后冠。

王卉霖變講股阿姐

2010-10-22T11:25:00.000+08:00

今日在Facebook閒逛，見到有個關於耀才財經網既Page，近日頗為留意金魚缸既我諗住click入去睇下有乜野貼士，赫然發現原來該證券行有個專屬既財經Channel，而當中主播更加熟口熟面，原來佢係 ------> 07港姐8強6號王卉霖 (即99港姐3號王啟翎個妹)! 3年冇見既王卉霖個樣成熟不少，可能顧及個專業形象卦，不過都好開心見到佢可以在其他領域發展，唔洗留在TVB做四五線藝員!

其實如果當年佢8強時問題答得好啲，會唔會擊退趙嘉迪或黃智雯入5強呢?