轉移陣地

大家好!!

港乜姐承蒙大家厚愛，能捱到今時今日真係多謝一直以黎既支持!

不過因為公事繁忙，已無更新一年。間唔中都有網友提到港乜姐，又或留言鼓勵，真係好感謝!

其實我都好想繼續同大家傾下選美野，奈何時間有限，而每次更新一篇文章亦需時，有網友提議不如去Facebook搞個page，一來更新較簡單，二來易於網友互動，可謂一舉兩得。

所以我決定將陣地搬去Facebook，新網址為http://www.facebook.com/missmuthk ，繼續八吓城中熱門選美news!

嗰邊見喇，byebye!

港乜姐版主 - TT

2012港姐真的令你大開眼界

2012年第40屆港姐選咗10日喇，大家睇啲港姐新聞睇到厭未呢?  不過既然果兩部車都名車有主，相信呢次港姐鬧劇又會告一段落喇!

其實如果唔係今次咁，我都唔知原來普羅大眾仲會某程度上關注港姐選舉，當然大家出發點未必係關港姐本身，但起碼都會你一句我一句"我覺得冠軍唔係呢個喎"、"點解湯洛雯唔入先?"等等，即係咁，有得俾人彈都總好過完全俾人ignore，原來港姐都未致於淪落到完全冇人理，話之你。

睇完成個騷，有幾點想講：

1. 對於我呢個傳統選美粉絲，咁既選美方式當然完全唔收貨啦，試諗下如果完全冇字幕俾外國人睇，佢地會唔會知道呢個係一個選美呢?  又食野又深情對話咁。  但呢，我見有朋友覺得咁樣既環節有新意，冇只係行catwalk咁悶喎，咁呢啲就真係百貨百客喇，對我黎講睇住佳麗行catwalk比賽我已經覺得好緊張刺激喇....

2. Interview環節多過鬼，一開場每個明星問啲野，泳裝又問，食野又問，仲要黎個6強深情對話，洗唔洗咁多口水呀 (最敝冇乜邊個講野特別outstanding喎，包括一眾男藝員)

3. 6強後終於有"比賽環節"先選出3甲，打破以往淘汰完一輪後冇任何環節又再淘汰，算抵讚!

4. 成個舞台及周邊飾物雖睇得出有擺心機整，但效果幾俗下，而且成個scope真係冇得同紅館比，最慘TVB已放口風日後所有大型節目都會用呢個新既錄影廠搞，即係港姐冇乜機會再在紅館搞

5. Karen Chan真係好鍾意有毛既野

6. 既然每位佳麗都有既定出場次序，點解唔俾返個號碼佢地? 咁以後姓歐姓陳嗰啲咪多數要排頭出場?  好唔fair喎

7. 都係嗰句，我始終都唔係好唔得all-back頭，任憑你整得幾好，感覺都老咗好多，放頭髮落黎又後生又自然，而且配合catwalk頭髮既擺動都可增加charming感架，點解唔做多啲?  最少泳裝呢part應該放返頭髮啦! 

左起: 亞軍黃心穎 冠軍張名雅 季軍朱千雪

 

岑杏賢奪最上鏡小姐

 

張名雅成國際親善小姐得主

 

 

各佳麗點評：

 

 

冠軍 張名雅

由頭到尾都唔係幾得佢，當晚個樣更加唔算Pleasant添，真係感覺問題，

有時感覺唔好真係做乜都覺得唔順眼。但呢之後送名車環節佢地

3個去得獎家庭送車匙，又影得佢超靚喎，幾charming添

 

亞軍 黃心穎

真係唔明點解可以得亞軍，大家睇返嗰29位佳麗片段，其實好多

點睇都好過佢喎，而家仲俾佢拎埋亞軍，憑咩呢真係? 談吐? 好多

都係咁上下啦! 身高? 得5'4"咪玩啦! 樣貌? ......................

 

季軍 朱千雪

民選港姐冠軍，其實我一早都有提佢某程度似鍾沛枝嗰type，佢

講樣唔算靚爆，但有嗰種親和力同觀眾緣，更大程度

係啲觀眾唔Like張名雅。

 

六強 張鈞美

由最初不被看好到殺入六強，Amy算超額完成啦，我幾

鍾意佢說話時的attitude，俾人感覺誠懇舒服

 

六強 岑杏賢

很多人應該覺得佢拎最上鏡小姐比起拎冠軍更冇說服力，班

前港姐係咪選緊自己心目中冠軍咋? 但佢台上啲shot比起平時係

亮麗咗喎，不過成個感覺好悶好呆板，諗諗下唔入3甲都合理

 

六強 湯洛雯

本屆輸得最慘既佳麗，佢響個台係爭咁啲神采，但本身既好

條件係咪真係彌補唔到到連一個獎都拎唔到?

 

陳潔玲

亳無期望下得少少驚喜，佢晚裝出場嗰刻幾靚喎，

抹走苦情味

 

林泳淘

努力表現自己，可惜仍然徒勞無功

 

李渼琦

本應是最上鏡小姐大熱，但始終都係以遊魂狀態

出場，加上幾fleshy身型，真係點幫得你落喎

 

曾明俐

如有最佳泳衣演譯獎，應該佢得啦! 台上個樣

appeal唔到啲觀眾，而且談吐有啲出事，

可能緊張啦

 

民選港姐朱千雪: 我想捏死你呀，俾返個后冠黎呀

張名雅: 唉也救命呀，唔關我事架

黃心穎串咀腔: 啱喇，捏死佢啦

(純粹惡搞對白)

 

 

另外，Bloggers' Choice 2012已經計好分喇，大家密切留意葉FUN報道!!!

 

 

全城X爆 TVB!!!!

咁既賽果，咁既投票機制!!  我個Facebook啲人洗版喪鬧洗到而家呀!!!!  

全城X爆TVB呀!  還我選舉權，還我架車，還我民意港姐!!!!

久違了的86年李美珊呀！

仲有向海嵐同歐陽妙芝呀！

無聲無氣既40周年香港小姐

選咗足足三個月既第40屆香港小姐終於聽晚做決賽喇! 老老實實講大家見港乜姐update up到咁都知我其實對今屆競選既失望又提不起興趣!  點解?  我諗大家都有眼見卦.....

先唔好講質素，只係講成個競選過程，都要大巴摑啦下嘛..! 要搞到所謂殘忍淘汰賽，fine，咁你都要俾人feel到係殘忍先得架?  無啦啦睇報紙又話foul咗兩個，又無啦啦要揀多一個入去決賽，一時又話復活失敗，其實廣大市民有邊幾個真係會留意到又care架呢?  就連一個正正式式既淘汰特輯都唔能夠響一條免費頻道播放，就知道TVB有幾重視呢個比賽啦!

開頭話有成29位候選佳麗，其實我都幾興奮架，以為TVB今年肯揼本，點知原來選得3日亳無表現機會下先篩三份一，跟住又話安排佢地訓練做主持，唔好恰我冇跟娛樂新聞台，係有promo過一個星期，而家啲人呢? 仲話搵佢地訪問返啲入圍佳麗，我諗度呢條橋既人自己都應該唔記得有件咁事囉!   好喇篩篩下一時又話剩14個入決賽， 一時又話剩12個，話視乎質素而定喎，咁而家得10個入，即係TVB你都覺得質素好不濟咁話喇係咪?  本來有29個，搞搞下原來得10個，同09年一樣，真係好把X!!

回顧歷年Decade紀念，今年真係差到不得了，82年第十屆梁韻蕊有個紀念心口針，92年第二十屆都做個"群芳競妍廿載情"加有個"二十周年金輝大獎"送俾盧淑儀，02年林敏俐雖然冇特別獎，但TVB搵楊千嬅唱首新既港姐歌加請咗一大批前港姐做個特輯! 今年??  冇!  話會請歷屆39位港姐出席喎，最後咪又係請得15位做最上鏡小姐評判咁大把囉! 其他表演嘉賓更加欠奉!

今年另一大敗筆係佳麗不設號碼，本來都唔係好大big deal，但今年咁多淘汰，而且會由觀眾1人1票選港姐冠軍，號碼係最好既方法讓觀眾加深對佳麗既記憶，點解唔assign返個號碼俾佢地呢?

好喇我要鬧既鬧完喇，講返今屆既佳麗，其實突出既唔算多，不過又勝在冇乜邊個好嚇人，總括黎講又係competitively plain嗰隻囉，到呢個階段邊個都有機會入三甲，今次各位佳麗真係要睇臨場狀態，要穩穩陣陣唔好好似劉翔咁臨場撻Q呀!

陳潔玲 Christy Chan

24 5'5" 模特兒

首批被傳媒關注既「人微妍希」，我成日諗如果"那些年"今年先上，

傳媒會唔會咁關注佢呢? 我一直都唔多buy佢，佢唔係唔靚，但係個樣

好苦咁，好似背負好多鮮為人知既經歷黎參選咁，泰國個特輯見

佢做sit up就黎斷氣咁都戥佢慘!

張名雅 Carat Cheung

24 5'4" 學生

航空大使獎

挾「溫亞」之銜加張堅庭親戚再戰港姐，張小姐爆冷地過五關斬

六將兼以第二名資格入圍10強，令人嘖嘖稱奇。被指似戴夢夢

既佢樣貌身高本來就無甚睇頭，不過近呢個禮拜狀態提升加上有

啲觀眾緣，入三甲都唔係冇機!

張鈞美 Amy Cheung

22 5'5.5" 學生

當大部份網民都話會投王舒銳入最後十強之際，偏偏殺入張鈞美，

令人質疑TVB既投票機制只係做騷咁做(咁其實投3甲會唔會都係咁，

一早內定呢?)! 不過就咁，我覺得張鈞美係幾唔錯既選擇，

雖則大餅面未必一下就吸引到人，但佢談吐溫婉，有紋有路，

評判應該幾buy佢

朱千雪 Tracy Chu

24 5'5.5" 行政助理

由開始素顏look被指似外傭，到今日報章話佢狀態唔錯，朱千雪可

謂係越戰越勇! Tracy唔算係宅男嗰啲一味大眼大波就係靚嗰啲，

佢成個款係幾有性格，幾有自己主見啲大都會女性咁。我相信

聽晚TVB Fun應該有佢俾觀眾揀!

林泳淘 Wingto Lam

22 5'7" 模特兒

表情談吐都甚為MK，擺到明入唔到娛樂圈唔心息，我諗佢都

知TVB從來唔buy呢種入到港姐三甲，佢大可以收拾心情做好

場騷然後去試鏡啦

李渼琦 Melanie McAndrew

20 5'6" 學生

我成日覺得佢可以再靚啲，不過佢對著鏡頭唔自然，一開聲更加

唔得，成日含住粒核講野咁，呢啲唔關佢中文好唔好既事，總之

成個posture就好唔醒神啦。不過鬼妹仔選港姐一向有啲著數，睇下

佢有冇機贏到最上鏡

岑杏賢 Jennifer Shum

23 5'7" 學生

時尚目光獎

最佳珠寶演譯獎

一路都係我買重既佳麗，樣貌身高學歷談吐舉止都係典型港姐格，

加上零負面新聞，學莫可欣話齋港姐就係要選呢啲乖乖女囉!

 不過佢有時缺乏自信，希望可以加以改善啦!

湯洛雯 Roxanne Tong

25 5'7.5" 模特兒

旅遊大使獎

美麗昇華大使

今屆既「新聞佳麗」，撇除佢係湯鎮宗嗰女既身份，憑其硬件其實

都有力成為熱門。不過近期狀態十分飄忽，倦容頻現，小心俾其

他佳麗迎頭趕上呀。

曾明俐 Cynthia Tsang

26 5'6" 機艙服務員

亮相時被指貌似蕭亞軒，估唔到呢啲走性格樣既佳麗可以首名直入

決賽! 不過個樣係有少少「邪牌格」，唔知啲觀眾buy唔buy呢?

黃心穎 Jacqueline Wong

23 5'4" 學生

全場最唔知點解會入到10名既佳麗，樣貌身高都欠奉，夾硬講係笑

得甜囉。不過好多網友貼佢有季軍相，我都唔知講咩好

響度透露一下自己心水，聽晚睇下中唔中：

冠軍: 岑杏賢

亞軍: 朱千雪

季軍: 曾明俐

國際親善小姐: 曾明俐

最上鏡小姐: 李渼琦

最後1位入選佳麗係張鈞美喎

點解唔係王舒銳先?  

最後9強名單

陳潔玲
張名雅
朱千雪
林泳淘
李渼琦
岑杏賢
湯洛雯
曾明俐
黃心穎

最後一位佳麗會係邊個呢?  陳華鑫同鍾麗又可唔可以復活呢? (其實復活咗又點?)

要密切期待!

5號鍾麗及13號陳華鑫被Foul了!

聽說是以互相淘汰形式被Foul的，其實咁做有咩意義呢?

再多4位佳麗證實被out

分別是
3號 楊斯雅
21號 曾建怡
23號 王潔心
26號 梁靜怡


哎也，呢幾個都幾靚架喎，咁快被out真慘!

9位被淘汰佳麗係

等看直播中，會立即更新!

3號可以留低!!!
13號可以留低!!!
8號可以留低!!!
17號可以留低!!!
28號可以留低!!!
29號可以留低!!!
22號可以留低!!!
21號可以留低!!!
24號可以留低!!!
27號可以留低!!!
11號可以留低!!!
26號可以留低!!!
25號可以留低!!!
6號可以留低!!!
19號可以留低!!!
4號可以留低!!!
12號可以留低!!!
5號可以留低!!!
7號可以留低!!!
23號可以留低!!!

被淘汰的9位佳麗係：

1. 10號
2. 2號
3. 14號
4. 15號
5. 20號
6. 9號
7. 1號
8. 18號
9. 16號