2010-03-31

Ricky Martin又關港姐事?

今日外國娛樂新聞頭條,絕對係Ricky Martin親證自己係gay呢單料!  不過呢單料唔算爆,因為不論直人攣人,一早都認定佢係gay,只係爭在佢認唔認架啫.....

其實Ricky Martin都同港姐有少少淵源,因為佢喺2003年港姐歷史最後一次既準決賽裡面,負責頒"完美組合獎",得獎組別係演戲既百變伊人組。
Ricky Martin以國際巨星身份肯出席電視城舉行既港姐
"準"決賽,都算係咁。圖為百變伊人組組員左起2號曹敏莉、
9號林艾瑩、15號陳容梅、17號李嘉怡(組長)、19號區婉澄,
五個最後都入決賽喎。
"咁啱線"其實今日曹敏莉都有新聞,係響上水某
商場同胡杏兒&李毓芬宣傳花卉展。

2010-03-30

艷光閃爍顯才華

昨日開了一個題目問大家關於13號的才藝小姐,可能問得唔太好,以致各位誤以為我計埋「最具演藝潛質獎」,不過這也難怪,因為其中一位得獎佳麗郭可盈都係13號喎。

以TVB舉辦的港姐來計,要到86年才有首位才藝(又稱才華)小姐出現。當年無記更以「艷光閃爍顯才華」為口號,標榜會誕生一位才華小姐,而當屆決賽14位佳麗亦分成3組,以唱歌、舞蹈、及演戲來爭奪「才華小姐」獎項。亦因為方便決賽佳麗排練有關才藝項目,TVB亦將以往港姐準決賽及決賽只相隔一星期的慣例,延長至兩星期,果然非常重視!

而首位奪得此項殊榮既就係當年大熱13號吳婉芳,她除成為"歷史性"首位才華小姐外,亦兼得最上鏡小姐及亞軍,成為首位連中三元既港姐!  May都算係港姐史上一個重要經典呀!
吳婉芳憑一首"長夜My Love Good Night"贏得全場
拍爛手掌,奪獎實至名歸。
 
吳婉芳其後加入樂壇,成績不俗,90年推出首張唱片,並囊
括各大傳媒主要新人獎,包括叱咤樂壇生力軍女歌手金獎,
"准我離開吧"、"煙花雪"、"難言再見"均為其首本名曲。May
其後退出樂壇,下嫁胡家驊做胡寶星新抱,做其少奶奶。
近排開左間麵包舖過下日晨。

事隔10年,無線再設Miss Talent獎項,今次取名「才藝小姐」,是次才藝項目分位四項,有演戲、唱歌、舞蹈、及口才。最後由當屆冠軍13號李珊珊以作狀表情演譯秀姑一幕戲奪得此獎。
李珊珊準決賽已經拎咗才藝小姐、最上鏡小姐、及
最受傳媒歡迎獎,真係由頭帶到尾

李珊珊之後星途實屬麻麻,以演戲奪獎既佢,拍TVB劇集時非常生硬,全無演技可言,一味嘟起個咀既表情更嚇怕唔少觀眾,故不久已甚少演出機會,其後憑與錢嘉樂一段情叫做 keep住見報。與錢分手後一直游手好閒,間唔中有明星足球隊新聞或一些廣告中見到佢,不過似乎佢幾enjoy做其紙上明星。

講到Talent,李珊珊既語言Talent就肯定零蛋,不過佢選環姐Interview環節有8.96分喎,令人嘖嘖稱奇!


到2002年,港姐又增設同類型獎項「卓越才藝小姐」,形式跟96年差唔多,最後得主為13號蔡潔雯,她以一身很有女人味既勁舞演譯蘇永康既「眉來眼去」奪得此獎。
Rubyanne沒有參與幕前演出,09年港姐招募時
曾出現過,現職為空姐

03年才藝小姐得主為18號既李詩韻,佢跳既中國舞散發古典美,但略嫌平凡,得獎算有少少爆冷。今年既才藝項目取消口才,改為功夫,要一眾佳麗粗魯對打又嗌又劈咁,實屬不雅。李詩韻雖以舞蹈奪獎,但演技不俗,惟欠上位機會,常徘徊二線中至尾角色,Selina加油呀!
李詩韻準決賽時爆冷奪最上鏡小姐及才華小姐,
在決賽時再下一城爆冷五強不入,真係Miss Pao Noun!

好喇,最後一位既13號才藝小姐係邊個呢?  呢個其實唔係好多人知 (亦冇乜人care),佢就係2006年既冠軍13號陳茵媺喇!  當年呢個獎係在某商場內頒發,各佳麗表現自己既專長 (冇限制),並由現場觀眾投票選出,結果由表演鋼琴既Aimee奪得!   嘩...... 唔好噓我呀!!
陳茵媺暫時演藝事業頗平坦,在「畢打自己人」中表現
備受讚賞,剪了一頭短髮既佢常飾演警花,得閒問下
陳鳳芝攞D意見囉!


2010-03-29

要叫李詩韻做李老闆

2003最上鏡小姐兼才藝小姐李詩韻,早排返多倫多修畢因之前選港姐而未能完成之大學課程,而近日亦修讀國際認可既化粧及美容證書課程。Selina透露會斥資80萬開化妝專門店,而店舖亦裝修緊。佢話今次首次做老闆娘事事親力親為,又飛去日本同美國等地攞貨,而其好友胡定欣亦自薦做免費代言人,今次Selina可謂慳番一筆。

李詩韻當年憑跳舞贏得才藝小姐,估唔到佢真正Talent係美容喎。
歷年港姐頒發關於才藝既獎項有5次,其中4次都係由當年13號佳麗
奪得,得李詩韻唔係咋 (佢係18號)!  咁大家又記唔記得其他4位係邊個?
(提示: 其中一年唔係台上頒發)

2010-03-26

乜咁經典:翁杏蘭勁舞@國姐

時為1990年,港姐亞軍翁杏蘭代表香港參加國際小姐,以港姐semi-final著過既泳裝出場,同場加插疑似抄襲港姐final環節"形格大挑戰"既甫士!

值得一提係大家可以睇睇佢之後嗰位冰島小姐,木口木面做早操咁,生硬舞姿衰過89年黃慧儀!

可跳至3.11分直接欣賞。

多倫多小姐來港發展

2005多倫多華裔小姐兼2006國際華裔小姐前五名的倪晨曦(Elva Ni),昨日出席宣傳活動時表示已簽約香港模特兒公司,決定留港發展及以林志玲為目標。問到會否學周秀娜般推出性感寫真集,她說:「公司計劃緊,但想以健康為主,去得太盡自己都覺得尷尬。」

她亦否認被黃宗澤力追:「我08年識佢,佢好nice,但我冇佢電話。」她亦坦言不認識黃緋聞女友胡杏兒:「我聽過佢個名,但唔知佢個樣係點!」。

乜胡杏兒響多倫多賣埠D劇唔得咩?  寶發得幫下佢手催谷下啦 (話時話而家個代理商仲係咪叫寶發得?)
黎得香港發展,真係要認識下d行家先得呀
Elva選多華姐時泳衣照,呢件泳衣真係堪稱史上最肉酸,
原來Karen Chan都未算最惡劣
2006年華姐5強,質素幾強架

2010-03-25

陳沛嘉老公跟中女搭上

93澳姐季軍,現任名模陳沛嘉(原名陳敬密),其老公前TVB藝員彭文堅被影到早前跟中女在街頭打得火熱,疑似偷食。日前記者就此事採訪陳沛嘉時,其態度迴避,揚言要睇過相先可回應。當記者遞上相片時,她卻一個箭步入馬會會所。昨日記者致電陳時說:「唔係娛樂新聞毋須了解,我冇野,好開心,多謝大家!」。
呢張相真係水洗都唔清
我真係冇野喎,我ok喎,我頂得住!

陳沛嘉本為1993年澳門小姐季軍,94年代表澳門參加國際華裔小姐,打入前十名,同年冠軍為曼谷的沈玉翎,而香港代表則為莫可欣。而其夫彭文堅,87年參加超級新星大賽奪獎入行,另一得獎者為梁佩玲(現名梁藝齡),其代表作為書劍恩仇錄。二人09年1月結婚,彭現職金融界,發過豬頭,而陳亦繼續其模特兒事業,不時傳出跟其他模特兒不和及講人是非,近一兩年人氣急跌。
真係發過豬頭架!
陳敬密參選華姐時官方照,編號19
彭文堅代表作

2010-03-23

TVB放寬參選資格圖救港姐

等到頸都長既《2010香港小姐競選》終於開始喇,打頭炮當然係海外招募。昨日01冠軍楊思琦及08哎也冠軍陳倩揚聯同應屆五位港姐劉倩婷、李姿敏、熊穎詩、袁嘉敏、及黃嘉麗一同出席呢次記招。今年招募口號為「美麗ID 你同樣可以擁有」。年年招募記招都差唔多,但今年卻有震憾性新招,就係沿用37年既港姐參選機制有重大性突破!

首先,港姐參選年齡不嬲係由17-25歲,但今年卻提升至17-27歲,意味著港姐最大年齡有機會係27歲,完全over哂主要國際性選美既年齡上限!!

第二,持有香港身份證但未有三粒星(即非香港永久性居民身份)亦可參加,但以往需在參加前合共居港滿二年的要求並未提及,不知是否已一併刪除,這又意味著港姐有機會為外籍及完全對香港亳無認識。

第三,現持有模特兒合約的女仔亦可參選,到真正入圍後TVB會"拍心口"幫佢地"擺平"所有合約事宜,好夠照喎!

何麗全指此舉並非抄襲亞視,因為有些亞姐是沒有香港身份證的,而放寬年齡限制亦想希望參選者能夠多點閱歷及工作經驗才來參選。

被問到即將卸任是否唔捨得,劉倩婷例牌大方地說:「點會呀,我當選一刻都知會有呢一日,係時候俾另一班女仔學習喇! (而家有身份證同27歲就可以選喇喎!) 係咪真架? 咁幾好喎,因為有D女仔係想做下野先黎選,可以多D時間準備嘛,而且有身份證當然應該有權來參加啦!」乜原來劉倩婷乜鬼都唔知架??

而宣傳海報5位主角楊思琦、徐子珊、陳茵媺、劉倩婷、及陳倩揚,唯獨Skye唔係冠軍,又惹起記者質疑她再度「頂替」張舒雅,她說:「唔好舊事重提咯,我只係代表2008年呢屆囉。」而何麗全亦指張舒雅較早曾書面去信通知公司,指她會在其他方面發展。估唔到呢單野講到2010年都仲講,真係..........

我覺得個Logo超靚呀
5位港姐又就快要講ByeBye喇
三位典型唔多高港姐

2010-03-22

驚人號外 ─ 沿用37年既港姐requirement有新制!!

【on.cc專訊】 香港小姐為首次海外招募舉行記者會,劉倩婷、李姿敏等楊思琦等前港姐齊齊出席,無綫高層何麗全表示今屆會有新安排,年齡限制會稍為放鬆,將以往上限25歲上調至28歲以下,有身份證即可參加,毋須香港永久居民,而有模特兒合約在身者亦可以參加,何麗全否認放鬆限制是與近年港姐質素被批評有關,坦言想吸引更多靚女參加。

咁搞法,真係港姐變亞姐,無言..................
 
密切留意明日各大報章點寫....

2010年香港小姐海外招募又開始喇

消息指TVB將於今日(22/3)中午12點在香港日航酒店舉行《2010年度香港小姐海外招募》,出席嘉賓除應屆5位港姐外,仲有楊思琦、陳倩揚、及胡諾言。就記招字面睇,似乎今年海外招募冇預香港先生份喎,唔知係港生今年只係唔搞海外招募,定係索性摺埋佢呢?  有待觀察!!

自從91年開始,無線每年都會在美國、加拿大、甚至澳洲、歐洲等地作海外招募,據當時港姐節目統籌吳雨透露,是因為有感香港再難發掘高質靚女,而轉向海外發掘。此舉初期頗見成效,好似第一年(91年)就已經選出由洛杉磯報名參選既準碩士生郭靄明當冠軍。其後很多大家熟悉既其實都係海外佳麗黎架。不過近幾年,海外佳麗質素甚為普通,反而本地薑抬頭,很多時海外佳麗風頭都被蓋過。一眾港姐Fans亦開始質疑是否仍需有海外招募呢個咁花錢又冇乜成效既「政策」存在。最經典莫過於08年,一眾本地佳麗質素甚為OK,唯獨是因為海外佳麗名額有兩個,所以連質素非常不濟既10號史苑殷都有幸入圍。其實以史小姐既質素,真係連本地港姐面試實錄落選嗰D都不如呀!

好,同大家介紹下歷年部份海外佳麗:

1991 郭靄明 (洛杉磯) ─ 冠軍/國際親小姐/談吐幽默獎

1992 劉殷伶 (三藩市) ─ 亞軍/國際親善小姐

1992 李思林&李秋林 (美國) ─ 李玟兩位家姐

1994 陳芷菁 (多倫多) ─ 12強止步,賽前國際親善小姐呼聲最高

1995 楊婉儀 (洛杉磯) ─ 冠軍/標準體態獎

1997 翁嘉穗 (溫哥華) ─ 冠軍/最上鏡小姐/都會魅力大獎/東方美態大獎

1998 向海嵐 (溫哥華) ─ 冠軍/最上鏡小姐/環球美態大獎/動感都會大使

1999 郭羨妮 (溫哥華) ─ 冠軍/最上鏡小姐/國際親善小姐/千禧才智小姐

2000年海外佳麗成績最佳,三甲人選全部均屬海外佳麗所有
劉慧蘊 (溫哥華) ─ 冠軍/最上鏡小姐/國際親善小姐/最具新世紀風采小姐
簡佩堅 (多倫多) ─ 亞軍
劉嘉慧 (悉尼) ─ 季軍

02 林敏俐 (三藩市) ─ 冠軍/國際親善小姐/新世代美態小姐

02 嘉碧儀 (鳳凰城) ─ 最上鏡小姐加一大堆立立雜雜獎

02 鐘子淇 (洛杉磯) ─ 五強,現名鐘天慧,得台灣超偶2第7名後在台灣發展

03 曹敏莉 (三藩市) ─ 冠軍/國際親善小姐/芙蓉美態小姐

03 楊洛婷 (溫哥華) ─ 亞軍

04 朱慧敏 (西雅圖) ─ 亞軍

05年可謂海外佳麗由盛轉衰既一年,當屆本地佳麗質素甚強,而五位海外佳麗甫一出場已令人眼鏡大跌,最終所有佳麗最強都係10強止步,其後數年海外佳麗都越整越衰,好把鬼。

06 周家蔚 (多倫多) ─ 亞軍/最上鏡小姐

07 張嘉兒 (溫哥華) ─ 冠軍

09 李姿敏 (紐約) & 熊穎詩 (溫哥華) ─ 亞軍 & 季軍

相片鳴謝Johnny's Pageant Page提供

2010-03-19

一年一度港姐人比花嬌攝影比賽又嚟喇

《2010年香港花卉展覽攝影比賽》又舉行喇,唔知邊年開始TVB都會同康文署合辦「TVB藝員及香港小姐造像」攝影比賽,美其名"借出"美女給一眾龍友作模特兒,實則都係一個宣傳機會。不過TVB都唔算求其,每年都會為眾港姐設計特別造形,如日本和服或西洋宮廷服等,令比賽作品不致於太過單調。

今年主角之一當然係應屆冠軍劉倩婷,一襲紫紅低胸晚裝甚為搶鏡,而個人覺得黃嘉麗的一身印度西施服裝亦頗特別,而陳爽拎既把遮就有翻炒之嫌。近排電視台貪污新聞傳得鬧哄哄,而Sandy屋企係開茶餐廳,被問到有否送coupon俾高層,Sandy說:「茶餐都係40蚊,成日叫人幫襯,無任歡迎。」而陳爽被問到TVB係咪分黨分派,佢反應甚大說:「吓?  係咩...  如果有,我都係中華小姐派架咋!」
嘩40蚊一個茶餐,原來劉小姐屋企間茶餐廳係走翠華高檔路線
恭喜李綺雯(右二)連續第X年參加是次盛會

係時候重溫近幾年花卉展各港姐既美態

2009冇咗張舒雅,變咗高海寧企中間,怪
2008雖然Kayi被嘲豬港姐,但係佢甫士多多架一d都唔交行貨
2007陳茵媺呢張相仲得到公開組冠軍添
2006葉翠翠呢個look真係不敢恭維喇
2005徐子珊堂眉想點

2010-03-15

99港姐湯詠珊捲入陳志雲貪污風波

近期全城最爆話題莫過於TVB總經理陳志雲及一眾高層捲入ICAC調查的貪污案,當中竟然涉及99落選港姐湯詠珊,報道指湯是陳助手叢培昆任主席的思潮教育裡的董事,而文中亦提及郭羨妮及胡杏兒均是當屆港姐,都有交足功課喎。

報道全文如下:

【本報訊】陳志雲與其私人助理叢培崑昨日分別被廉署拘捕。陳志雲除了在無綫任職,他出任董事的公司,主要亦是無綫轄下的子公司。但叢培崑名下的一間公司,登記地址是陳志雲位於何文田亞皆老街的寓所。叢培崑任主席的思潮集團,曾接辦多個娛樂圈活動。


公司註冊處資料顯示,陳志雲出任 18間公司董事,其中絕大部份間是無綫的子公司。以他私人名義登記的只有 Commonland有限公司,持有亞皆老街雅麗居寓所。 06年起任陳志雲私人助理的叢培崑,名下則有六間公司,其中一間名為「訊偉」( Info-empire),登記地址為陳志雲住所,但陳不是董事,叢培崑則以此作登記住址。

稱風水好才用來註冊

陳志雲上月中接受雜誌訪問,講到訊偉以其家作登記地址時,他否認說「邊度係呀?冇可能!」他當時表示叢培崑已不再是其私人助理。叢培崑解釋稱,因陳志雲住所風水好,才用來註冊,訊偉已沒有運作,並稱兩年前已不再任陳的助理。

叢培崑出任一家名為「思潮」( Idea Empire)的集團主席,報稱地址在英屬處女島,無股東資料。集團旗下有四間本港註冊子公司,名為思潮廣告製作、思潮教育學院、思潮娛樂和思潮出版社。叢培崑昨日下午由廉署人員押返其位於旺角彌敦道一商廈的辦公室調查,至傍晚時再被押走,他上午用外套遮面,其後則戴上口罩。

思潮娛樂和思潮教育學院的另一董事,是與郭羨妮胡杏兒同場競逐 99年香港小姐的湯詠珊,她已在去年底請辭;相信是湯的妹妹湯詠頤,則出任思潮出版社的董事。思潮廣告另一董事梁志昌,已於去年 8月辭任,他也是訊偉其中一名註冊董事。

叢培崑名下還有一間名為鴻基投資發展有限公司,持有何文田山道龍柏花園一個高層單位和車位,今年 1月底剛向銀行做了按揭。

製作《志雲飯局》舞台劇

思潮業務多數是娛樂圈相關的公關、宣傳及節目製作,部份項目在澳門舉行,包括歌手曹格上月在澳門舉行的演唱會,以及 08年澳門漁人碼頭仿照無綫節目《美女廚房》的舉行「美女廚坊」活動。思潮去年還為陳志雲製作《志雲飯局》舞台劇,又為陳志雲出版《志雲首選食府》和《志雲情人節首選》等書籍,陳志雲多次擔任思潮活動的嘉賓。

昨日被捕的無綫節目監製錢國偉,據知本來出任 Big Four(許志安、蘇永康、梁漢文及張衞健組成)紅館五場演唱會的監製,但已臨時換人,主辦機構東亞娛樂董事陳志光昨日在演出前的拜神儀式上對記者表示:「錢國偉只係 creative(創作),畀意見。」

另一名被捕的無綫藝員寧進,公司註冊處未見他任公司董事的資料。
 
原文可於此Link睇睇 http://hkreporter.com/talks/viewthread.php?action=printable&tid=886003
 
於99年參選既湯詠珊(圖中),參選編號為13,當屆堪稱質素甚高的一屆,
以湯既質地點都「唔夠人砌」,20強止步可謂理所當然。佢仲正正抽正
冠軍郭羨妮(12號)同季軍胡杏兒(14號)中間,仲有美腿小姐15號王倩,
及5呎7又入圍決賽既11號黃犧蔚同組,真係屋漏兼逢連夜雨呀! 

湯參選時最哄動新聞莫過於被指同「金寶綠水」廣告個菲籍女傭極為相似,
誘發一眾「同鄉」覺得佢甚有親切感而不斷在匯應通投佢一票,
以致其票數一時非常高企!