2010-01-29

朱玲玲做兒子愛情顧問都唔拘

殿堂級港姐朱玲玲近日與某大銀行合辦慈善攝影展,被問到再婚生活,她說:「非常開心,不過兩公婆都係咁啦,冇乜特別。」被問到三位兒子感情事,她續說:「如果佢地問到,我一定俾意見,不過我信佢地都可以處理到。」
睇呢幅相,就知咩叫狀態大勇下更狀態大勇,
朱玲玲真係朱玲玲!

陳倩揚想搞多幾瓣

08港姐亞軍陳倩揚卸任後工作接踵而來,唔單止主持東張西望,現在亦兼任兒童節目主持,她亦指希望多方面發展:「我好鍾意唱歌,想登台搵真銀,又想出書跟大家分向正能量,但拍劇就未必係主力,因為唔知道自己能力去到邊,暫時都係以主持為主。」嘩,又真係幾多野想搞喎。

記得08年第一次接觸陳倩揚係港姐面試實錄時,因當時TVB邀請觀眾作評判,便同幾位選美Fans膽粗粗報名,點知又抽中哂喎。面試時陳倩揚係1號,talent係表演唱歌,算ok啦,但問答環節時嗰種"噚氣"法真係好"難忘"。現在的Skye確係進步了許多,判若兩人,希望佢繼續努力啦。

主持技巧係進步不少,不過可唔可以
唔好成日對住鏡頭狂眨眼呢?

2010-01-25

靚靚好恨莫可欣咁生個女

靚靚昨日在一個慈善步行時巧遇慧妍會長莫可欣及其19個月大愛女,靚靚即刻係咁撩佢個女玩,並說:「都恨生個女架,可以同佢扮靚呀嘛,不過次次想生d工作係咁黎,唔離開香港都ok既,離開點生呀, 單卵繁殖咩。」

咁其實可唔可以繁殖完先去做下野,再返黎生呢下?

黃嘉麗(左一)一身衣著同化粧令我諗起80年代既港姐

話時話靚靚你點解死都唔肯加入慧妍呢? 做下善事嘛

2010-01-23

張嘉兒何傲兒汶萊梳乎

張嘉兒同何傲兒兩位07港姐近日代表慧妍雅集帶領一班智障朋友到汶萊觀光,去到這個熱帶國家當然要享受一下陽光與海灘啦。Kayi說:「呢度D人好有錢,買地睇醫生讀書都係1蚊,但又唔會追求名牌,生活簡單。而且最正係1星期只工作4天半,不過冇夜生活,我都係鍾意香港既多姿多采。」她說此行最難忘係同一班智障朋友建立深厚友誼。而何傲兒則說:「呢度好多特別習俗,譬如女人結婚唔可以笑,因為當日係代表佢地同家人分離。」哈,又真係幾特別喎。

兩位阿兒係近年少有咁活躍於慧妍既港姐,真係好難得,加油呀兩位!


嘩驟眼睇以為坐船頭嗰個係葉麗儀添

Kawaii都話曾想選港姐

Kawaii日前與份屬好友的94港姐最上鏡小姐黃(金己)瑩Natalie一起接受歌手吳彤的電台訪問。Kawaii透露年輕時自信爆棚,憑5'1"身高及118磅既身軀18歲時膽粗粗參加港姐,但去到會場見到其他佳麗身型高眺,先知自己唔係選美材料。而Natalie則稱當時跟同學藝人汪琳一齊去選94港姐,但汪最後因專注學業冇選,而她最後則獲獎。她亦提到初入行時因被編入K-100當主持,覺得自己較內向不適合,又冇得拍劇,所以感到沮喪。

話時話如果汪琳真係選94港姐,唔知有冇機呢?應該可以入12卦?


得5'1"都想選?真係個樣好似李嘉欣咁都唔入圍啦

其實呢,你覺得司儀唔適合咩,講真做戲都好"忟"架咋,
D演技咁.......

2010-01-21

乜水:黐(脷)筋港姐陳法蓉

「乜水」這個環節將會逐一介紹經典選美佳麗,回顧她們選美時的趣聞花絮,及之後的事業發展,近況等。做得「乜水」頭炮,當然份量有番咁上下,所以請來冠軍級人馬1989年香港小姐冠軍陳法蓉小姐.....
姓名:       陳法蓉 Monica Chan
參選年份:1989香港小姐、1989國際華裔小姐、1990環球小姐
參選年齡:22
參選號數:17 (港姐)、4 (華姐)
戰績:       冠軍、國際親善小姐 (港姐)
                 亞軍 (華姐)
                 23名 (環姐)

參選新聞:
1989年為TVB主辦的第17屆港姐,無獨有偶由17號的陳法蓉勇奪冠軍。陳法蓉當時剛在美國夏威夷大學完成第三年學業,據她所說,她當時發現身體有個腫瘤,誤以為會遺傳她媽媽因癌病早死,所以想一嘗挑戰參選港姐。她剛在志雲飯局裡提到,在複試時需要提名人一起見評判,到達時發現已有幾位佳麗在等候,剛巧她的提名人又趕住返工,所以曾考慮放棄面試,並向在場的一位女工作人員(原來是陳紫蓮,港姐褓姆)示意退出。但陳著她等等,更帶她去隊頭插隊見評判,當時排頭的兩位佳麗原來是之後的季軍梁佩瑚及最上鏡小姐翁慧德,梁更大聲說:「嘩咁靚既,點贏呀?」陳惟有硬著頭皮介紹自己叫Monica。及後見評判時,她更以一句 "我嚟選係想贏架!"令評判留下深刻印象。

到正式參選時,各大傳媒除執著她的"黐脷筋"腔外,最大單花邊新聞莫過於傳她有一個兩歲大的私生子。事源傳聞亞姐那邊有佳麗未婚生子,之後傳到來港姐這邊,並有3個可疑人物,當中陳法蓉嫌疑最大。準決賽時她是最後一位被宣布入圍12名的佳麗,事後有傳她在後台急得流下壓力之淚。競選後期因常被傳媒拿來與另一大熱門翁慧德比較,故亦有傳她們不和,至競選完畢作印尼親善之旅時,情況更加明顯。

當選後,陳法蓉順理成章代表香港參加國際華裔小姐,並奪得亞軍。同年之世界小姐主辦權因落入亞視手中,故她沒有像楊寶玲及李嘉欣一樣,以冠軍身份出戰世姐。儘管如此,她在90年的環姐上一吐烏氣,憑自己計設的一襲晚裝,總分成績排名23(71位佳麗),是繼楊寶玲後港姐在環姐中最佳成績 (以TVB舉辦的港姐計算),難怪一眾選美Fans對她甚為欣賞。(圖為陳法蓉選環姐時的晚裝)
                                                                                         
其後發展:
陳法蓉卸任後簽約TVB,90年代早期曾於數齣重頭電視劇擔當女主角,包括「人在邊緣」及「巨人」。她在「人在邊緣」一劇中更與黎美嫻、羅慧娟等成為好友。在電影方面她也很快冒起頭來,代表作包括「靚足一百分」及甚多打戲的「賭俠」。其後所拍之電視或電影均迴響不大。2002年替亞視接拍了一齣以選美為背景的電視劇「美麗傳說」,戲內明爭暗鬥不斷,怎料戲外亦新聞多多。陳在志雲飯局承認,當時劇中一位女藝員曾因收工時間問題向她找晦氣,罵她黐脷筋之餘更出手想打她,幸而她的助手幫她擋了一把。此劇亦成為她拍戲生涯裡最不愉快的經歷。2000年後她多在國內拍戲,亦吸引了一大班影迷。

陳法蓉的緋聞,可能被她的演藝事業更被人注意。她常被取笑跟她前任的港姐李嘉欣"品味相近",因她們不約而同跟倪震及許晉亨拍過拖。而最近期的轟動新聞絕對是跟剛分手的Tony傳聞。當時有傳她是第三者,又說其男朋友欠債及捲入桃色糾紛中,最後導致分手收場云云。在志雲飯局中,Monica提及此事令他們有所誤會,亦因此事令本來已到談婚論嫁的姻緣告終。她更透露曾因此事想過輕生,幸現時雨過天青,重新振作。
 
最後嚟一張醒神既相啦

所謂10年人事幾番新,何況兩個10年呢?唔知Monica睇返呢段片,會唔會覺得好唏噓呢?

呂慧儀憶述選港姐時曾嚇到喊

呂慧儀接受太陽報訪問,憶述當年選港姐時的苦況(指美麗友營),她說:「當時要用行夜山訓練膽色,一個人行到半路叫天不應叫天不聞,真係驚到喊,有諗過放棄架!最慘最後條片冇播到出黎,個苦況真係不為人知!」

唉也,乜Koni你條片冇播咩?我只記得阮兒(底圖前排右一)同邱詠恩(前排左一)兩大騎呢怪又嗌又發癲咁咋。

「原來愛上賊」劇照,果然有型有款
算啦Koni,你辛苦完都叫入咗圍,難為嗰d高質5'8"社工林雪雯(後排右三)同
杜拜空姐羅靜珊(後排右二),捱完辛苦完都係得個桔咋....

2010-01-18

三冠軍人馬行婚紗騷

03港姐曹敏莉,08華姐朱璇及09華姐苟芸慧3位選美冠軍人馬日前齊齊於一婚紗騷行Catwalk。Mandy說雖然佢已經有8次著婚紗經驗,但對婚禮仍然有好大憧憬,並希望婚禮可以簡單,但一定要著婚紗。而苟芸慧則說希望30歲左右可以結婚,並謂婚後要生小孩才夠完美。

其實3位冠軍都係屬於省鏡嗰批,如果有一年港姐3甲係佢地3個,應該冇人會話「港姐淪陷」啦。


3位冠軍當然靚,如果個男模特黃建基去選
香港先生,都應該可以攞冠軍

黎燕珊頂得住是非

85年首屆亞姐冠軍黎燕珊,前晚為一社福機構演出舞台劇籌款。由於今次係佢首次演舞台劇,佢話感覺幾新鮮又刺激。提到她去年重組既「仁美清敘」是非,佢話佢地一班會員開會時都覺得非常憤怒,還會發聲明以正視聽,保留發律權利咁話!

話時話仁美清敘都停止運作十幾年,就算最active時既成績都同慧妍雅集相差好遠,又唔係政府註冊認可慈善機構。如今亞姐選舉模式有異,佳麗來自五湖四海,雖然黎大家姐有心有力,但要凝聚一直以來都好似盤散沙既亞姐去做冇錢賺既善事,真係.........   祝佢好運囉。



想問下你地會員開會時有冇5個或以上呢?
同埋開會時用廣東話定普通話架?

2010-01-15

陰公.... 韓君婷瘦到咁

自從去年甩底唔做隆胸代言人,97亞姐冠軍韓君婷都好少見報,今次出席「富爸爸花蔘宴」活動,火柴身材震驚全場人士,睇見到心噏。Belinda,食多d野啦好心。




錢慧儀慘到要做工人

81港姐亞軍錢慧儀,自嫁俾馬清揚後一直過住少奶奶生活,惟去年底一宗家傭偷竊案令佢"乸手唔成世"。

單案審結後,菲律賓領事館一直將錢慧儀列入黑名單。日前佢出席Chloe VIP晚宴時,便同記者呻:「我好困擾呀,領事館擺左我入watch list,話要平息佢地人民氣忿喎。我話係你地人民偷左我野喎,個官就話唔一定要報警,講到我好似錯哂咁。佢仲話如果我唔係celebrity會好d。」佢繼續呻:「而家我屋企得番兩個工人,我都要做埋工人呀,湊仔接送做家務乜都要做,我都就黎癲癲地呀。」

馬太,咁你可唔可以試下印傭或泰傭,或者幫襯下師妹郭藹明推介既本地家務通呢下?


唉也乜塊面瘦到凹哂呀?  d粗重家務唔好做喇,
淋下花抹下枱咪算囉。

郭可盈順利誕下B女

恭喜哂!  郭可盈週二順利誕下可愛的B女,雖然早產一個月,但都足秤有7.2磅,健健康康!

郭可盈去年懷孕消息前後都有一些不太愉快既傳聞出現,希望佢地林氏夫婦忘記過去,做對開心爹地媽咪啦!


可盈大肚時手手腳腳都好纖幼,產後修身應該冇難度啦。


2010-01-14

趙頌茹嫁得出喇

憑"大孩子"一曲成名既歌手趙頌茹(現名趙梓淇),同周啟生個侄周永恆終於拉埋天窗喇,真係恭喜哂!

大家可能會覺得奇怪,點解趙頌茹既新聞會出現於港乜姐?  其實趙頌茹曾經參加過Elite Model 2001架,當年以原名趙潤敏參選,仲得到季軍添,算叫做同選美有少少關係啦!  不過,同佢當年一齊參選既"佳麗",就真係同選美有著不少關係!  好似亞軍呂靈,其實係06年港姐季軍呂慧儀。阿Yu更擊敗05冠軍葉翠翠,及曾參加99亞姐,00多倫多華裔小姐,01國際華裔小姐兼現任甄子丹老婆汪詩詩,認真架勢!


Yu: 老公,我當年贏葉翠翠同汪詩詩架,我係咪好叻呀?
Roy: 梗係叻啦!  (設計對白)



係喇係喇,你最叻喇得未呀?  (設計對白)


2010-01-10

林莉忽然富貴

05港姐可謂同富商非常有緣,繼冠軍葉翠翠及亞軍陸詩韻先後被指搭上富商後,一向形象幾健康既季軍林莉近排亦被傳撻著內地富商,實行擺脫屋邨港姐行列。昨晚林莉出席「仁濟」綵排,當記者上前欲訪問之時,林莉就急急腳避回後台,拒絕受訪。同場應屆3位港姐劉倩婷、李姿敏、及熊穎詩均不願多談師姐被包一事,但承認港姐身分較易接觸各階層人士。

其實林莉初參選時,一副鄰家女孩樣子加5呎10吋半的身高確實惹人好感,但個樣確係幾木下,說話也不算特別伶巧,感覺她不太適合娛樂圈。之後又聽到她離開娛圈投身PR消息,確係戥佢高興。點知斷斷續續又見到佢繼續响電視出現,真係唔知佢想點。不過現在的她舉手投足均見自信,相信入模特界都可有一番作為!


擺個POSE幾型喎,但隻手D筋暴現,下次遮遮佢啦



應屆港姐3甲真係好少合照,乜真係咁冇新聞價值咩?
劉倩婷又變小矮人喇!

那邊廂,04亞軍朱慧敏出席一個婚紗騷,被問到林莉被富商包養傳聞,佢話:「唔係個個港姐都係咁既,我成日拍野冇機會,唔係個個都想入豪門!」講到嫁入豪門好似好衰咁喎。



慧朱好靚呀!


2010-01-09

苟芸慧單挑呂慧儀

無啦啦做多9個月先卸任既09華姐冠軍苟芸慧,歷屆華姐冠軍來說算是超班省鏡一群,現在簽了TVB後更多出鏡機會。日前她就出席軒尼詩酒會,力撼同場的長腳蟹06港姐季軍呂慧儀。來自多倫多的苟芸慧說:「自己好少咁性感,除左選美外,都係第一次咁性感出席場合。」睇嚟佢都要多多向性感慣既長腳蟹學習下喇。



此外,兩人均說酒量一般。呂慧儀說:「我次次都係人地飲醉之前離開,所以好少遇到男人借醉行兇。」唔知Dickson有冇响佢面前醉過呢下?


呂慧儀件衫都OK性感啦,唔夠苟芸慧咁勁啫!


2010-01-08

陳茵媺電視前送別大閆生

06港姐冠軍陳茵媺, 係處境劇"畢打自己人"既主打人物之一。前日TVB播出大閆生(陳鴻烈)離世既劇情,Aimee都有在屋企收睇,但佢話出奇地心情沒有太激動,相信現在平伏了很多。

其實Aimee出道以來拍劇不斷,但多數演女警等角色,戲路不算很廣。未知繼同事三分親及將播完的畢打自己人後,Aimee又有乜野新既演出呢?  極期待呢.....


Aimee呢張相真係,唔多掂喎.....

2010-01-06

吳婉芳開麵包舖

86港姐亞軍吳婉芳,做咗闊太多年,見仔大女大悶悶地走去頂左間麵包舖嚟做,實行寓工作於娛樂。

這間位於灣仔的「金獅餅店」,原來聞名於六七十年代。今次May投資7位數重開呢間包舖,並說賣剩既麵包會送去老人院等慈善機構,認真識回饋社會。


見得閒咪去慧妍幫下莫可欣手囉!


劉倩婷可能無緣參選華姐

做得港乜姐第一單新聞,點都有少少震撼性既。

早於去年11月,已經有小道消息指TVB將會延遲舉行2010國際中華小姐(即前身國際華裔小姐),惟當時時候尚早冇乜證據可以證實呢單料係堅!

到12月底,華姐大會照理應該係時候安排記招介紹佳麗,但當時仍然無聲無氣,延遲之說可信性越來越高。

到最後,由幾misshk-friendly既明週報道,2010國際中華小姐將會延至約9月舉行。呢個決定亦由TVB的高調高層陳志雲證實,可信性可謂100%。陳亦補充屆時希望可以乘上海世博之勢在上海舉辦華姐,實行搞大佢!

照咁講,劉倩婷可能會無份參加2010華姐,因為如無意外2010港姐將會在8月份舉行,而陳總亦表明希望可以派新鮮出爐的港姐迎戰,劉小姐今次選美夢可謂凍過水。她亦將會繼去年因hea爆退選的張舒雅,第二位未能出戰華姐的港姐冠軍。

唔緊啦,你都選左世姐咯,夠皮啦!


港乜姐....... 嚟喇!!

經過萬水千山,港乜姐終於跟大家見面喇! 

顧名思義,港乜姐係集香港大小選美新聞於一身的中文網誌,以八卦雜誌形式向各讀者提供最新的選美新聞、驚人內幕、陳年經典、選美冷知識等林林總總話題,務求使讀者多角度了解選美界所發生的奇人奇事。

港乜姐更希望能與讀者產生互動功能,透過讀者間的留言,提高資訊準確度,並希望以此渠道集思廣益,讓各讀者均能知道更多選美界的資料與消息。

事不宜遲,我地即刻去第一單新聞。