2010-12-24

聖誕快樂

今日平安夜喇,真係眨下眼又一年,唔知大家今晚又約咗邊個一齊慶祝呢?  我就同往年一樣同一大班排球隊友去隊長屋企開Party,成班柴娃娃食下野玩下遊戲,又過一個聖誕!

原來港乜姐唔驚唔覺又開張咗一年,自從搞咗呢個blog之後其實收穫都唔少,認識咗唔少選美粉絲,又令我更投入follow港姐既news,真係好充實。好抱歉呢排真係少咗update,希望新一年可以投放多啲精神寫好個blog,等世界各地既讀者都可以有第一手港姐消息。

係度祝大家聖誕快樂,美貌與智慧新一年更加進步!


2010-12-22

張舒雅食薯條爆瘡

我其實不嬲都係New York Fries既粉絲,亦有加入其FaceBook裡的Fan Page。尋日睇睇下FB發現呢個專頁竟然post咗張舒雅既相出黎,點解咁奇怪呢?  原來係Edelweiss做咗呢個品牌尖沙咀新店既開幕嘉賓。同場仲有莊思敏同埋浸大E神楊梓瑤,見佢地三個不情不願咁作狀互餵薯條實在好笑,而Edelweiss塊面亦生咗啲瘡,但佢堅稱自己唔keep都咁索喎,哇.... 食少啲薯條啦,冇益架!

三女全無默契地作狀互餵

塊面確係油咗啲!


2010-12-13

莊思明唱歌都OK

唔知大家星期六晚有冇睇東華呢?  呢個一年一度既歲晚壓軸慈善節目已經冇乜藝員以高難度表演作籌款,反而過咗凌晨1點既卡拉之星先至係全晚高潮,因為幾位台柱如薛家燕、魯振順等表現鬼馬,帶起成個氣氛。嗰晚我都有捧場,本來睇到咁夜都想熄電視訓覺,點知見到莊思明都有份唱喎,當然要捧下場啦。莊思明其實把聲都ok,而且台型唔錯,唔知可唔可以在樂壇發展一下呢?

雖然莊思明前晚唱到三點先收工,不過第二日晨咁早又要仆去數碼港為一個長者步行籌款擔任主禮嘉賓,佢仲話好彩有兩位好姊妹做人肉鬧鐘call佢起身咋。

訓得咁少,難怪對眼係"矇"啲既...

2010-12-06

唔知亞姐有冇3點?

大家唔好諗錯隔離,講嗰3點,係講收視!

好老實,我冇睇亞姐,而且後尾先知原來尋晚亞姐唔係live架喎。

不嬲都唔係咩亞姐粉絲,以前還好,亞姐多噱頭,佳麗仍以本地為主,雖然啲橋都係騎呢居多,但勝在好笑,不論ATV以及佳麗本身都搞到成個騷唔少生氣,唔當選美當場笑片睇都好。

但自從04年亞姐翻生後,吸引力大減,雖則佳麗質素有保證,但已變為內地佳麗同鬼妹既爭霸戰,冇哂利智同宮雪花呢啲令人難忘佳麗,冇咗司儀挖苦操鄉音佳麗既對答,冇哂啲絕核問題考智慧既環節。最慘係ATV一邊面想幫亞姐樹立一個殿堂高貴形象,但成個製作又極之意淫低俗,搞到high又唔係,cheap又唔夠抵死好笑,簡直兩頭唔到岸。

上星期TVB播兩套劇大結局,搞到ATV同時段節目慘食零收視。今次亞姐迎戰全城關注既萬千星輝頒獎典禮,收視係點應該聽日會知,不過以我所睇,可能只得兩三點。其實有幾多人知道尋晚選咗亞姐呢?

好,而家報告下賽果先!


冠軍: 18號 王欣
亞軍: 8號 維他芝寶絲娃
季軍: 15號 劉曉智
殿軍: 11號 權潓珠
最上鏡小姐: 8號 維他芝寶絲娃
友誼小姐: 9號 邱淑芬
亞洲魅力女性大獎: 19號 張毅
最完美體態大獎: 2號 何婭
晶瑩美麗肌膚大獎: 3號 萬嘉麗
最完美秀髮大獎: 18號 王欣

佳麗兩個一組,一入圍一淘汰

身高6'1"既泰國佳麗9號邱淑芬拎完「友誼小姐」後
十強不入。呢套泳衣儼如救生衣,肉酸到冇朋友

粉色泳衣系列色彩繽紛,但下身超性感喎

keep住呢個pose做問答,辛苦哂

呢套晚裝咁似糖紙既?

嘩著住泳衣揮"掃",咁似90年代華姐既?







2010-11-30

亞姐驚現爛面佳麗

眨下眼又到11月最後一日喇,明日又到一年最開心的一個月 - 12月。話時話,2010既選美賽事都搞得七七八八,而亞姐決賽亦會於本週日晚(12月5日)舉行!  剛過去的星期日TVB播出「天天天晴」同「義海豪情」既大結局,搞到亞視嗰邊慘食"零收視",情況令人痛心。今個星期到亞姐迎戰TVB既頒獎禮,情況更未許樂觀,不過希望亞姐都有三四點收視,不致於慘過做"神功戲" (做俾鬼睇)啦!

亞姐雖然長期處於劣勢,但有時其騎呢風格亦令人爭唔落,繼早前澳洲佳麗無啦啦退出之後,ATV又有新招,在合肥拍外景時突然加多一位"合肥代表"21號殷媁,其參賽時間只有一星期,實屬謊謬之極! 而各佳麗亦視紀律如無物,港澳賽時"寸咀芭比"已可連缺席活動5次,而到正式競選期間,全體佳麗可以齊人出席的活動亦寥寥可數,就算現在全體佳麗上了合肥拍外景,在昨日泳裝外景拍攝仍可有3位佳麗缺席。風頭躉11號權潓珠話胃痛因病缺席冇得好講,但14號貝安琪同16號何婭萌亦因事缺席,唔通佢地在合肥都有大把人要見,唔得閒參加拍攝?

9號邱淑芬左邊面爛哂,幾多粉都冚唔到

8號維他芝斯寶華骨肉相稱,good fit啦

11號權潓珠到下午晚裝環節先胃痛完現身

21號新血殷媁好多謝亞視俾1個星期佢積極備戰

最後想講下,上星期日同朋友竹戰時,因有朋友愛賭馬,所以轉睇亞視的賽馬節目。ATV宣傳亞姐好落力喎,基本上每個廣告時段都有亞姐消息,但宣傳手法cheap到冇朋友,譬如介紹各佳麗宣傳片時,會加插一四字成語形容佳麗,當中有些十分過火,好似"性感尤物1號xxx"、"名眸女神2號xxx"、"熱情如火3號xxx",而螢幕中佳麗則騷首弄姿亂撥頭髮,感覺猶如深夜宣傳易某夜總會介紹啲女,唉........................... >_<

2010-11-21

失蹤廿年既李美珊蒲頭

86年港姐冠軍李美珊,卸任後立即淡出幕前,佢既新聞亦可謂係零,但近排佢又蒲頭喎,出席大陸江門市節目「群星閃耀江門情」,以江門鶴山客家人身份自我介紹。佢既樣一啲都冇變喎,不過膚色好似黑咗啲。響慧妍既網頁亦見到佢加入咗做會員,唔通諗住返黎發展?







港姐台慶拋胸上頭版

TVB 43週年台慶星期五晚舉行,一眾小生花旦例牌扮到靚靚出席啦。今年難得所有國際性選美都係11月頭之前舉行,所以4位得獎港姐可以歷史性「齊腳」著得靚靚咁出席台慶喎,真係唔記得有幾多年唔係咁咯。

4位港姐當晚以低胸GOWN賀六叔,估唔到咁樣係咁易都可以上到蘋果頭版報頭喎,乜星期五真係冇乜大新聞咩?  當晚陳庭欣同張秀文因為坐在六叔隔離,所以頻頻出鏡,就咁睇狀態唔差喎,不過陳庭欣好鍾意叫六叔揮手,呢個手勢亮燈嗰晚已經頻頻出現,睇黎又要收下喇喎。

係喎,點解冇出爐華姐岑麗香既呢?  唔通又係要等到大年初一先亮相?

4位港姐盛裝加燦爛笑容,唔怪得六叔OK哂啦!

似乎張秀文坐得直啲喎

苟芸慧同呂慧儀玩FING波遊戲時非常狼狽

高海寧條裙上半身好OK喎,但下半身啲花.... 

葉翠翠同周家蔚條GOWN就正常得多

楊秀惠話佢條裙值八千幾蚊喎

2010-11-18

亞視又用小動物搞噱頭

應屆20位亞姐又做宣傳喇,今次亞視照辦煮碗用2001年選女優既技倆,叫參選佳麗玩小動物! 不過今次亞姐好D,唔洗好似當年班女優咁要食麥皮蟲飲曱甴酒,只係需要拎起D蛇呀蛙呀擺下pose影相就得。講真呢啲咁既小動物男人拎起都唔多開胃,何況一班嬌滴滴既細路女,不過一班佳麗嚇到花容失色,聲淚俱下,亞姐又可以再一次衝擊見報率。

18號王欣被蛇尾撩起條裙,果真尷尬。

15號劉曉智拎住隻牛蛙慘過捧
住計時炸彈

17號潘佳星最鎮定,可以同
隻蜥蜴擺個靚pose!

11號權蕙洙真大膽,陳博士都敢嚇!!





2010-11-10

Zing光下之港姐

被喻為星級化粧師既Zing日前推出新書及慈善攝影展"The Most Beautiful Women in Hong Kong wear Zing",多位殿堂級女星如王菲、劉嘉玲、及舒淇等均俾面出席其酒會中。講到Most Beautiful Women in HK,當然唔少得一些經典港姐,而Zing的影展中亦有3位港姐成為他的模特兒,透過獨特化粧將她們的美艷表現出來。

朱玲玲平時雍容華貴既一面大家見得多,
今次既形象有否為大家帶來驚喜呢?

鍾楚紅一對"青光眼"非常搶喎

電眼美人李美鳳今次沒有誇張既眼部化粧,
但有更誇既「飛碟」招牌髮型

2010-11-08

華姐俏俏落幕

2010年既國際中華小姐終於誕生,由於賽事係非直播關係,所以我都忍足1日唔上網,希望唔好事先知道賽果咁無癮,我又竟然做得到喎,真係服咗自己。

大眾對華姐既關注度接近零,估唔到我都唔係好得去邊,轉播當晚竟然出現邊打麻雀邊觀看的情況,實在是近年收睇港姐/華姐的第一次,呢個選美吸引度去到咁真係令人無話可說。

今年華姐又偏向中國傳古典美形式,由宣傳片以至外景片段均用古裝,我就真係唔多buy,因為一採用呢種方式,多數悶爆。一如所料,整個賽事都係沉悶無奇。賽制以24選12,12選6,6選3,然後宣布冠亞季方法,其實每次篩選後都冇乜特別比賽環節 (除第一次外),真係無謂搞咁多野,港姐時已經係咁啦!  而且宣布時對疊兩組的佳麗,高下立見,刺激性可謂大減。

12強名單 (依宣布時序):
18 張慧雯 (多倫多)
10 王美艷 (墨爾本)
19 岑麗香 (溫哥華)
16 陸曼 (悉尼)
6 陳庭欣 (香港)
22 劉婕 (河南)
2 陳心慰 (阿姆斯特丹)
12 張聖女 (紐約)
7 陳美妤 (吉隆坡)
11 陳美詩 (蒙特利爾)
5 白鷺 (佛山)
1 張滿 (奧克蘭)

之後到問答環節,其實各佳麗答問題都幾得體,冇乜邊個出事,當然亦唔會有什麼爆笑驚人語錄啦!

最後六強:
18, 7, 1, 6, 19, 5

最後三強:
18, 7, 19

大家有冇發現,每次淘汰都係叫18號出黎先架呢?  係咪因為佢係大熱,叫咗佢先咁之後既宣布會更緊張呢?

一宣布三強後,便立即宣布季軍,都話每次淘汰都叫18號先,今次都唔例外,所以季軍就係18號既張慧雯喇!

季軍: 18號張慧雯 (多倫多)

台上只剩兩強7&19,首先兩位佳麗拉票,7號陳美妤講得係唔錯既,但略嫌太rehearsed同好"行",穩穩陣陣咁囉。反而19號岑麗香夠真情流露,又話自己當初選美俾人潑冷水話佢廣東話唔掂,但用咗一年時間係咁學廣東話,仲喊住口叫所有女仔唔好放棄自己既夢想,我睇到都好感動,亦都覺得評判會選呢啲女仔!  最後各評判以投票方式選出冠軍,成個過程有啲似抄Miss Astro Chinese 2009咁,而當年陳美妤亦都係參賽者,唔知呢個票選方式係咪佢提議俾TVB架呢?

當然一如所料,岑麗香以4票對1票,擊敗陳美妤登上2010國際中華小姐寶座!

亞軍: 7號 陳美妤 (吉隆坡)

冠軍: 19號 岑麗香 (溫哥華)

2010國際中華小姐三甲

2010-11-05

TVB"大搞"既華姐今晚舉行

大家可能會問,港乜姐近來是否好懶,所以冇乜心機update一下今年國際中華小姐既新聞呢?  其實絕非係咁,我不之幾想知道華姐消息,可惜今年TVB口口聲聲大搞既華姐,竟然落得接近零新聞既收場,絕對係對一眾選美粉絲大失所望!  如果唔係今日各大報章"係咁易"提下,我想應該全香港市民都唔會知華姐會今晚在天津選,到明日才在TVB播喇!  唉,好心TVB無謂再丟人現眼,平平淡淡選咗華姐,冇人會話你架,衰就衰在雷聲大雨點小,做唔到既野唔好下巴輕輕啦!

雖然係咁,這個選美我就點都會睇架喇,情意結嘛。但因為今年新聞奇少,所以對很多佳麗都印象不深,而到現在為止甚至未聽過她們說話的聲線及語氣,感覺猶如80年代選港姐,因當年很少賽前特輯,所以多數在準決賽前才有機會聽到佢地把聲,好鬼好笑。


今年24位佳麗,其實質素比過去幾屆稍低,冇乜邊個特別跑出,換句話說其實今年會幾competitive,選到邊個都唔奇,不過呢輯官方相亦繼續反映TVB求乸其既態度,點解可以用咁casual既styling做官方相架呢,啲makeup又唔得,衰過讀中學啲yearbook畢業相呀!

另外我好想問,究竟天津電視台星期六係咪台慶或者要播放領導人特輯,所以逼不得已華姐一定要星期五晚搞,然後星期六才在香港轉播呢?  Anyway,final rehearsal今日都上哂報紙,明日惟有忍住唔好睇報紙報導賽果,等夜晚睇show有一點「懸念」啦! (學大陸網友的說)

5號白鷺(佛山)奪第一個獎,咩獎?  
咁大隻字響backdrop都睇到啦

6號陳庭欣(香港)、18號張慧雯(多倫多)、19號岑麗香(溫哥華)
並列為"樣好佳麗",多謝哂!

10號王美艷(墨爾本)上圍逼爆,
咦原來腰圍都唔差!

陳倩揚選美路與眾不同,明明係港姐亞軍,又要選世姐
又要選華姐,做足Acting冠軍大半年,而家無啦啦又做
接近兩年華姐亞軍兼友誼小姐!  好喇,今晚終於可以卸任,
officially脫離"現任選美titleholder"之列!

問我有咩心水?  真係冇乜印象喎,就咁睇18號多倫多啦,21號李曼姿都ok既,唔好咁遊魂就得。咦評判有康泰老總黃士心喎,咁揀埋香港陳庭欣啦,佢揀Toby做旅遊大使架嘛,又同佢個仔咁熟,實要省靚個招牌既!

2010-11-03

亞姐雲集香港

那邊廂TVB所謂大搞的國際中華小姐雖然今個星期六選(有說當地星期五會選,星期六才在香港播),但竟然接近一個星期零新聞,唔通一班華姐只顧閉門綵排,冇乜外景宣傳活動?

ATV的亞洲小姐卻在港進行得如火如荼,除本地六位佳麗外,ATV昨亦陸續宣布海外入圍佳麗,中包括澳洲、日本、越南等地佳麗。昨日她們一行13人到保齡球賽切磋球藝,來自澳洲的7號娜培妮亞卡娜斯娃(唔知係咪俄羅斯移民當地?)因身材出眾而成眾人焦點,她坦言已有男友,亦從無考慮過會跟中國男仔拍拖。而來自日本的10號川島聖良則表示不會因為中日釣魚台主權爭拗而擔心人生安全,最緊要係參選可以挑戰自己喎。

7號澳洲佳麗為模特兒,但個名
可唔可以譯短啲,譯個姓咪得囉

10號日本小姐原來係法日混血兒喎,
唔怪得個樣鬼鬼地啦

7位海外佳麗,澳洲唔係好高咋喎

2010-10-26

亞姐港澳特區六強鬼祟選出

今晚得閒無事在網上瀏灠一下選美新聞,赫然發現原來亞姐港澳特區今日已在亞視大埔總台選出六強,多次缺席亞姐活動既13號Barbie廖祉甯今日有「蒲頭」,可惜幸運之城沒有眷顧佢,六強不入,大熱倒灶!

是次亞姐選拔模式猶如五六十年代在麗池花園選香港小姐一樣,簡陋得很,只是自選泳裝見評判,然後換上便服等待宣布!  評判團包括幾位前亞姐,包括黎燕珊、羅霖、羅麗莎等,而入圍六強名單如下:

4號祁翼、5號萬嘉麗、6號李瑩瑩
9號陳明月、10號何婭、12號閔蘭

而一向以講野九唔搭八出位既Barbie姐卻無緣入決賽,有指她得悉被淘汰後扁咀黑面,而被問到落選後有否結婚打算時,卻突然淚如雨下,變臉速度令人驚奇!

唔知Barbie姐下次再有咩搞作呢?

原來Barbie只有5'3.5"高,不過身材幾好

入圍六強將會聯同亞洲其他城市14位佳麗共20位一同爭奪2010亞洲小姐后冠。





2010-10-22

王卉霖變講股阿姐

今日在Facebook閒逛,見到有個關於耀才財經網既Page,近日頗為留意金魚缸既我諗住click入去睇下有乜野貼士,赫然發現原來該證券行有個專屬既財經Channel,而當中主播更加熟口熟面,原來佢係 ------> 07港姐8強6號王卉霖 (即99港姐3號王啟翎個妹)!  3年冇見既王卉霖個樣成熟不少,可能顧及個專業形象卦,不過都好開心見到佢可以在其他領域發展,唔洗留在TVB做四五線藝員!

其實如果當年佢8強時問題答得好啲,會唔會擊退趙嘉迪或黃智雯入5強呢?


2010-10-20

2010國際中華小姐首晤傳媒

唔知大家有冇睇星期一的TVB亮燈呢?  其實當晚23位華姐及港姐陳庭欣均有出席,並"夾硬"要班華姐在福祿壽顯唱時Catwalk行一個圈,叫做亮一亮相,到昨日才正式開記招會傳媒。年初時何麗全曾揚言要大搞華姐,但何謂雷聲大,雨點小,除華姐決賽會移師天津舉辦外,見唔到有乜野"大陣仗",佳麗人數更由去年的28位略減至24位。

一如傳統,無論香港代表在選港姐如何被評為豬扒,到華姐時定必捧為大熱,真係唔知啲傳媒係用乜野準則去評架呢?  今年香港代表陳庭欣,其實個樣有啲殘,但憑一身稍為性感既裝扮,輕易成為傳媒焦點,與21號廣州代表李曼姿雙雙成為是屆大熱。

今年佳麗編號基本上沿用上年制度,以佳麗代表城市英文名稱作排序,但今年有少許不同,非內地城市佳麗照舊 (1-19號),而剛在內地選區選出來的5位代表,則排在最後 (20-24號),及以準決賽時所抽號碼作順序。我本人就甚為唔like呢個制度,覺得抽號數會比較公平,而且可以有多些巧合之說等話題。同埋我好憎條彩帶用金色,一影相就見唔到啲字,點解唔用返綠色呢?

今年華姐由1月改為11月舉行,令各地選美機構大失預算,大家更擔心應屆當地冠軍會否被"斷層",無緣參加本屆華姐。但經翻查後,竟然大部份09年當選之佳麗均能順利參與,當中只有香港的劉倩婷及紐約代表被新手"接任",無得參加!  劉倩婷續成為首位"無過無錯"都冇得參選既港姐冠軍,真慘情!


聽講24位華姐今日會去海洋公園哈囉喂鬼屋
拍外景,希望啲遊客唔好以為佢地係工作人員啦

1號 張滿 (奧克蘭)
屬四平八穩佳麗,身型高朓

2號 陳心慰 (阿姆斯特丹)
冇乜機會

3號 丁文冰 (曼谷)
被喻為大熱之一,但我覺得普通咋喎,不過佢幾高

4號 林晨渝 (芝加哥)
略肥

5號 白露 (佛山)
20歲青春可人,大陸Forum好多網友勁buy

6號 陳庭欣 (香港)
如果再唔改善"皮笑肉不笑"既笑容,
真係凍過水

7號 陳美妤 (吉隆坡)
選2009 Miss Astro時與另一佳麗以唱票方式宣布
一幕令人記憶猶新,本身質素唔錯,臉稍方

8號 李若瀅 (澳門)
比選澳姐時跌少少Watt喎,加油喇

9號 李璇璇 (馬尼拉)
那邊廂亞姐講明今年唔預菲律賓佳麗參加,不過
TVB就一件事還一件事。唔知司儀會唔會問佢點睇人質事件呢?

10號 王美艷 (墨爾本)
D華裔小姐好興叫咩美艷呀,艷麗呀,但多數係"驚"艷居多,
好彩呢個王美艷唔算靠"嚇",呢張相有啲似郭少芸添喎

11號 陳美詩 (蒙特利爾)
平平無奇

12號 張聖女 (紐約)
嘩,聖女呀!!  佢應該去選92年港姐喎咁!
佢有5'8"高架

13號 周玉霞 (三藩市)
平凡的樣貌、身高、名字!!

14號 王佩芷 (西雅圖)
有報紙話佢係大口仔個Frd,
我就覺得台型OK

15號 葉佳慈 (新加坡)
點解每年星姐都係派啲差唔多樣既佳麗呢下

16號 陸曼 (悉尼)
好鬼似汪詩詩喎

17號 鍾梓尤 (大溪地)
咁多屆華姐得1屆大溪地可以殺入決賽,
今年鍾小姐唔知可唔可以再下一城呢

18號 張慧雯 (多倫多)
被喻為極似苟芸慧,所以呼聲頗高

19號 岑麗香 (溫哥華)
另一熱門之選,溫哥華歷年華姐成績彪炳,
派出黎既都唔會太差啦

20號 方蘭 (河北)
雖代表河北,但能操流利廣東話不,
不過個樣有啲邪牌

21號 李曼姿 (廣州)
在內地選拔賽已贏「時尚風采獎」,身型高朓,
但動作生硬

22號 劉婕 (河南)
內地5強我最睇好佢,幾有原子鏸既影子

23號 劉雅婷 (江西)
面圓圓咁幾得意囉

24號 楊逸歐 (廣東)
明明佛山變廣東,不過個"地區"大咗,
應該開心啦

今年華姐會於11月6日舉行,大家記得留意喇!