世姐國姐又黎喇

猶記得幾星期前大家親眼見證TVB美術總監陳惠英為朱希敏及許亦妮設計的「經典」晚裝後，眨下眼又黎到世姐及國姐的「結局篇」。今年呢兩個重頭國際選美都係11月6日選喎，幸好世姐在倫敦選，而國姐在成都選，因有時差關係才不致於重疊，選美迷唔洗趕到氣咳。

今年國姐既coverage特別多，一來係中國傳媒關注度高，二來隔離台FUN少個囡囡冼韻怡代表澳門選喎，梗係多最新滾熱辣update啦!  反觀世姐嗰邊靜英英，相都唔多張，一貫世姐乜都爭啲既風格! 

不如睇下兩位港姐代表連日來既花絮先啦!

聽講許亦妮好忟先去到成都，初黎步到梗係黐下啲佳麗影相啦

佢同中華台北小姐同房架喎

四位大中華佳麗：中國小姐白雪玉婷 / 澳門小姐冼韻怡 /

香港小姐許亦妮 / 中華台北小姐力桂英

Whitney正欣賞各外國佳麗以中文寫的"音樂"二字，

覺得很特別吧

稻香旗袍出場喇

Whitney輕輕一坐都散發魅力

Whitney參選以來最索最省鏡的一張相(雖然其他相都好少出事)，

張相影得鬼鬼地充滿神采，說她是歷屆最好的國姐香港代表都不為過

又係一張美艷既相

港姐澳姐正面PK戰，誰勝誰負呢?

世姐Miss Sports單項賽，呢個係乜玩意呢?

Hyman果真係扁口扁面女

岩岩浸完油黎呀?

佳麗們在Big Ben前留倩影，近5'10"的Hyman

一啲都唔輸蝕架

Karen套傑作出場喇，難得Hyman一臉自信，

值得嘉許啦

呢張相令我諗起周嘉玲選國姐既狀態，

三個字：一團糟!!

肉酸到冇朋友

我唔係講啲港姐!

港姐俾人話一年差過一年，問心講比起80年代，現今港姐確實少咗啲氣質，但其實又唔係真係好似傳媒或坊眾講得咁差，以前都有大把醜!  但講到港姐d styling喇喎，就真係不得不佩服TVB既堅持，唔醜既都唔出黎獻世!  好似啱啱試戰衣既世姐香港代表朱希敏同國姐香港代表許亦妮，又示範了兩套"驚為天人"既晚裝，難得兩位港姐敬業樂業，仲笑騎騎一副滿意狀咁俾傳媒任影，戲劇科仲唔斟下兩位姐仔客串下?

其實太陽報既記者好好人，影唔哂成件衫。其實件衫一味死駁，好似

粵語殘片黃曼莉家窮唔夠布做衫俾個女咁，求其搵啲碗布駁埋下半截。

啲色水又唔討好，而且又一貫港人致愛乜都加啲上件衫度，慌死蝕底!

其實呢個港人傳統真係死症，唔信你睇下結婚啲新娘，簡簡單單一條婚紗

唔得既，死加閃珠又加朵花咁，唔夠busy唔收貨!

真係好想同許小姐講句：四位食小菜吖唔該!  點啫，成個稻香知客咁，

拎埋個walkie-talkie就真係神似過繆非臨@志明與春嬌呀!  呢件旗袍聽講

係民族服裝黎架，而家都唔興中國風啦，仲整啲咁鬼out既款式，做乜

對鞋唔整埋橙色啫，要醜都醜盡啲吖嘛! 唉，真係希望可以憑Whitney

既標緻樣貌拉返高少少分啦!

其實Karen Chan或其他服裝同事明唔明簡單就是美既道理呢?  就算冇fashion sense，睇下其他國際選美或時裝雜誌都知而家選美既晚裝應該係點架啦，唔需要嘩眾取寵以為香港人就鍾意呢啲!!!  有冇人有Karen Chan既Facebook呀?   真係好希望佢知道自己啲「傑作」有幾咁震撼!!

朱晨麗：你地兩個玩得開心啲喇，著呢兩件衫carry得

好睇啲喇，希望你地唔好俾其他佳麗笑啦!

朱希敏&許亦妮：睇下到華姐時你點死!

梁麗翹：好彩我唔洗出去選啫!



張秀文@世姐

唔好意思咁多位，好耐都冇update港乜姐呢，近排成個人好似冇乜心機咁，不過今日好有衝勁，點都要寫D野!

近排大家最關注選美新聞莫過於張秀文選世姐的消息，向來港姐出外選美都係冇乜聲氣，今年都唔例外，但連相都冇幾張先死，所以想知Sammi最新消息都有D難度。以下為大家搜羅了幾張活動照，止下癢先!

張秀文被內地傳媒指酷似孫燕姿，人地

明明叫「漲爆王祖賢」架嘛

Sammi與其他佳麗遊長城

中國小姐唐瀟、澳門小姐伍家怡、香港小姐張秀文，

大中華代表共冶一爐

張秀文與日本小姐同房，大家會唔會傾下

釣魚台的主權問題呢?

被人影夠了，自己都要影下人

5'5.5"既Sammi站在一班高頭大馬佳麗中間，

當然好難發圍啦

中港澳出席晚會，聽講台灣代表決定唔去喎。

Sammi呢個look有點像黎姿

當伍家怡遇上張秀文

雖然港姐亞軍張秀文去咗世姐已經好幾日，但坊間最對係零新聞，冇相冇消息冇呢冇路，令一眾關心港姐在海外選美既粉絲大感失望。不過好彩我地既好鄰居澳門代表伍家怡update咗佢既微博，當中有同Sammi合照架喎，當伍家怡遇上張秀文會係點呢...................................

好多人覺得佢地有幾分似，大家認唔認同呢?

一年一度醜衫巡禮

每年到呢個時候，都係國際選美陸陸續續舉行既日子。今年更加犀利，港姐選完，緊貼有延遲舉行既環姐，世姐又提早到10月舉行，之後又有國際小姐，又有國際旅遊小姐，連無線都無啦啦擺埋國際中華小姐響11月，喜歡國際選美既網友，呢兩個月肯定跟選美新聞跟到嘔!

而每年呢個時候，又係到核突到無倫既"靚衫"出場既時候，自信到囂既Karen Chan必定得意忘形咁SHOW佢既"傑作"，今年由"幸運兒"張秀文示範，好想講一句：TVB係咪成日嫌D港姐唔夠醜架啫?

條裙好似一棵黑色既聖誕樹，硬係乜都要

擺D上去先叫好，貫徹香港人乜都要多唔理

有冇用先叫抵既性格!  個髮型係咪鳥巢2號? 

點解死要戴對手襪喎?

張秀文笑容幾甜，身材幾好都冇用啦!

不過那邊廂，闊別世姐13年既澳門今年有代表參加喎，心水清既網友都知係隔離台Fun生活既扑主拎到個franchise返黎搞，我地呢D選美戰友都戥佢開心到彈起!  而是次派既代表係08澳姐季軍伍家怡喎!  "當張秀文遇上伍家怡"會係點呢?  大家好快睇到喇，講真佢地既外型都有幾分似，但講到D衫喇喎................... ，你地自己睇下，爭幾皮呀!

乜水：黐(脷)筋港姐陳法蓉

「乜水」這個環節將會逐一介紹經典選美佳麗，回顧她們選美時的趣聞花絮，及之後的事業發展，近況等。做得「乜水」頭炮，當然份量有番咁上下，所以請來冠軍級人馬1989年香港小姐冠軍陳法蓉小姐.....

姓名：       陳法蓉 Monica Chan

參選年份：1989香港小姐、1989國際華裔小姐、1990環球小姐

參選年齡：22

參選號數：17 (港姐)、4 (華姐)

戰績：       冠軍、國際親善小姐 (港姐)

                 亞軍 (華姐)

                 23名 (環姐)

參選新聞：

1989年為TVB主辦的第17屆港姐，無獨有偶由17號的陳法蓉勇奪冠軍。陳法蓉當時剛在美國夏威夷大學完成第三年學業，據她所說，她當時發現身體有個腫瘤，誤以為會遺傳她媽媽因癌病早死，所以想一嘗挑戰參選港姐。她剛在志雲飯局裡提到，在複試時需要提名人一起見評判，到達時發現已有幾位佳麗在等候，剛巧她的提名人又趕住返工，所以曾考慮放棄面試，並向在場的一位女工作人員(原來是陳紫蓮，港姐褓姆)示意退出。但陳著她等等，更帶她去隊頭插隊見評判，當時排頭的兩位佳麗原來是之後的季軍梁佩瑚及最上鏡小姐翁慧德，梁更大聲說：「嘩咁靚既，點贏呀？」陳惟有硬著頭皮介紹自己叫Monica。及後見評判時，她更以一句 "我嚟選係想贏架!"令評判留下深刻印象。

到正式參選時，各大傳媒除執著她的"黐脷筋"腔外，最大單花邊新聞莫過於傳她有一個兩歲大的私生子。事源傳聞亞姐那邊有佳麗未婚生子，之後傳到來港姐這邊，並有3個可疑人物，當中陳法蓉嫌疑最大。準決賽時她是最後一位被宣布入圍12名的佳麗，事後有傳她在後台急得流下壓力之淚。競選後期因常被傳媒拿來與另一大熱門翁慧德比較，故亦有傳她們不和，至競選完畢作印尼親善之旅時，情況更加明顯。

當選後，陳法蓉順理成章代表香港參加國際華裔小姐，並奪得亞軍。同年之世界小姐主辦權因落入亞視手中，故她沒有像楊寶玲及李嘉欣一樣，以冠軍身份出戰世姐。儘管如此，她在90年的環姐上一吐烏氣，憑自己計設的一襲晚裝，總分成績排名23(71位佳麗)，是繼楊寶玲後港姐在環姐中最佳成績 (以TVB舉辦的港姐計算)，難怪一眾選美Fans對她甚為欣賞。(圖為陳法蓉選環姐時的晚裝)

                                                                                         

其後發展：

陳法蓉卸任後簽約TVB，90年代早期曾於數齣重頭電視劇擔當女主角，包括「人在邊緣」及「巨人」。她在「人在邊緣」一劇中更與黎美嫻、羅慧娟等成為好友。在電影方面她也很快冒起頭來，代表作包括「靚足一百分」及甚多打戲的「賭俠」。其後所拍之電視或電影均迴響不大。2002年替亞視接拍了一齣以選美為背景的電視劇「美麗傳說」，戲內明爭暗鬥不斷，怎料戲外亦新聞多多。陳在志雲飯局承認，當時劇中一位女藝員曾因收工時間問題向她找晦氣，罵她黐脷筋之餘更出手想打她，幸而她的助手幫她擋了一把。此劇亦成為她拍戲生涯裡最不愉快的經歷。2000年後她多在國內拍戲，亦吸引了一大班影迷。

陳法蓉的緋聞，可能被她的演藝事業更被人注意。她常被取笑跟她前任的港姐李嘉欣"品味相近"，因她們不約而同跟倪震及許晉亨拍過拖。而最近期的轟動新聞絕對是跟剛分手的Tony傳聞。當時有傳她是第三者，又說其男朋友欠債及捲入桃色糾紛中，最後導致分手收場云云。在志雲飯局中，Monica提及此事令他們有所誤會，亦因此事令本來已到談婚論嫁的姻緣告終。她更透露曾因此事想過輕生，幸現時雨過天青，重新振作。

 

最後嚟一張醒神既相啦

所謂10年人事幾番新，何況兩個10年呢？唔知Monica睇返呢段片，會唔會覺得好唏噓呢？