亞姐唔CHUM菲女玩

今屆亞姐又開鑼，照慣例亞視將會邀請亞洲各地佳麗代表參加總決賽，但鑑於日前港客在馬尼拉慘遭挾持兼殺害事件發生，ATV負責人宣布不會邀請菲律賓代表參加本屆亞姐，他說：「我地咁做係顧及佳麗感受，避免佳麗遭排擠及有心理壓力!」不過此舉卻遭旅遊界議員謝偉俊炮轟：「佢咁做係歧視菲律賓人，俾人覺得香港人好小器，應該留返決定權俾菲律賓代表自己決定。」

而另一邊廂負責TVB「國際中華小姐」既曾醒明則表示，會繼續俾馬尼拉代表參賽，因為代表係華裔，唔擔心參賽有問題。

亞姐對上一次有菲代表為06年，安娜嘉蓮娜(右)

為友誼小姐

戚黛黛又開騷

03港姐季軍戚黛黛，未參選前已經參加過新秀，選港姐時亦以歌唱作才藝，佢鍾意唱歌既程度可見一斑。雖然當選後未能令佢成為真正歌星，但都叫做有d知名度，所以年前亦可以在一酒吧開個小型唱歌騷，滿足下自己表演慾。今晚佢會響中環backstage開第二次個唱，今次仲夥拍同屆好姊妹，前運輸局局長廖秀冬既新抱林詩慧一齊Jam歌，詩慧仲會負責彈琴，彈奏幾首佢地作既歌添。

睇黎03年既港姐相處真係好融洽喎，好多當選同落選既都加入咗慧妍雅集，仲成日一齊gathering添，唔知D吳丹琪，葉逸怡同紀巧琴會唔會出現呢下?

林詩慧問答環節時一句：「 電子狗冇電?  叉電囉!」，

令人爆笑，非常經典

港姐向遇難港人默哀

四位港姐昨日出席璧球公開場宣傳活動，活動開始時眾嘉賓為菲律賓遇害港人默哀。作為康泰贊助的旅遊大使得主陳庭欣話，呢次係個別事件，相信康泰既旅行團係安全，但暫時亦都唔會去菲律賓。被問到有否接觸緋聞男友康泰太子爺Jason，她說：「我諗佢而家都好頭痕。」

而莊思明亦再一次澄清是因持馬來西亞護照所以未能前赴參加國姐，而李雪瑩亦係海外佳麗，所以仍未知邊個會代表香港參選。

四港姐閉目默哀，悼念遇難港人

陳庭欣否認有與Jason聯絡

張秀文因為十月要參加世姐，所以向

學校申請休學一個學期

翟威廉Chok樣奪冠

2010年香港先生於週六晚圓滿結束，賽前頂頭大熱既10號翟威廉狂掃台上頒發既四個大獎，包括2010年香港先生、魅力先生、活力先生、及粉絲關注大獎，獲獎率達百份之百，連同較早前奪得之四個豬肉獎(旅遊大使、型男活力獎、魅力才俊獎、現場最具魅力先生獎)，勇奪8個獎，打破01年楊思琦在一個選美比賽贏得最多獎項的記錄!

 8料得主10號翟威廉

雖然翟威廉已經有相當幕前演出經驗，但成晚過程仍然非常生硬作狀，不斷擺Chok樣look之餘，亦馬清儀上身不斷點頭，奪獎時亦當擺出不好意思的表情，非常惡頂。不過好彩佢個樣確係標緻，以及其他對手相當不濟，故大熱當選亦都係眾望所歸。

今年一開場自我介紹以Model Look示人，眾港生不嬲口齒伶俐既唔多，當中尤其6號講到甩甩咳咳，貫徹其作風。第二Part即刻黎泳裝，3D技術首次應用，據報道指反應不俗，商場觀眾睇到猶如現場睇咁喎。泳裝後即刻俾分，最高分五強可以揀對手作PK戰，一戰定生死! 

泳裝後首輪分數如下:
10 (263) 
8 (86) 
4 (64) 
9 (55) 
5 (42)
1 & 6 (36)
2 (19)
3 (17)
7 (3)

之後必殺技對決環節，今年各參賽者既必殺技果真無甚驚喜，難為一眾女觀眾仍然要夾硬狂呼，唔該哂。

賽果:

6 迷人犀利歌(142)  vs  10 勁舞總司令 (388) - 基本上10號企響度都應該會贏，6號仍然係keep住cool樣唱歌!

7 武術獅鼓拳 (234)  vs  8 大廚狂想曲 (246) - 最有威脅既決鬥，首先8號以批蘿蔔切生菜當Talent表演，非常趕客，而7號卻表現認真，態度誠懇，雖然泳裝得3票，但今次有234票以12票之差輸個馬鼻，雖敗猶榮啦

1 足球健身操 (210)  vs  4 泰皇旋風腿 (360) - 如果1號剝衫，應該有得揮下，踢乜鬼波呢真係

2 變臉奇俠 (186)  vs  5 浪漫舞飛翔 (383) - 其實5號既表演放響之前幾屆必殺技裡面，應該得票甚少，不過2號既變臉功未畢業，所以5號仍可以高票入圍

3 霹靂功夫舞 (330)  vs  9 雷霆棒棒堂 (260) - 今次9號真係揀錯對手，3號呢D pocket size其實會引發女性激起大量母愛激素，從而對佢投下扶弱一票架!  搞到呢對係5次對戰中惟一反敗為勝既

(大家有冇發現每組合共票數相距甚遠呢?  係電腦出問題定唔同時間有好多女仔去咗廁所呢?)

入咗5強後，一對一說服5位司儀做5樣野，幾好笑喎其實，當中最為爆笑係4號，以5'6"身高面向5'9.5"既呂慧儀，塊面對到正，哈!  

5強分數:

10 (270)

5 (101)

4 (87)

8 (67)

3 (58)

而復活戰勝出既係9號。

最後一輪為"Final Question"環節，題目為變性人應否有權結婚，當中4,9,10均表贊同，惟被盛傳斷背既5號卻大唱反調，說中國人社會不能接受云云，喂而家問你個人意見喎，拉埋我地落水先好!

最後賽果!!!

10 翟威廉 (282) 香港先生

9 葉家泓 (205)

5 白健恩 (73)

4 葉建希 (31)

係時候短評一下各參賽者表現

冠軍

翟威廉05年得亞洲先生亞軍，今次終於坐正入到TVB，

可謂完成心願。但其表現實在強差人意，chok頭

chok到離哂譜，如果唔係硬件四正真係搵鬼選佢。

我下意識TVB會捧下佢，以一洗港生無甚發展

機會既局面。

四強

9號葉家泓以18之齡得"亞軍"算係咁，佢棚牙

好靚喎，全程笑容滿面，牙膏商可以斟斟佢

5號對眼水汪汪咁，其實幾煞食，有d似

嫩版黃凱芹。不過最後問答環節講到咁，

令人有少少此地無銀，心虛feel喎

4號樣貌身型均屬上乘之選，可惜5'6"身高成晚俾

班女司儀笑，加上對答MK(而其人真係常於MK 

California Gym出現)，落選有理

其他參賽者

1號陳嘉裕講Body殺哂，但佢個樣就確係.... ，

加上表現一般，必殺技仲要揀踢波，

好難突圍

2號其實成個Package都ok，樣唔錯身型高大，

但廣東話唔靈光始終俾人覺得係"外人"，笑容又

唔自然，仲要成班後生女面前表演變臉，

鬼有興趣咩!

Pocket Size 3號黃田麒雖然好多嘉賓死話撐佢，但第一輪分數排

尾二，原來理智仍然勝於"同情心"。不過必殺技環節表

現落力，反敗為勝。始終硬件不濟，入到5強都叫

超額完成啦!

6號鄭文康堅持以愛理不理既態度參選，除咗

佢既"堅持性"令我佩服之外，冇咩想講

7號許健森一如所料包底埋單，身型身高

係幾好，但個樣冇乜觀眾緣，執極都係咁上下。

如果成晚唔洗開聲8號劉志偉應該同10號有得揮，

本來個樣幾charm幾有character，但一出聲大家即

刻醒返!  成日嘟起個咀懶sexy真係要打交叉，08年

黃文迪都係衰呢樣呀!  4強都入唔到都唔怪得人咯

最後要講講今年班女司儀同評判，搵5個司儀咁多實屬多餘，伍姑娘實在令人大失所望，冇乜"戲"之餘司儀技巧唔見能帶起個氣氛。而全場焦點非呂慧儀莫屬，超性感晚裝每邊讓半球，一出場成屋觀眾嘩一聲，不過carry得幾好喎，衰在成晚聲氣似足夜總會媽媽生，仲要出慣黎行果隻，話哂都係背住港姐身份，貴氣少少啦!

如果有香港"媽媽"生選舉，我都要報名

參加呀! (設計對白)

港生泳裝總綵排

香港先生明晚8點半舉行，TVB例牌前一日會讓記者拍攝泳裝總綵排，而tvb.com亦好快手，即刻上載d相喎。今年泳褲cutting都係一貫唔算幼邊又唔係好高叉既三角泳褲，而單數港生則穿湖水藍色，雙數穿紅色。可能要貫徹今屆3D主題，顏色有漸變效果。

左起1號陳嘉裕、2號李言功、3號黃田麒、

4號葉建希、5號白健恩

左起6號鄭文康、7號許健森、8號劉志偉、

9號葉家泓、10號翟威廉

10位港生作最後衝刺

傳媒眼中五大熱門，慘4號成個凹哂落去，

令我諗起港姐8號同9號個凹位

莊思明親證唔去國姐

尋日我地一班Pageants戰友講開張秀文會代表香港去選世界小姐 (因陳庭欣要去TVB自稱為國際性選美既中華小姐)，咁大家心諗由莊思明去選國際小姐都好，因為5'8"高響一班高頭大馬既外國佳麗入面都唔會太輸蝕，但一向把口好既唔靈醜既靈既友人Fun加咗句: 總之唔係5'3"既去得架喇，點知.........    

又俾佢再一次應驗!  尋日有其他選美粉絲留言話收到風莊思明因護照問題唔乎合參選國際小姐條件，會改派第四名兼最上鏡小姐既李雪瑩去，呢個消息令一眾fans大為緊張，咁我就膽粗粗響微博問莊思明係咪真係唔會去選，而佢亦好nice好快回覆話真係因passport問題不能參選，咁真係.....    竟然4強之中最高兩位冇機會去真正既國際性選美，實在好ridiculous!

其實而家港姐既選美準則，已經同派代表出戰國際選美既原意背道而馳，所以我建議港姐應該增加"世界小姐香港代表"及"國際小姐香港代表"兩個獎，讓真正有條件既本地佳麗參與國際盛事! 好，下年blogger choice一定要加，就咁決定!

見到莊思明親證唔去國姐，成個人down哂!

香港先生如戰在弦

仲有兩日2010年度香港先生將會誕生，10位準港生經過個多月黎既集訓，相信而家都忙於決賽夜既綵排!  本來今年港生無論質素同聲勢都平平無奇，點知近日多個男士及家庭關注團體不斷批評香港先生歧視男性，連立法會議員王國興都要出黎講下野，搞到港生連港聞版都上埋，呢D咁既宣傳真係錢都買唔到呀!  不過咁，有人鬧好過冇人理，你有你鬧佢有佢繼續選，再加3D賣肉再加大眾期待伍姑娘做司儀姣摸港生，論娛樂性今次TVB勝一籌!

不如趁呢個機會再睇下一班香港先生啦!

1號 陳嘉裕 Cristiano Chan

20  6'  167lbs

學生

已獲獎項: 至Smart型男

1號陳嘉裕雖然叫做90後 (1990年出生)，但係個樣話30幾歲都有人信，過份老積。想成為健身教練既佢身型一流，又有6呎高，論台型殺哂。成個人有d木獨feel，不過談吐越見進步，似係有下一D苦功!

入五強指數: 60%

冠軍指數: 30%

2號 李言功 Yangong Li

27  6'1"  168lbs

舞蹈員

來自黑龍江既2號李言功，基本上係完全唔識廣東話，平時問答或訪問均需以普通話作答，比07年胡志偉更甚，不過以胡志偉既成績黎講，相信語言能力並唔係左右評判俾分既主要因素。全場最高既佢有絕對優勢，樣子亦算討好，如果必殺技岩評判杯茶，都有機會跑出。

入五強指數: 60%

冠軍指數: 40%

3號 黃田麒 Nicholas Doi

24  5'6"  124lbs

服務研習導師

其實唔知點解佢入到圍，冇樣冇身材又細粒。來自馬來西亞既佢廣東話有少少accent，不過唔算太犀利，但每次出場都有野俾人笑，好似響韶關選旅遊大使時話會展似龜頭，水球戰時又被水濁親全程墮後，盡顯潺弱一面，被封為陪跑No. 1。

入五強指數: 0%

冠軍指數: 0%

4號 葉建希 Angus Ip

20  5'6"  142lbs

健身教練

2007年香港先生袁偉豪提名既Angus可算係今屆既鋒頭躉，未正式入圍已經俾傳媒狂登佢既攬女照(其實正常到無侖)，之後同班港姐去韶關拍外景又傳佢對高佢3吋既10號馬鈞怡有好感!  講樣講身材算幾唔錯架喇，不過5'6"身高就真係非常礙眼，而鋒頭亦在後期被10號翟威廉完全蓋過。到現在眾多豬肉獎都未能分一杯羮既Angus，要加把勁喇!

入五強指數: 75%

冠軍指數: 40%

5號 白健恩 Ronan Pak

29  5'8"  147lbs

表演者 (吓???)

5號白健恩一入圍就俾傳媒登咗一輯同班男仔沙灘食糕照及疑似裸照，更暗示佢斷背身份，但例牌遭佢否認。一路表現投入，笑容夠燦爛，觀眾緣不俗。而我亦有不下十數位朋友話認識佢，到時希望佢醒醒定定，祝佢好運啦!

入五強指數: 70%

冠軍指數: 30%

6號 鄭文康 Michael Cheng

21  5'8" 155lbs

學生

全程好似被逼黎選咁，唔投入又冇厘神氣講多句都嫌煩果隻，其實選黎做乜?  響溫哥華讀緊大學既Michael本來個樣冇乜事，但咁既態度真係要摑，仲有呀，佢個官blog竟然一次都冇update，hea爆程度勁過張舒雅，真係奀靚仔都勢係假!!!

入五強指數: 50% (如果d評判好superficial)

冠軍指數: 0% (如果天有眼)

7號 許健森 Sam Hui

24  5'10"  146lbs

辦公室助理

點講呢，成件事好forgettable，靚又唔係高又唔係大隻又唔係，全程接近零新聞，樣又唔算討好。不過咁喎，佢講野算係有紋有路，不過現今觀眾唔多buy呢樣，未出聲都已經叮走咗你先。雖然舊年冠軍又係7號又係姓許，不過今次阿Sam應該冇佢咁好彩。

入五強指數: 15%

冠軍指數: 0%

8號 劉志偉 Summer Lau

35  5'11.5"  159lbs

理財顧問

已獲獎項: 至Smart型男

講真8號面試時實屬標青果堆，有d似08年黃文迪果種，cool得黎幾有性格果隻。個樣係有大將之風，但原來個人唔係，講野一輪咀而且頗為市井(可能係職業病)，如果可以tone down少少應該幾有幫助!  35歲之齡黎選亦都會係佢奪冠既絆腳石!

入五強指數: 80%

冠軍指數: 35%

9號 葉家泓 Argus Ip

18  5'8.5"  150lbs

學生

已獲獎項: 傑出表現獎 (水球戰)

9號係全場最細既參賽者，但講野冇我想像中咁細路仔喎(雖則都唔係好)。個樣係好咗，青春活力加上運動細胞強，唔知可唔可以殺出一條血路呢?

入五強指數: 75%

冠軍指數: 25%

10號 翟威廉 William Chak

25  5'10"  164lbs

翻譯員

已獲獎項: 旅遊大使獎

型男活力獎 (攀石活動)

魅力才俊獎 (理財講座)

現場最具魅力香港先生 (體能比賽)

2005年選亞視既亞洲先生得亞軍，今次再戰港生TVB竟然俾佢入圍已經夠奇，入圍後仲頻頻攞獎，成首位有亞視背景而可以響TVB既選美活動奪獎既"佳麗"。當選亞生後改名翟鋒，響亞視幾年都無甚起息，盡地一舖響TVB搏多次!  擁有豐富選美經驗既佢好明顯懂得成個遊戲點樣玩，講說話不溫不火，識自我宣傳得黎又唔會太過高調，懂人情世故，絕對係大熱人選，加上硬件幾好，成個package以港姐standard真係攞得冠軍有餘。不過呢，港生既一眾女評判不嬲好難觸摸，好似舊年既印度王子郭田葰咁都係咁攞高分，所以翟生都唔好咁老定坐定粒六呀!

入五強指數: 100%

冠軍指數: 75%