2010港姐首晤評判

2010年香港小姐終於踏入最後衝刺階段!  一班港姐昨日於尖沙咀某酒店會晤今屆五位評判，包括立法會議員林大輝先生、虞茱迪女士、機管局總裁許漢忠太平紳士、影帝張家輝先生及郭富城至愛熊黛林小姐。今屆嘉賓有Metro Vocal Group，更有歷屆港姐如陳法蓉、楊思琦、梁小冰等撐場! 而司儀則由曾志偉、陳百祥、阮兆祥擔任。

被問到今屆港姐質素，曾志偉說：「今屆港姐猶如當造荔枝，好難揀呀，個個質素都好平均，心水係"大冧巴"佳麗啦!  不過好多人都鍾意1號黃安琪，但印象中好似冇1號得過冠軍喎，因為第1個評判唔會俾分太重手!」吓?  乜志偉唔記得咗94年譚小環既精彩表現咩?

而張家輝指選港姐唔同平時睇女仔咁：「而家係選個女仔代表香港，要有香港形象，而大會亦有評分標準，今次見面會佔我既總評分30%!」(嘩乜咁認真?) 而佢亦補充：「個女仔本質係點，唔會可以呃到我，我睇人好叻架!」死喇咁張影帝會唔會只睇內涵而忽略外貌呢?  擔心ing

熊黛林則以一身黑裙出席記招，佢同張家輝類似，都較著重班女仔內涵同對工作既態度。被問到曾經有否考慮選美，佢話：「當年我冇呢d野架，我只參加模特兒大賽，如果有(選美活動)我都會參加。」真係好想知Lynn指既當年係幾時?  戰前?

一班佳麗以清麗化粧及打扮晤評判，合格!

Metro Vocal Group以廣東話表演，期待決賽夜演出

評判與佳麗傾談，其實已暗裡俾分

「最具冠軍相佳麗網上投票」五強

4號文凱玲、8號彭慧中、10號馬鈞怡、

11號李文煊、13號陳庭欣

入直路喇，各位加油!