2011-08-10

2011充滿淚水的港姐夜

2011年港姐終於曲終人散,所有獎項都塵埃落定。似乎今年係近幾年首次冇乜網友狂炳既一年,選完後幾乎係"零"鬧,評判終於順應民意,揀咗個眾望所歸既2011年度香港小姐。

賽果
(左起)亞軍: 14號朱希敏
冠軍兼最受歡迎獎: 5號朱晨麗
季軍兼最上鏡小姐: 3號許亦妮
國際親善小姐: 6號梁麗翹

各佳麗之表現容後再講,想先講講成個製作。基本上今年縮皮地唔用紅館,先係呃人地話會去九展舉行,搞下搞下索性返電視城搞,所以舞台設計都唔可以expect好grand。雖然睇得出成個show在視覺效果上幾有心機,不過始終硬件所限,所以感覺仍然好似綜藝show咁,無甚驚喜。

成個rundown頭半截感覺好趕,好多佳麗Last Shot都未擺好,個鏡頭已經影咗去下一位佳麗度(泳衣環節尤其更甚)。但到後期做母女相擁加佳麗抱頭痛哭環節又嫌拖到好長,淚水都算,講黎講去都係"好多謝你"、"佢照顧我好多,好似大姐姐咁"、"我為你驕傲呀"咁,雖則我明,但重覆咁多次真係UN感動都麻木啦。其實俾我製作我會刪除母女嗰part,咁眾佳麗講下少少感受咪算,送禮呢樣2000年做過啦。不過我幾鍾意播眾佳麗由抽號開始嗰段片,張大合照當時仲有12號王冠架喎,唔知啲佳麗而家睇返兩個月前呢張相有咩感覺呢? 

除咗前趕後DUM既問題,今年既所謂新賽制又係奇怪,做兩part就選評判 top 5 favourite,之後先黎個真top 5,跟住復活戰又揀多3個入,咁其實呢3個都係搵黎擺架咋喎,點樣可以在亳無環節底下爭分入3甲呢?  到最後,啲司儀一時又話top 8,一時又話top 5,點知原來係插入一個宣布top 4環節先,啲佳麗都未企定就即刻宣布季軍,呢個動作真係非常多餘,在top 8直接宣布三甲咪仲刺激!  最大敗筆係宣布冠軍,拖個贏既阿媽出去,其實此舉仲衰過06年打開獎狀,緊張程度大減!  從來都係靠司儀宣布先可以睇到佳麗奪魁既激動一刻,唔知邊個TVB監製諗埋呢啲野出黎架呢下?

服裝方面出場套衫顏色鮮艷幾搶,不過Karen Chan最鍾意花,係佢個字典裡面死要加啲花上去先夠靚!  第一套泳衣幾好,在沙灘椅上擺pose影top shot雖然05/06都用過,不過好野唔怕用,效果都幾好。中古服飾我一睇,下乜呢啲係中古?  以為係star trek裡面敵方既妖怪添!  女強人服裝冇乜發揮,點整都係咁。但第二part泳裝無啦啦點解要戴頸鏈呢?  成條鏈攝咗落去心口,真係.....!  髮型方面就做得幾好,起碼冇古靈精怪野出現,放頭髮落黎個個女仔都省鏡咗後生咗! 到最後旗袍紮起都冇咩事,算係幾好!

不得不提既係司儀,其實我仍然係喜歡80年代那種莊諧並重既主持方式,但既然成個勢都係要窒下啲佳麗,咁起碼要好似曾志偉同森美咁,識收識放,窒佳麗都要窒得有紋有路,亦都要窒得過癮,到尾又會幫個佳麗兜。但陳百祥做咗咁多年仍然係一樣咁衰,成個款係hea住做,冇一次講佳麗個名講得清清楚楚,急才又久奉,俾佳麗問返轉頭又口啞啞,成日執人口水尾係咁講,更加唔識得幫下口及收口,次次搞到同佳麗相對無言作ending。好似有一幕15號講自己唔識得分唔該同多謝,解釋一輪完後森美即刻問佢呢一刻應該係講乜,15號即刻答: 多謝! 賺得全場鼓勵掌聲。我相信呢啲場面阿叻永遠都做唔到出黎!

嘉賓方面,咦原來全晚係零嘉賓喎!  以前既港姐年年都有大型歌舞環節,美其名為俾時間評判計好啲分,實質係吸引廣大電視觀眾收睇港姐而設。而每年呢個環節都係主打selling points,被選中表演既都係當紅明星或TVB力捧既新星。到90年代幾乎每個環節都有嘉賓,帶領眾佳麗載歌載舞。可惜近年既所謂嘉賓號召力欠奉,但都叫做有,好似舊年都有一班慧妍港姐撐下場!  但今年呢??  估唔到TVB連呢樣都慳埋,出年港姐40週年喇,希望唔好搞成咁!

彭慧中成今年唯一"嘉賓",出現約5秒

首part泳衣環節擺出野性一面

第二part泳衣成條鏈攝哂落條罅,陰功

開場環節以花為題,視覺效果唔錯


中古服式唔三唔四,擁model身型既
朱希敏都搞佢唔掂


女強人服飾冇乜得發揮

落淚場面稍嫌太多

好係時候講下今屆各佳麗既表現:

冠軍兼最受歡迎獎
5號 朱晨麗

港姐史上首位奪冠既5號佳麗Rebecca由頭帶到尾,不過始終唔係我最喜歡的一位,當然佢得冠軍亦有道理。Performance-wise其實唔算特別標青,開頭太緊張所以非常拘謹,催淚環節亦堅持唔喊,停留"索下索下"狀態。及後較為自然,catwalk亦好,不愧跳開舞。五官端正加有清雅氣質得到唔少觀眾芳心,更成為近年冇點俾人踩既出爐冠軍,實為港姐省靚個招牌。好多人都話佢似陳法拉,但點解我完全唔覺呢?


亞軍
14號 朱希敏

14號呢晚既表現非常突出,一洗參選期間被傳媒完全ignore既慘況。其實佢硬件幾好,夠高度加上有壓場感,惜嘟咀樣似選超模多過選港姐。不過真情剖白特輯加現場有好幾位佳麗揀佢為送禮對象,似乎佢真人並唔係想像中咁串,屬外冷內熱佳麗。通常亞軍都是但有機會去世姐或國姐,希望朱希敏憑身高可以為港人爭光啦。

季軍兼最上鏡小姐
3號 許亦妮

可算係近10年樣貌最標緻的一位港姐,更係近幾年名副其實既"最上鏡小姐",講真論美貌係拍得住李嘉欣郭羨妮嗰啲,惜身高身型加負面新聞拉咗佢落馬只得季軍,以今時今日TVB既奇特選美標準算係執身彩。整晚表現相當唔錯,雙眼有神采,笑容甜美。假以時日應該好快上到位。

國際親善小姐兼五強
6號 梁麗翹

五官非常出事,大細眼歪咀兼怪下巴,好彩夾埋一齊唔算好難睇。答問題一流,就算唔記得台詞,都可以好漂亮咁兜返打圓場,反而搞到阿叻一時間唔識接落去老貓燒鬚!  成個勢都係要拎國親嗰隻,如果眼耳口鼻執返好少少應該可以做下東張西望主持。

四強
9號 麥美恩

9號麥美恩在賽前亳無期望下入到4強真係超額完成!  司儀在宣布入圍名單時不斷有9號真係嚇壞成屋bloggers' choice評判架!  不過好老實講佢個樣係好過平時好多,而且談吐大方,如果6號臨場病咗分分鐘拎走國際親善架!

八強
1號 甄敏婷

全場俾到大家最大驚喜既佳麗,個樣好咗不特止,亦唔係想像中咁卡通聲。而且對答流暢真情流露,令大家有好感。加上骨肉相稱,我差啲想將blogger's choice既"最佳泳衣演譯獎"俾佢。不過係又喊唔係又喊呢家野真係有啲趕客。

八強
4號 林慧倩

全晚都係成個容祖兒咁行黎行去,講真樣同身材都係麻麻,惟一對答可以令佢入八強架咋。

八強
7號 胡中慧

全晚最令人失望佳麗。硬件非常好既7號一開場已經係訓唔醒look出場,冇神采真係點可以贏呀。一開聲把卡通聲嚇親人不特止,講說話亦詞不達意,俾司儀問多兩句又口窒窒,講真佢阿媽同司儀對答嗰幾句仲得體過佢。

2號 關曉琳

好多人話佢似藍潔瑛,但一定唔係"靚絕五台山"。2號一出場都好似冇乜自信心咁,對答環節更加凸顯呢個問題,估唔到連佢惟一強項都徹底摧毀,入圍無望。

8號 蘇文

第一位被宣布為評判初步5強之一時,真係成屋人尖叫一下,以為今年啲評判都係鍾情另類之選! 蘇文整晚表現都係唔會令人有驚喜嗰隻,低調到差啲數漏佢。

10號 李天縱

睇佢出場好似睇緊亞姐咁,但佢啲廣東話係仲差啲添。基本上要以國語問問題,以廣東話回答亦答唔到幾多句。不過整體表現冇想像中咁搏命,交換禮物環節更收到兩份咁多,應該份人唔算好aggressive。

11號 劉思希

全晚最唔知衰乜既佳麗,當然個南亞裔妝係累咗佢,但整體係咪咁差先?  佢身高身形不俗,而且談吐自然得體更勝4號,如果4號都入得8強,咁即係評判覺得11號個樣差佢好多所以唔入??

13號 蔡慧欣

其實唔多知佢響度做乜,整晚個樣不情不願咁選,咀扁扁就黎想喊咁樣,真係鬼選你咩。難為啲傳媒仲話佢係大熱倒灶。得5'3"個樣又唔係特別標緻講野一舊舊表現一團糟真係唔知熱響邊。

15號 梁蔚翎

其實有佢響度好過13,起碼俾到我地笑下,競選時間更加係FB裡面大熱topic添!  樣就無謂再講,不過佢全晚最靚個shot應該係做女強人環節後面張大頭相喎!  講真佢講野都係怪,不過睇得出係有俾心機改善,起碼好過7同13,最後佢一句"多謝"更獲得全場鼓勵掌聲,成為是晚Highlight 之一!


喂喂.... 仲有啲花絮架.....

最上鏡小姐評判趙式芝無啦啦話啲佳麗僭建,
問非所答。如果你覺得港姐係呢個場合可以咁樣踩既,
咁不如索性唔好應承做評判啦。

慶幸今屆評判陳豪及周慧敏均講明以靚行先,
最終選出一個順應民意既香港小姐。如果
年年都係佢地做評判就好喇!

呢兩件蛋散出年可唔可以
"冇得留低"??

莊思明變"有心事唐老鴨",其實除咗15號,
全場最醜會唔會係佢?

今年總結到此為止,不過其實今年港姐未完架,大家密切留意稍後公布既blogger's choice,睇下你同我地普羅大眾既心水一唔一致?

23 則留言:

psue 提到...

“有心事唐老鴨”莊思明,實在不能同意更多!!!ORZ

四叶草 提到...

真的很佩服庄思明,临卸任也要制造新闻。。。

茵 提到...

嘩...唔係係度睇到,我真係忘記左有彭慧中呢個人了!點解舊年的港姐好似除左陳庭欣之外其餘的人好似甚少出鏡/發展咁?

我其實覺得冠軍都係國產味濃左d。

匿名 提到...

莊思明變"有心事唐老鴨" - 想笑死人咩,哈哈。不過真係唔明點解佢成晚黑口黑面,寬容d唔得咩?

其實我覺得佢地第一round 問答時後面出既泳衣相幾靚,而且佳麗自己定題目其他人抽黎答都唔錯,幾得意

robocon 提到...

當 許亦妮 媽媽 提到 照顧左佢十年的工人都黎左, 隔一陣鏡頭便 pan向莊思明, 我亞媽都識講笑話, "這個咁核突的女人係咪佢工人黎?" (原文照錄)

朱希敏好大機會去世姐, 希望到時karen chan 設計晚裝時輕手少少, 手下留情, 唔好加咁多無謂野落去.

TT 提到...

@psue & 四葉草: 咁樣黎做新聞, 真係唔整好過整,哈!其實佢係可以唔洗咁醜!

@匿名1: 陳庭欣係幾多主持做,而家張秀文都有個節目做主持,季軍拍咗個單元劇就冇咩聲氣,反而李雪瑩keep住有做明珠台主持同埋兒童台Miss Crystal, 出鏡率穩定!

@匿名2: 啲backdrop相係靚啲啦梗係,其實歷年都係咁, 好似楊婉儀同翁嘉穗咁, 後面張相都係超靚!!

@robocon: 笑死咗我呀, 如果賓賓都戴冠就真係幾好笑, 哈哈哈!! 話時話季軍個阿媽係我舊同事, 同佢farewell時佢都有提過佢工人幫佢做咗18年野架,我諗佢當佢工人係親人一樣咁!

匿名 提到...

季軍交接時成為最醜港姐季軍同最靚港姐季軍交接..我覺得15號都靚過莊思敏..HAHA

匿名 提到...

季軍交接時成為最醜港姐季軍同最靚港姐季軍交接..我覺得15號都靚過莊思敏..HAHA

psue 提到...

睇番重播,覺得朱晨麗唔似陳法拉,反而覺得似鄺美雲。

朱希敏似姚嘉妮,許亦妮似梁詠琪。

要贊下11號劉思希,我覺得當晚佢係最淡定、談吐最好既一位。唔明點解入唔到八強。

Chan 提到...

朱晨麗似成熟楊愛瑾多D喎

robocon 提到...

不過都要公道講番佢, 莊思明絕不是最醜季軍丫, 不過兩個重要場合 (去年接受加冕 和 今年加冕) 都有一個咁核突的髮型! 見佢平時的相片, 長曲頭髮加自自然然的笑容, 其實幾好睇!

同埋那晚佢表情又真係怪左些少, 唔知點解鏡頭又時常pan向佢, 密度好似仲密過 邵逸夫 陳庭欣那邊....

順帶一提, 李雪螢 又真係幾靚.....

Hilda Wong 提到...

I think the reason why 11 failed to get into top8 was because she sounded too much like "polishing shoes"... i don't know why what she said has somehow disgusted me..

Charlie Leung 提到...

女強人D大頭相好靚
2號有袁詠儀ge影子
9號唔好成鬼日岳高頭好核突
15做得幾好
11真係好核突...
5號國產味甚濃唔知可唔可以幫助到佢選國際中華小姐呢?
梁麗翹同09年黃嘉麗一樣都係6號,又係旅遊大使and miss internetional goodwill

豬鼻 提到...

我覺得五號,冠軍,表現其實真係好一般,冇咩特別,平平淡淡,唔係好突出,如果係以前(十幾年前),我覺得佢唔會有五強,但係由於佳麗質素下降,佢就入了。不過五號個樣係咁多個入面係有氣質同埋樣都ok(只係果一部份人),但係始終都係娘味同埋有口音,講東話差過陳法拉同埋馬賽我就接受唔到。我覺得五號都有冠軍風範(但唔係好強烈....)同埋個人感覺都大方得體(比較起黎算係),所以就揀佢,而且揀佢原因,好大機會係網民favourie,廢事又比人罵la...
論表現,明顯係9號好sharp,我覺得都好有風範同埋表現好好,但係因為唔夠靚,所以覺得因為評判廢事又話港姐豬扒,反正五號最受歡迎,咪選五號囉(個人意見)!!!不過我覺得9號個表現真係唔錯,今日睇落真係sharp好多,平時真係師奶到呢.....
十四號表現都ok,但係硬係有d唔知點,唔識講...feel到佢份人造作既一面,但係表現都ok既,我覺得未至於去到亞軍
十一號表現都幾好,可能之前見評判果陣表現唔好,又或者評判覺得佢份人唔夠真掛。十一號個樣比髮型同埋化妝整到佢好核突,又或者真人真係好核突
最美麗的三號,表現都ok,而且真係好靚女,點睇都係最sharp既一個,係肥左d...整體表現都好ok,對答都有腦,拎唔到冠軍係因為負面新聞(絕對!!!評判話冇睇就一定係呃你既),同埋佢既感覺係比較細路女,唔得大體,冇咁有冠軍風範,不過以佢既美好條件,修修身大把世界....
個人覺得七號答野好搞笑,明顯佢唔太aggressive同埋反應係比較自然,先天條件好,但係行路有d寒背(非常唔得,絕對唔可以)
個人覺得六號答野雖然轉數好快,但係感覺唔太自然,有d怪怪地咁,有d刻意去營造(唔太鍾意),但係個人好buy佢媽媽拍段video,屋村妹的我好受落呢d平民野
十五號好明顯係志在參與,雖然佢唔靚,但係份人幾好,幾真幾純良,明顯見到佢有努力做好自己同埋改善缺點,比起十三號以為自己係熱門就,得過且過好好多,唔好踩佢醜la,好慘......

個人係睇表現,內心多過真係美貌好多~

其實陳庭欣靚左(由其係笑果陣,睇得出佢有比心機去改善),同埋佢講野係有好紋有路,有用有,都幾有冠軍風範.....莊思明真係慘,次次係呢d場合都係tbb搞到咁(係咪karen chan條粉皮??)其實莊思明份人幾好,幾真,講野都幾搞笑

話時話,五號,冠軍話佢自己以前咁慘,又窮,又住板間房又盛,因乜事7年之後就可以一變,變到住係銅鑼灣係萬蚊一尺既貴價樓,人工幾高都好難租or供咁既貴價樓住la~咁巴閉,大家諗諗點解呢??

Rach 提到...

係呀樓上,我都唔明點解選完寫5號係返高尚住宅,跳芭蕾舞可以搵咁多錢? 佢係點樣由板間房脫貧呢?

同意其實莊思明唔係真係咁醜,當然佢嬴到李文煊係有d奇怪,但其實佢平常個樣都唔差,係真係唔明點解一到大show個頭就咁肉酸成舊餅咁

A.T. 提到...

其實我想講當晚仲有一個特別嘉賓架...佢就係..
1999年度香港小姐季軍胡幸兒小姐...雖然有D random仲好odd...成晚就係出左果幾十秒?
仲有另一樣怪野就係我唔明點解一開埸會搵左彭小姐出黎...雖然佢係好靚..不過都係有D怪...又係出得果幾十秒..

匿名 提到...

原來第1次有5號佳麗奪冠...
其實港姐有咩號碼係拎得特別少獎,或者三甲既呢?
近年3號既表現好好,自07年破蛋入圍三甲兼打孖2年冠軍後,今屆既3號亦都真係好出色!對上一次最有印象既3號係陳芷菁(94年)同樊亦敏(91年)年代了...

Nilly 提到...

大家覺唔覺得5號成晚都唔笑唔喊咁好生硬?佢行路係好好睇,尤其係女強人嗰Part, 真係明顯高過其他佳麗幾班,但啲表情真係好苦情喎,該笑又唔笑,笑又好似喊。又成日齶高個頭。個樣唔單止幾分鄉,仲幾凶添!其實我覺得佢最靚嗰刻就係張官方相,真係幫咗佢好多!其實佢對答各樣嘢都唔係話咁突出,三甲都合情合理,但一嘢去到冠軍好似有啲過分。咁嘅冠軍大家都一致接受,你話係咪因為而家大眾對港姐嘅期望值實在太低?!
司儀方面,森美今年真係幾突出。好似一號媽媽講完嘢,佢話佢爸爸一定係好高喇,真係笑咗!至於阿叻,我覺得佢今年已經好咗。不過啲英文就依然…今年嘅popularity,都唔知佢up 乜!其實會唔會曾志偉同森美兩個就夠?不過如果真係飛阿叻出局,佢又情何以堪哩?
我會建議保留媽媽嗰part喎!因為好多媽媽講得都好好!賺人熱淚!反而佳麗送板就可以取消,因為真係又趕,又喊,都唔知為乜!
當晚其實個個佳麗都表現得幾好(2同13係差啲),冇咗嗰啲好自以為是或者特別礙眼嗰啲。雖然唔知10號同15號點解喺度,但佢哋又有娛樂效果嘅。尤其15號,睇完個對答環節鐘意咗佢添!覺得今年成個package真係算成功,個show同14個佳麗俾人感覺都算幾舒服。唔知大家有冇同感?

豬鼻 提到...

非常認同樓上,五號表情真係好生硬,成晚塊面都好緊,點睇都係好緊,容我就覺得佢係冇整,咁但係佢有冇打野落去(botox,咩咩素等等.....)五號真係最靚就係官方相,最自然,平時睇落真係好普通,可能真人好靚啦下,但係我地睇唔到。佢個樣真係好普通,而且成個show不斷強調佢(五號)係大熱,三號咪仲熱,而且話就話上網投票係最受歡迎,實情係點都唔知,透明度一d都唔高。講靚呢,佢都係入面算ok,但係評判陳豪哥哥話一定要識廣東話,其實五號d廣東話好差(差過陳法拉同埋馬賽好多,佢地已經係我既底線),所以廣東話差既五號唔知點解拎到第一,反而李文烜咩都冇(佢仲靚la),你問我覺得有冇做馬,我覺得係有既....呢一個都好似係公開秘密。五號黎選果陣係微博到已經講定晒,so我覺得係有鋪定路入選,如果唔係使咩咁招搖....
五號我真係好有興趣想知佢點脫貧,講到之前自己咁慘....由板間房住到去豪宅,唔係一般既灣係銅鑼灣喎,幾貴呀...平既都要好多錢,佢已經冇跳舞,邊有錢租呢??反而三號住既觀塘(有錢女),都一定冇五號既銅鑼灣咁貴,兩個都似係自打咀巴
成個show
我覺得個台太細la,無線又係太慳,我覺得港姐,係港姐喎,at least都有book會展黎做la,你話04年電視城新入伙入黎做下就ok,一般我覺得都一定要係大場到做。仲有,今年d問題都好簡單,唔太難,冇太刻意去留難佢地,反而09年就真係難好多,由其係林潔瑜,我覺得林潔瑜既轉數同埋淡定真係十年之冠。五號答果陣,明顯司儀果d係特別放過佢,冇太刻意去難佢,而且五號做所有野,都好似係得一個表情....

robocon 提到...

今日睇明周, 佢話傳聞因為上年毛記以港姐名義book紅館期, 點知毛記最後比左林fung開演唱會, last一晚才趕頭趕命求其搭景做港姐.

所以今年紅館reject毛記的港姐期申請. 唔知下年點呢?

Charlie Leung 提到...

15唔係真係聽咗13講驚俾人話佢貪務虛榮所以走咗ah

ada 提到...

如果我係監製的話,我可能會叫王冠來獻花,哈哈!

盧健揚 提到...

生活影音製作
視訊聊天
呱呱視頻社區
呱呱真人秀
呱呱視頻娛樂
呱呱視頻演藝社區
呱呱下載
呱呱視頻社區
呱呱視頻
51vv視頻社區
51vv虛擬視頻
51vv聊天室
51vv視頻社區下載
七喜視頻社區
七喜小說
七喜言情小說
言情小說
言情小說免費閱讀
言情小說吧
好看的言情小說
都市言情小說
言情小說排行榜
言情小說大全
言情小說推薦
免費言情小說
小說閱讀網
美女貼圖
日韓美女貼圖
花生美女貼圖
美女圖片
貼圖論壇
熊貓貼圖
美女工廠貼圖
美女貼吧
日韓美女裸體貼圖
日韓成人美女貼圖
成人美女貼圖論壇
成人日韓貼圖
日韓貼圖
世界杯日韓美女
日韓美女全捰體照片
美女寫真
美女裸體的視頻
美女裸泳
美女裸泳照
美女裸泳無遮擋圖片
美女裸泳照視頻
視訊交友
視訊聊天交友網