港姐獎門人

尋日港姐四甲陳庭欣、張秀文、莊思明、李雪瑩與一班落選港姐彭慧中、文凱玲、湯寶珍等上獎門人遊戲節目錄影。一班落選港姐與前港姐高海寧朱凱婷等親身落場鬥一番，而港姐三甲因要保住儀態，乖乖做座上客。彭慧中被記者發現神情呆滯，她解釋因為身體唔舒服，但可能一世得一次機會參與此遊戲節目，所以死頂都要嚟!  嘩，果真貫徹爛玩性格喎!

港姐四甲與何樂翩、李文煊、林碧珍齊齊睇騷，

張秀文同李文煊好似好好傾咁喎

彭慧中病到面青青

高海寧俾定貼士師妹防走光

話時話，其實每年港姐完畢後，一眾落選佳麗都例派會上曾志偉既獎門人出下鏡拎下獎品咁。我最印象深刻既係97年，14號劉鳳儀全晚表現最好，立哂D獎!  我嘗試google睇下有冇當年既相，當然搵唔到啦，但見到有個維基百科講獎門人，仲列哂咁多集既嘉賓同邊個勝出既名單，我都好佩服D人可以咁好記性呀!

超級無敵獎門人之再戰江湖

奇怪的企位問題

2010年港姐已塵埃落定個幾星期，各得獎佳麗亦馬不停蹄四出領獎，又做親善，非常之忙。每當佢地成班出席呢d活動既時候，企位例牌set定，如果正正常常得三個，當然冠軍企中間，亞軍就企響冠軍右手邊，季軍就係左手邊；而如果得獎佳麗有四個，第四位通常企響亞軍右手邊，好讓冠亞軍站在中間位置。

但唔知點解，今年既企位非常令人不解，最上鏡小姐李雪瑩永遠都係企響季軍莊思明左手邊，令到莊思明同冠軍陳庭欣不斷企在中間位置，而亞軍張秀文則慘遭靠邊站。所謂崩口人忌崩口碗，TVB口口聲聲沒有優待莊思明，咁唔該佢解釋一下。

選當晚已經係咁

領獎又係咁

見邵爵士又係咁

做親善更加係咁

反觀同樣係有4位得獎者既2008港姐，旅遊大使高海寧係企響亞軍陳倩揚隔離，咁先係正路架嘛。

學下我地點企先啦!!!

2010 MissHK Bloggers' Choice 賽果

大家有睇友台Fun生活既都知道2010 MissHK Bloggers' Choice既賽果已經塵埃落定喇，Fun其實已經搞到成個Show咁宣布呢個賽果，已經好grand，但我作為一個協辦機構，所以我循例上都要響呢邊公布個賽果!

進入八強既係:
5 莊思明
8 彭慧中
9 李雪瑩
10 馬鈞怡
11 李文煊
13 陳庭欣
14 李俍嬿
15 張秀文

而奪得國際親善小姐既係:

9號 李雪瑩 (7/24票)

第二名: 11號 李文煊 13號 陳庭欣 (4/24票)

最上鏡小姐係:

8號 彭慧中 (15/24票)

第二名: 15號 張秀文 (3/24票)

第三名: 11號 李文煊 (2/24票)

最佳泳衣演繹獎係:

13號 陳庭欣 (7/24票)

第二名: 10號 馬鈞怡 (5/24票)

第三名: 8號 彭慧中 14號 李俍嬿 (4/24票)

最佳變臉大獎係:

9號 李雪瑩 (7/24票)

第二名: 5號 莊思明 (6/24票)

第三名: 13號 陳庭欣 (5/24票)

季軍:

14號 李俍嬿 (81.852分)

亞軍:

13號 陳庭欣 (81.955分)

冠軍:

8號 彭慧中 (83.080分)

恭喜哂各獎項得主!!

其實成個計分過程都好好玩，收到各評判既分數紙，見到各評判對不同佳麗既評分，感覺很有趣，雖然花了唔少時間整個scoresheet，不過真係好enjoy!  而俾分過程亦相當緊湊，當晚一路要顧住睇show，一路係咁俾分，仲要食飯，真係multi-task到好似返工咁，但實在好好玩呢!

我既分紙大公開呀!!!!!!!!!

睇港姐猶如心臟病發

好喇，終於有時間可以寫下對今屆港姐既review!

星期日晚約六點半，我相約友台Fun生活博主兼港姐expert #1阿Fun及幾位選美戰友一齊到Fun屋企觀賞2010年香港小姐，席間我地有一位特別嘉賓08澳姐季軍Cherry咁岩過開來香港搵阿Fun，便索性一齊觀戰，實行選美人評選美。

開騷前見有D時間，我地重溫2007年既"精彩片段"，當年我地響紅館尖叫既聲音，永世不忘，亦可以此DVD為證!  估唔到咁快又三年，但更估唔到既，今年我地既慘叫聲，直逼當年!!

呢一晚既情況，猶如一個有心臟病既人，幾開心咁開始一頓晚餐，突然間心臟病發，到差D要死既時候，有個醫生走出黎救醒佢!!

8點到8點半既福祿壽美麗密令，不提也罷。

8點半, 開騷!

紅館個場之前嗰晚仍然係林峰開緊騷，不足24小時要轉港姐台，可觀程度可想而知。今年用LED技術投射佈景，鍾唔鍾意就見仁見智。我就鍾意傳統舞台，夠大夠grand，但如果仍然沿用前幾年咁求其擺個冠響台就當係有舞台設計，咁投射佈景都算係一個唔差既alternative!

第一PART - 自我介紹加晚裝
佈景度門一開，一班港姐在門後靚靚擺定甫士準備出場。嘩!!!  TVB轉死性呀?  俾班佳麗放哂d頭髮落黎喎，唔係咁荀呀嘛?  一直以黎我都好怕TVB搞d懶in既頭出黎，完全糟蹋哂一班佳麗(尤其已經唔多靚嗰批)，所以今次見到呢d髮型，即刻開心哂。可能見舊年D女仔出場講到窒口窒舌，今次又採用返07/08年既pre-record自我介紹，仲講下自己點解可以做冠軍。喂d女仔行得ok喎，個個都靚咗，擺甫士自然咗，臨尾仲有陣風吹起d頭髮，用得呢個效果醜唔到去邊啦真係。d衫喇喎，都係TVB一貫作風啦，唔知係咪要切合返印度既主題，d衫都係叠黎叠去叠幾層，但叠得好累聚下。撇除呢樣，呢part整體我都幾滿意。

掂:
10號 - 行出黎靚過平時好多，有台型，catwalk唔錯，有大將之風
8號 - 講樣超哂班，有自信，髮型靚
14號 - 淡定，好醒神

唔多掂:
其實呢part冇乜邊個出事，要挑剔既可能係11號，有乜理由錄定既聲帶可以逐個字"戥"出黎架呢? (佢當晚其他時間講野冇咩事)


第二PART - 娃娃裙嘉年華
第一Part都未讚完，即刻要收口。

呢d咁既娃娃裙其實冇咩，擺響兒歌頒獎典禮好靚添，放響港姐即刻出事!  大家記得楊婉儀扮美少女戰士嗎?  其恐怖程度不下於張嘉兒扮William Hung架!  要知道港姐好多佳麗都係屬於成熟大方派，要佢地扮細路女跳黎跳去，實屬不智。兒歌揀較女性化既(如小忌廉, 千年女王)好正常，但以為今晚可以唔洗見到班巨聲，點知隻耳都係要聽到，搵佢地唱兒歌仲要打埋佢地個名，驚死人唔知!  我想問下TVB本身係咪想將d佳麗打造成音樂盒上既公仔咁既效果呢?  即係音樂一出就會逐格擺pose?  好彩15個群舞時效果唔錯，睇港姐幾時都係唔少得呢樣!

掂:
冇乜邊幾個

唔多掂:
太多，1號個髮型勁師奶，3號個樣錯哂，5號想笑唔笑點做細路女，7號塊面僵硬到，9號嘥氣，11號可以扮路家敏唱"個鐘的嗒跳"，12號以為fit哂點知個妝咁

第三PART - 自選Catwalk
首先想問，點樣自選?  即係有15 set甫士俾佢地揀，定係佢地自由創造鍾意點行點擺甫士都得?

今年主題係花生騷行Catwalk，少咗繁(煩)多既舞步，確係對一班選美迷一個好消息。不過TVB好鍾意畫蛇添足，行Catwalk都硬係要加d騷首弄姿，驚你嫌悶，點知越搞得多越衰。估唔到Janet Ma都勇於指出呢個問題，但乜呢三位嘉賓(加埋Benny Yeung & Grace Yu)原來每人講得一句架咋?  睇佢地個樣都唔多Happy咁喎!  話時話，我幾鍾意睇佢地5位佳麗行完匯埋一齊，個pattern幾好!

掂:
都係10號啦，應該呢個時候先播千年女王啦，成個Queen咁
8號: 單眼單得幾自然喎，d宅男實暈曬浪

唔多掂:
12號 - 行到似機械人
4號 - 一出黎嬲咗成村人咁，真係行runway咩
5號 - 都係患得患失既笑容，唔知佢想點

第四PART - 泳裝加問答
成個問答，歷時一粒鐘!

預咗呢一part福祿壽會扮野問d港姐，其實選美要咁樣做問答，即刻係要打大交叉，不過TVB係TVB，當無奈要接受下，都要分做得好定做得衰。問心嗰句，佢地今次做得唔算太cheap，係幾好笑添，但點解唔係每個佳麗都有人扮野問先?  呢個變咗係公唔公平既問題，有d佳麗遇著有福祿壽扮野，時間都預咗3/4俾佢地，得1/4時間可以答，答答下又要俾人窒住；有d呢，就可以輕輕鬆鬆答哂成條問題，暢所欲言。好戥6號林碧珍唔抵，雖則佢既speaking skill我都唔寄予厚望，但成part只能說一句: 我冇欠你架!   無言....................

掂:
9號 - 把聲同個Tone 9成似楊婉儀，答得係好得體
15號 - 說話技巧都係佢強項之一
2號 - 世界女聲氣
4號 - 講野確係成熟d，好少hmmmm, errrrrr之類
8號 - 出奇地鎮定同流利，keep住笑容燦爛

唔多掂:
1號 - 講野甩甩咳咳
5號 - 講野其實ok既，但聲氣好鬼"倔雷搥"
6號 - 講得一句

勁唔掂:
3號 - 遊魂一樣

第唔知幾PART - 歌舞加歷屆港姐
近幾年港姐，幾乎唔會請TVB藝人以外既嘉賓，今年一樣!

乘大結局餘威，先黎「情越雙白線」既主角黃浩然同徐子珊。

再黎唱咗幾日紅館都唔厭既「亞太區最受歡迎男歌手」林峰!

再請近排冇得去殯儀館所以得閒行過幾步到紅館既鄭嘉穎!

歷屆港姐出場，有久違了既羅錦如同梁小冰，仲有陳法蓉以阿姐身份叉住腰講: 一日港姐、一世港姐!  邊個夠佢威!!

成個畫面同07年致敬一樣，都係果班人，都係類似既衫，都係果紮花!

Top 8
第一期心臟病發開始!

首先，本來一直好地地既髮型，點解變咗紮起哂架?  紮都算，唔好紮到咁衰丫，5號個「達摩頭」咁都可以出鏡?  唔係路呀....   不過對比之後既驚嚇，原來呢d係濕濕碎!

第一個嗌3號出黎，我諗全香港人O咀半秒，然後慘叫!!
點解呀?  個樣包底，講野遊魂，都可以入到8強?  點講都講唔通啦!  呢個款真係講野講到好似余若薇咁都唔入得啦下嘛! (諗諗下真係其實余若薇可以選並能進身8強)!

第二個嗌4號，ok啦!

第三個嗌5號: 喂TVB唔係呀嘛，學92年咁乜都順序嗌呀?  邊刺激呀?

第四個嗌8號，但第五個嗌15號喎，以為會random宣布，點知第六個嗌13號，原來係換湯唔換藥，調轉嗌!

第七個嗌10號，跟住我即刻同其他人講，咁一定係9號喇，順住落，點知真係!

11號係可以好多野挑剔，但佢點秤都衰唔過3號同9號卦?
我地既14號，我都知唔會去得遠，但都不至於入唔到8強囉!

呢刻個心，feel到跌咗落個肚。

Top 4
好，播完廣告，TVB又例牌做d搞喊佳麗環節，播下佢地辛苦片段，問下佢地感受，在亳無比賽環節下再黎宣布4強，實屬無聊!

好，第二期心臟病發開始!

TVB好似每次宣布第一下都要嚇死你為止!

第一個嗌9號，真係想喊，唔係講笑!

第二個嗌13號，可以接受!

第三個嗌5號，哇咁即係8號同10號是但一個冇啦!

sorry係兩個都冇喎，15號入呀!

宣布賽果
到呢一刻，其實冇咩求，只希望9號唔好係冠軍(唔想再黎多個更矮既)!

先頒國際親善小姐，去到呢度，預咗係13號攞架啦!

頒最上鏡小姐時，全屋人喪嗌8號，點知曾志偉一聲: 9號!   我慘叫一聲 (後來成為全晚最慘痛一叫)

驚魂未定，又要應付宣布三甲既挑戰 (好似我選緊咁)

季軍: 5號莊思明，其實係有貼佢，不過佢最尾個妝真係好嚇人下，偏偏D人只係睇頒獎嗰刻，見到咁款，唔鬧鬼咩

亞軍: 15號張秀文，講真我真係冇預佢可以去到亞軍呢個位，不過是夜佢扁桃腺發炎得好勁，有咁既表現算係咁。

呢一刻，台上只剩9同13。

雖則照秤實係13，但Fun提我唔好咁老定，另一戰友亦晦氣地講: 實係9號架喇!  呢刻我真係對賽果冇乜信心，覺得真係五五波!

劉倩婷行出黎，希望佢係要"趷"高腳crown個新港姐!

曾志偉: 2010年香港小姐冠軍係
陳百祥: Two Thousand "廳", Miss Hong Kong "Pigeon", the winner!

13號陳庭欣!

一路開心到彈起，一路抹汗!

睇完個騷，應該用咗3000個卡路里!

冠軍: 13 陳庭欣

亞軍: 15 張秀文

季軍: 5 莊思明

最上鏡小姐: 9 李雪瑩

國際親善小姐: 13 陳庭欣

佳麗短評

冠軍 13 陳庭欣

陳庭欣表現屬中上，穩穩陣陣唔出錯嗰類，

講野係好，但聲線都係有少少尖咗D，可以

Tone down返d會更好! 笑容始終係弱項。本身都係

黑馬人選，入到冇哂大熱既四強，真係唔揀佢揀邊個。

亞軍 15 張秀文

張秀文帶病上陣，開始時還算可以，但後段

至宣布賽果時，疲態盡現，對眼dup哂，笑容

牽強，答問題無厘神氣，相信真係非常之累!

拎亞軍真係超額完成，答問題亦都show到佢witty

既一面，相信佢入娛樂圈都應該幾吃得開!

唔知點解我成晚覺得佢係漲咗既黎姿咁

季軍 5 莊思明

全晚最大敗筆莫過於佢穿旗袍時既「達摩頭」，

事後佢都忍唔住要話信錯個髮型師，認真慘情。

不斷令人感覺進步既佢決賽表現其實只屬OK，

catwalk不俗對答流利，不過笑容唔夠，俾人

惡既感覺，難怪觀眾緣認真麻麻。

最上鏡小姐 9 李雪瑩

賽前冷馬之一，決賽夜樣貌忽然升呢，講進步

佢一定係最勁，但可以去到"最上鏡"我就有d保留，

Top 8 Top 4不斷嗌佢個名更令人驚嚇。講野

真係好鬼似楊婉儀，不過身高仲要矮多一吋，

真係好難接受再多個咁既冠軍。

前八名

3 張藝婷

全晚令人最R頭既佳麗，樣貌急才皆欠奉都可以

殺入八強，全港嘩然!

4 文凱玲

呢晚文凱玲冇俾TVB整得"再衰d"已經還得神落，

入八強尚算合理。原來評判張家輝戥佢拎

唔到冠軍唔抵喎，算啦真係。

8 彭慧中

如果你想知咩叫好上加好，彭慧中絕對係人辦。

平時個樣已經係好，決賽夜成個look可以再好d，

問你死未!  每次出場個樣都係最佳狀態，而且表情

豐富，唔係死擺住一個樣，活力十足。對答亦

出奇地淡定，有自信。最上鏡小姐本應十拿九穩，宣布

時叫咗佢隔離出黎應該搞到全港一地都係眼鏡碎。惟一

挑剔既係身高，不過既然同屬5'3"既9號都入到4強，

佢有乜理由唔入先?

10 馬鈞怡

馬鈞怡同彭慧中一樣，係今屆輸得最慘情既佳麗。

有樣貌有身高有前有後有學歷有catwalk有啖吐，都只係

可以八強止步兼零獎，天理何在?  佢自選catwalk件衫，

真係唔係非一般人可以carry到，但佢就演繹得好好!

top 8時喊住都可以講d咁感性又大方但唔作狀既

肺府之言，一d都唔容易架! 決賽一路做時好多朋友

一路SMS我話10號得，其實選咗佢，今屆既反響會

唔會細好多?

其他佳麗

1 黃安琪

成件事都好Forgettable，個樣好悶唔在講，

估唔到答問題都好一般，四平八穩得黎

好反面教材feel!

2 張莉莎

講真佢係ok喎，樣貌上鏡，對鏡頭敏感自然，

行Catwalk唔錯。不過as a 香港小姐就真係

好難令人受落。

6 林碧珍

同1號一樣，都係過目即忘佳麗，我懷疑

佢係15個裡面最低分。

7 何樂翩

每次見佢出場都以為郭可盈選緊，好多選美experts都

唔多buy佢但我真係覺得佢個樣幾decent喎。冇錯佢係

過瘦，而且面部表情頗僵硬，死顧住1號樣，2號pose咁!

講野ok，但成晚冇果種港姐神采，注定落選。

11 李文煊

其實我覺佢個樣可以係好靚，但偏偏TVB硬係要搞到佢塊

面又圓又多油。講真計當晚齋樣佢未必入到五甲添呀，又

一慘遭糟蹋既佳麗。佢既廣東話接近91李似白Level，真係

好難叫人選佢，但亦不至於入唔到8強卦?

12 湯寶珍

個妝非常出事，係咪俾人整古先? 老咗10年!

一出場都知應該同最上鏡小姐呢個獎bye bye!

講野堅持keep住annoying聲氣，冇得救!

14 李俍嬿

我勁like呢張相，靚啦! 一出場見佢個樣神采

飛揚，問答環節又尚算流暢，以為佢有d機，點知

8強都冇，好失望呀!

(補充: Fun話呢張相靚到好似D環姐semi-finalist添)

後記

心水清既網友們，有冇覺得是次賽果同某一屆特別相似?

估中喇，係2006年!

1) 三甲依次序均為 13、15、5  Win & Place都中哂!

2) 冠軍都係姓陳 (2006年陳茵媺)

3) 季軍都係當屆三甲裡最高 (2006年呂慧儀 5'9.5")

4) 兩屆頂頭大熱但都倒灶既都係8號 (當年為徐淑敏)，兩個都叫咪神!

有d野就係咁岩得咁橋!

港姐三甲誕生

好喇，我終於由一班港姐粉絲既home gathering返黎喇，全晚成班都WE嘩鬼叫，又尖叫又發癲，熱鬧非常!!   不過整個過程稍後暢談，容許我循例都講下賽果先!

冠軍兼國際親小姐: 13 陳庭欣

亞軍: 15 張秀文

季軍: 5 莊思明

最上鏡小姐兼前四名: 9 李雪瑩

前八名: 

3 張藝婷

4 文凱玲

8 彭慧中

10 馬鈞怡

最後衝刺

今晚決賽喇，相信15位佳麗將會施展渾身解數，將最好既一面俾大家睇，力爭后冠。

昨日一眾佳麗亦例牌著泳衣見傳媒，並即場抽個幸運佳麗，試戴后冠，最後由9號李雪瑩被抽中。根據過往經驗，被抽中佳麗都好少會真正可以得冠軍，確係唔知被抽到係開心定唔開心。

唔寫咁多喇，之前都有篇水蛇春咁長既review，不如大家靜心欣賞今晚既決賽好過啦!

1號黃安琪、2號張莉莎、3號張藝婷、4號文凱玲、5號莊思明

6號林碧珍、7號何樂翩、8號彭慧中、9號李雪瑩、10號馬鈞怡

11號李文煊、12號湯寶珍、13號陳庭欣、14號李俍嬿、15號張秀文

9號  祝妳好運!!!

2010年香港小姐之蛻變

明日就到港姐決賽喇，大家係咪非常緊張呢?

今年港姐質素之平均絕對係近年之冠，個個都似乎有機會入五強，冇一個有絕對優勢。橫掂決賽在即，不如同大家回顧一下各佳麗由面試到而家既蛻變過程，重溫一下大家呢兩個月對眾佳麗既感覺係點!

1號 黃安琪 Alice Wong

24  5'5.5"  98lbs

學生

1號黃安琪係來自溫哥華既三位海外佳麗之一，並曾經於2009年參加溫哥華華裔小姐。Alice甫一出場已被傳媒評為曹敏莉翻版，點知佢最似Mandy既部份原來係把聲，語氣(尤其佢最鍾意用既結尾"Thank You")真係100%一樣!  Alice屬四平八穩佳麗，參選過程接近零新聞(不論好壞)，不過佢update個blog非常之快，所以點擊率一直穩佔三甲。而我覺得佢既笑容就真係唔多夠，在港姐特輯中經常會影到佢目無表情或乸口乸面，似乎呢方面要改進一下。最近一次報章提到佢既名係會晤評判當日，記者問曾志偉對佢既睇法，原來圍內人士都幾貼佢架喎。從來1號都係蝕底D，Alice你要加把勁喇。

2號 張莉莎 Suyen Cheung

25  5'6"  108lbs

學生

已獲獎項: 現場最受歡迎佳麗 (印度之旅圖片展)

2號張莉莎本是Jelly Girls組合成員(本人其實從未聽過)，腳踏半個娛樂圈既佢未入圍已狂被爆料及刊登性感照片，更缺席首次港姐閉門會議及抽號儀式。入圍後Suyen明顯行事低調，跟佳麗亦採取融和態度，負面新聞亦隨之減少。喘息過後默默發力，在各項活動上均以頗佳姿態示人，新聞圖片好少出事，之後更以淡定姿態描述印度之旅所攝圖片而獲得最受現場歡迎佳麗，成為今屆港姐第一位得獎者。然而佢既形象始終係幾"藝員"，所以再下一城應該冇乜可能，叠埋心水入TVB啦!

3號 張藝婷 Janice Cheung

21  5'7.5"  123lbs

學生

3號張藝婷並沒有出現於第一輪面試，估唔到單刀直入第二輪面試即刻報捷，爆冷入圍今屆港姐。Janice亦屬於零新聞佳麗，相貌唔算討好，尤其印度之旅特輯有幾個closeup影到佢d超誇牙肉，甚為趕客，不過5'7.5"既身高唔多唔少都幫佢加番D分!  難得佢在香港小姐特刊提到參選並非為加入娛樂圈，而幕後人員亦讚佢進步神速，姑且睇下佢決賽有冇令人難忘既表現喇!

4號 文凱玲 Connie Man

27  5'6"  106lbs

機艙服務員

4號文凱玲絕對係港姐賽制改革後首位得益者，以27之齡入選港姐可謂係前無古人。Connie一出場已被傳媒冠以「港版蕭亞軒」之名，其有性格既外型更深得圍內港姐experts歡心，捧之為"飛佛"佳麗。但好景不常，入圍後被TVB化個活見鬼既妝，迅速跌Watt，更一度被網友揶揄為「港姐葉童」，令人慘不忍睹，成為本屆被TVB糟蹋得最慘既佳麗no. 1! 印度外景後仍然冇乜起息，更被報章刊登所謂"攬仔照"(其實正常到無侖)。不過似乎大眾仍然對佢不離不棄，在「最具冠軍相網上投票」穩佔前五名，而近期既珠寶catwalk更騷事業線，狀態有所回升。

5號 莊思明 Lisa Ch'ng

23  5'8"  114lbs

學生

已獲獎項: 最佳珠寶演繹獎

5號莊思明挾著莊思敏個妹之名參加今屆港姐，順利成為傳媒焦點!  一出場即被一眾網友評為樣貌甚為平庸，氣質欠奉。未正式入圍已被傳媒起底話佢同一Les吧老闆過從甚密，入圍後負面消息不斷，一時被指內定冠軍，又傳係佳麗中既「金手指」同在印度"撞鬼"。不過日久見人心，莊思明俾人感覺越來越正面，一來經TVB執過後樣子順眼好多，二來睇佢講野有紋有路，舉止大方有禮，絕冇富家女既公主病，而響佳麗當中亦睇得出頗受歡迎，不論在其BLOG或競選珠寶演繹獎時都得到其他佳麗力撐，呢樣野真係冇得呃。惟望佢繼續KEEP住好表現，決賽夜做得好好睇睇啦。

6號 林碧珍 Janice Lam

23  5'4.5"  105lbs

學生

6號林碧珍在面試時亳不起眼，入圍後亦唔見draw到咩attention，競選過程最大新聞亦都係其所謂攬仔照，其實真係冇咩事。最礙眼莫過於其BLOG內所寫之港式英語，MK非常，加上平凡外貌及5'4.5"既身高，輕易成為今屆陪跑大熱。

7號 何樂翩 Krizia Ho

22  5'6"  102lbs

見習審計員

7號何樂翩面試時已有「直鼻郭可盈」既美譽，樣子真係有8成似，不過連排骨身型都似埋，所以連花名都改稱為「骷髏郭可盈」。全程最為人詬病既係佢甚為唔自然既樣貌，開頭都係齋傳佢整容，及後有周刊刊登佢年輕時既樣貌同05年參加I luv u boyz搞既活動照片，同現在樣貌相差甚遠，有指其照片更似4號文凱玲，不過當時人例牌否認。其實佢個樣都幾decent，講野亦唔算差，不過硬係覺得佢決賽夜都唔會有咩作為，唔知點解。

8號 彭慧中 Phoebe Pang

21  5'3"  98lbs

學生

如各BLOG友有留意開港乜姐，都知8號彭慧中係我開始時甚為買重既佳麗，外貌端莊，笑容甜美，而傳媒亦加咗個「Sweet版鍾麗淇」咁靚既朵俾佢，實屬難得。可惜一入圍見到佢相比其他佳麗成個凹咗落去，頓時要打退堂鼓，原來真係得5'3"，嘥哂。8號絕對係今屆港姐既見報王，日日新相不斷，又攬仔又煲煙又爛浦，乜都出齊。加上其逼爆上圍，而今時今日既傳媒採訪態度，定成焦點，每逢泳裝照必定有其單人相。雖然負面新聞未停過，但一眾網友仍認同佢既樣貌算係今屆上等貨色，好多人都貼佢拎最上鏡喎。

9號 李雪瑩 Crystal Li

24  5'3"  93lbs

法律事務助理

9號李雪瑩係來自倫敦既海外佳麗，何麗全話今年海外application有二千多份，估唔到都係呢D貨色，5'3"身高加平凡外表，真係唔可以帶起咩話題。將勤補拙，佢既BLOG真係寫得好好，文字大方又UPDATE得密，好多網友都因為佢寫既野成為佢既粉絲，亦令佢長期保持tvb.com點擊率no. 1，如果佢有微博，應該可以輕易吸納過萬粉絲。講野勁似楊婉儀，不過相信眾港姐迷都唔想再黎多個。

10號 馬鈞怡 Queenie Ma

24  5'9" 119lbs

客戶經理

已獲獎項: 最傑出表現獎 (排球比賽)

10號馬鈞怡亦都係來自溫哥華既海外佳麗，曾參加07年溫哥華華裔小姐得「一見傾心佳麗獎」，但三甲不入。甫出場便被傳媒定為最省鏡海外佳麗，競選初期除一輯「啜仔相」外，冇乜新聞，但後段開始發力，先係排球比賽活動中，被評判勁讚禮讓及遷就唔識打波既佳麗而奪得最傑出表現獎，予人好感。之後被揭為名設計師Walter Ma既侄女，但仍保持低調。而在最具冠軍相投票當中，常名列前五名，亦成傳媒及網友心目中三甲人選，決賽夜醒醒定定，應該好有機。

11號 李文煊 Elle Lee

22  5'8.5"  115lbs

項目統籌

名舞蹈家張天愛提名參選既11號李文煊，面試時被冠以「的骰子淇」既雅號，十分受注目。未入圍已定為頂頭大熱，有傳TVB亦為遷就佢既舞蹈比賽，將首次會晤傳媒既日期押後。入圍後即被傳內定冠軍，又被指在學時態度囂張，無心學習，激到張天愛多次出黎澄清。而TVB亦未識死，競選過程好似特別照顧佢咁，一出場有條與別不同既裙，印度外景又成日抽中坐象著民族服裝，難免造馬之聲不絕。同10號相反，李文煊屬越戰越冷佳麗，情況有D似92年9號既朱虹，而事有湊巧，Elle說廣東話亦甚有鄉音，加上對答技巧唔算特別標青，呢個環節確實對佢甚為不利，而「路家敏」LOOK亦令佢跌watt唔少。近期已接近冇乜新聞既11號，鋒頭被10號及13號蓋過，真係要加把勁喇。

12號 湯寶珍 Ria Tong

24  5'6"  98lbs

機艙服務員

已獲獎項: 時尚目光獎

12號湯寶珍兩次面試甚至閉門會議當日均不肯除墨鏡讓記者拍照，又扮唔識聽中文，一開始已經乞班記者憎，果然入圍後班記者真係唔放過佢，起勢寫衰佢，又話佢貪小便宜又話佢整容，彷彿做親空姐都會有呢種公主病，連明周呢本中肯雜誌都話佢被受佳麗排斥，情況之壞可想而知。個樣算係唔錯，可惜一開口把聲甚為難頂，令人想扯巴既感覺，如無改善，其實決賽都可以乖乖陪跑。

13號 陳庭欣 Toby Chan

22  5'7"  104lbs

人事顧問

已獲獎項: 旅遊大使獎

13號陳庭欣絕對係深藏不露既佳麗，開頭平平無奇，至外景印度泳裝Shots一出時，升呢樣貌及驕人身材迅即捕捉不少鏡頭，而其淡定有條理既說話方式亦令一眾港姐fans喜出望外，其BLOG內誠懇態度亦令人有好感，惜後期Update次數頗疏，點擊率亦勁跌。已奪旅遊大使獎既Toby，基本上已肯定黎緊一年大家都會繼續見到佢，但可否以較"高級"身份同大家見面，決賽夜自有分曉。

14號 李俍嬿 Kitty Li

25  5'8.5"  122lbs

幼兒課程導師

已獲獎項: 現場最受歡迎佳麗 (才藝表演)

14號李俍嬿面試時已經catch到我雙眼，覺得佢好有exotic feel，幾有95多華姐潘美詩既影子。及後知道佢原來有5'8.5"咁高，迅即成為一眾港姐experts既頭號"飛佛"。Kitty曾參加07年溫哥華華裔小姐，並擊敗10號Queenie奪得季軍。入圍後一直慘被傳媒完全ignore，幸而尾段奪得才藝小姐，叫做有返少少noise!  我就略嫌佢真係低調得濟，希望佢決賽夜impress到評判，拎個尾彩啦!

15號 張秀文 Sammi Cheung

22  5'5.5"  109lbs

學生

15號張秀文面試時以一身成熟裝扮被稱為「漲爆王祖賢」成焦點，不過入圍後TVB刻意化返佢細路女D，加添青春氣息。未入圍已被周刊說憑選美脫貧，努力兼職養家，出奇地正面，不過入圍後就有傳她吸毒，但在亳無證據下不了了之。Sammi一直都係我季軍之選，但睇佢個BLOG話佢呢幾日患上嚴重扁桃腺炎，見評判都幾乎出唔到聲，醫生更建議佢住院五日添!  決賽在即，希望佢快D好返，唔會影響當晚表現啦。

估唔到2010年港姐咁快到尾聲，由當初大家好緊張邊15個入到圍，不斷刮料，到外景到一系列活動，到而家決賽前夕，呢兩個月真係忙於跟蹤最新資料，update個blog，雖然忙但好enjoy，搞到有少少好似自己有份選咁。到而家要完結都有少少唔捨得，不過點都好，我只希望聽晚會有一個好騷睇，同埋好好做個blogger choice!  聽晚大家記得準時睇喇!