前亞姐田琪有個漂亮女兒

2011珠寶小姐正在進行，原來已經辦到第二屆!  而上屆季軍嘉芙蓮原來就係87亞姐13號田琪個女!   嘉芙蓮是中英混兒，15歲去了英國留學，機緣巧合下返港參加去年珠寶小姐!  嘉芙蓮樣貌標緻，被指似梁詠琪，真係好難相信田琪會有咁靚既女囉!

評判鄧達智為嘉芙蓮作狀加冕，

　堅似Gigi喎

87亞姐田琪當年份屬冷門，塊面超巨，

　很難相信生咗個咁靚既女!

譚小環解約無線

94年港姐冠軍譚小環決定結束與TVB 17年賓主關係，主動解約!   由於TVB政策為先安排工作與親生子女，所以非親生女既佢慘遭冷待，但譚小環指明白呢個係商業決定，離開只係想有健康啲既生活同放多啲時間響屋企，而家最唔捨得反而係一班同事。

Halina擁有多項港姐經典紀錄；1. 唯一一位以1號奪冠既港姐 2. 未當選已經成為信和賣相皇后，人氣直逼四大天王及當紅姐仔 3. 首位競選時有粉絲拉Banner撐場的港姐 4. 星途起落幅度最大既港姐，初當選時人氣爆燈，更進軍樂壇，後因掛住拍拖，荒廢事業，早幾年更淪為三四線藝員，成發展最不理想既港姐冠軍!

Halina參選時氣質大方，總決賽更以接近完美之表現摘冠，惟之後派演角色多為倀雞及尖酸刻薄，與參選時確實大相逕庭。

經典泳裝照

歲月催人

香港小姐新聞檔案

原來今屆香港小姐選完翌日，TVB既新聞檔案主題亦都係香港小姐，片段裡有75張瑪莉，80戴月娥，88李嘉欣，及89陳法蓉專訪! 最好笑最後一段記者訪問陳法蓉，話有條較敏感問題，原來只係問佢會唔會留響香港!  車!!

香港小姐新聞檔案

世上無絕對敵人

97年港姐是非之多堪稱歷年之冠，又內定又你唔妥佢又鬧佢八婆又爭仔又杯葛又不滿港姐制度，單單野搞到滿城風雨!  當中參選佳麗劉綽琪更指參選後從來唔會有gathering約出黎食飯，一班佳麗既"友誼"可見一斑。不過世事無絕對既，廿個女仔裡面實有幾個傾得埋，好似早排微博上載咗一幅經典97港姐合照，當中有冠軍翁嘉穗，頂頭大熱19號歐陽妙芝，同埋之後都拍多個廣告既20號林翠鳳。其實過咗咁多年，乜都化啦，多個朋友咪仲好!

學當年15號伍燕妮話齋，但願呢份友誼，

永遠都唔會褪色吖....

咦? 隔離台阿FUN都搞過眼鏡派對喎，

我地啲眼鏡冇呢啲咁"行"啦... ，哈!

No more crown!!!!

收到可靠消息，有黑面樂易玲之稱的12號佳麗王冠已經退出本屆香港小姐選美，原因未明，相信是她不太習慣港姐競選過程吧，由始至終佢都好似投入唔到咁，而且完全唔識廣東話，真係好大障礙呢!

唔知TVB會唔會好似02年咁增設後補佳麗呢?  當年4號林曉維及17號余綺文均以"熱熱地"姿態甫亮相後不久便退出，TVB"罕有"地補上4號劉啟兒及17號劉若莉，惟兩位佳麗最終均不能進入決賽。

TVB.com內的港姐主版面(上)及pull list(下)

均已清除12號王冠的資料

林曉維 & 余綺文

劉啟兒 - 註定陪跑

劉若莉 - 本來平平無奇，到塞班島拍外景後

一鳴驚人，憑身裁日日見報。落選後做過

一陣獎門人歡樂小姐

 

乜咁經典: 給香港小姐

2002年港姐30周年，TVB為咗紀念呢個特別年份，故特登製作此歌「給香港小姐」。當初知道TVB有此構思，我expect係一首中慢版既歌，以突顯港姐高貴優雅形象。點知首歌一出打咗個突，原來首歌係走輕快活潑路線，起初我都頗唔接受，但聽聽下，又覺得聽落幾舒服幾唔錯喎，當然楊千嬅既演譯要記一功啦，而Wyman既詞都填得好"到"，唔會太hard sell港姐但又貼題，最鍾意呢句: 「感激當我一歲起，讓我看見世界那麼美，台下有我，台上有你，甜夢那一刻發起!」寫盡一眾香港小妹妹第一次識睇港姐既感覺! (當然大個咗仲係咪咁諗另作別論, 哈)

呢首歌其實有兩個版本，一個係楊千嬅單刀演譯，而另一版本係楊千嬅加一眾2002年候選港姐(話)一齊合唱。呢首歌響之後既港姐都好常用，尤其其背景音樂，好常用於港姐特輯裡面既間場音樂。

一齊重溫下呢首經典MTV先。



睇完呢個MTV，我有兩個問題想考下大家：

1. 片中囊括大部份港姐冠軍，但有幾位冇包到喎，係邊幾位呢?

2. 唯一出現唔係冠軍既港姐係邊個呢? (唔計果D唔覺意影到企響後面既落選佳麗及2002港姐。)

乜咁經典 ─ 94港姐同臭四拍外景

時為1994年4月，一眾94候選港姐與當時仍然脾氣好臭既鄭秀文一齊出席酒會，預祝往意大利拍攝外景順利!  但唔見吳奇隆喎!

相裡面既譚小環仍然清秀，李綺虹好細路女，陳芷菁仍然好"大方"，活麗明好sharp，張可頤幾上鏡，黃釲瑩同吳素珊影唔到，康華都仲係咁四線!

乜咁經典: 莫可欣有陪六叔架!

時為1993年台慶，當年有傳六叔對新出爐港姐冠軍莫可欣有意見，故此很多時出席公開活動都要求搵藝員曹眾陪伴，而不是照慣例的應屆港姐冠軍。不過呢張相證實六叔唔係完全唔搵Hoyan陪啦!

莫可欣在08年ATV「選美風雲五十年」亦有提及此事，她稱當年不斷出國作親善訪問，故不可能每次出席場合均陪伴六叔，她並說相信六叔這麼大的人物，不會計較由誰陪伴出席等咁小既事。莫可欣真係答得好得體喎!

原來莫可欣眨下眼已經係17年前既港姐!

今年台慶係咪43年呀?

只出現過一次既Sub港姐選美 ─ 環球小姐香港區選拔賽

時為1987年，因當年環球小姐由過往既7-8月舉行提前至5月，1986年港姐冠軍李美珊已參加了1986的環姐，而1987年港姐仍未選出，故此TVB特登舉行一個環球小姐香港區選拔賽，選出一位香港代表參加在新加坡舉行的環姐。當年TVB為咗幫歡樂今宵5000次造勢，更安排是次比賽在此節目中舉行!

當年原本有12位佳麗角逐，後來1位佳麗退出，故此最後只有11位在台上。聽一些選美專家講當年此選美令市民有些混淆，誤以為是港姐一部份，更有一些女仔以為係87年港姐招募而報名，當中包括最後有參選87港姐並落選的12號鄭維嘉，她在TVB都做過多年四五線演員。

參選佳麗芳名如下：
1) 鄭美瑜
2) 彭笑梅
3) 唐杏元
4) 鍾淑慧
5) 李逸芬
6) 李麗芳
7) (退出)
8) 孫莉娜
9) 殷麗影
10) 陳曼莉
11) 梁靜雯
12) 馮玉兒


11位佳麗，其實有好幾位都頗驚嚇，所以唔好話以前選美既就一定靚呀! 不過都可能因為咁，87年真正港姐既質素係歷年數一數二喎!

是次比賽既冠軍為4號鍾淑慧，佢同時兼得「最具氣質獎」。鍾淑慧其後在無線及電影圈發展，參與過多部三級片演出，後嫁演員吳岱融。三強分別還有10號陳曼莉及12號馮玉兒，陳曼莉亦係92年既國際華裔小姐冠軍，代表多倫多。當時亦有觀眾替2號彭笑梅不入三甲不值。

睇睇冠軍鍾淑慧當年對答


三強跟張學友演出環節


驚嚇佳麗之首 ─ 3號唐杏元之對答

懵下懵下選錯美既鄭維嘉，最後都報番87港姐，

以佢一堂粗眉，入選先奇

Ricky Martin又關港姐事?

今日外國娛樂新聞頭條，絕對係Ricky Martin親證自己係gay呢單料!  不過呢單料唔算爆，因為不論直人攣人，一早都認定佢係gay，只係爭在佢認唔認架啫.....

其實Ricky Martin都同港姐有少少淵源，因為佢喺2003年港姐歷史最後一次既準決賽裡面，負責頒"完美組合獎"，得獎組別係演戲既百變伊人組。

Ricky Martin以國際巨星身份肯出席電視城舉行既港姐

"準"決賽，都算係咁。圖為百變伊人組組員左起2號曹敏莉、

9號林艾瑩、15號陳容梅、17號李嘉怡(組長)、19號區婉澄，

五個最後都入決賽喎。

"咁啱線"其實今日曹敏莉都有新聞，係響上水某

商場同胡杏兒&李毓芬宣傳花卉展。

乜咁經典：翁杏蘭勁舞@國姐

時為1990年，港姐亞軍翁杏蘭代表香港參加國際小姐，以港姐semi-final著過既泳裝出場，同場加插疑似抄襲港姐final環節"形格大挑戰"既甫士!

值得一提係大家可以睇睇佢之後嗰位冰島小姐，木口木面做早操咁，生硬舞姿衰過89年黃慧儀!

可跳至3.11分直接欣賞。