2010-08-04

睇港姐猶如心臟病發

好喇,終於有時間可以寫下對今屆港姐既review!

星期日晚約六點半,我相約友台Fun生活博主兼港姐expert #1阿Fun及幾位選美戰友一齊到Fun屋企觀賞2010年香港小姐,席間我地有一位特別嘉賓08澳姐季軍Cherry咁岩過開來香港搵阿Fun,便索性一齊觀戰,實行選美人評選美。

開騷前見有D時間,我地重溫2007年既"精彩片段",當年我地響紅館尖叫既聲音,永世不忘,亦可以此DVD為證!  估唔到咁快又三年,但更估唔到既,今年我地既慘叫聲,直逼當年!!

呢一晚既情況,猶如一個有心臟病既人,幾開心咁開始一頓晚餐,突然間心臟病發,到差D要死既時候,有個醫生走出黎救醒佢!!

8點到8點半既福祿壽美麗密令,不提也罷。

8點半, 開騷!

紅館個場之前嗰晚仍然係林峰開緊騷,不足24小時要轉港姐台,可觀程度可想而知。今年用LED技術投射佈景,鍾唔鍾意就見仁見智。我就鍾意傳統舞台,夠大夠grand,但如果仍然沿用前幾年咁求其擺個冠響台就當係有舞台設計,咁投射佈景都算係一個唔差既alternative!

第一PART - 自我介紹加晚裝
佈景度門一開,一班港姐在門後靚靚擺定甫士準備出場。嘩!!!  TVB轉死性呀?  俾班佳麗放哂d頭髮落黎喎,唔係咁荀呀嘛?  一直以黎我都好怕TVB搞d懶in既頭出黎,完全糟蹋哂一班佳麗(尤其已經唔多靚嗰批),所以今次見到呢d髮型,即刻開心哂。可能見舊年D女仔出場講到窒口窒舌,今次又採用返07/08年既pre-record自我介紹,仲講下自己點解可以做冠軍。喂d女仔行得ok喎,個個都靚咗,擺甫士自然咗,臨尾仲有陣風吹起d頭髮,用得呢個效果醜唔到去邊啦真係。d衫喇喎,都係TVB一貫作風啦,唔知係咪要切合返印度既主題,d衫都係叠黎叠去叠幾層,但叠得好累聚下。撇除呢樣,呢part整體我都幾滿意。

掂:
10號 - 行出黎靚過平時好多,有台型,catwalk唔錯,有大將之風
8號 - 講樣超哂班,有自信,髮型靚
14號 - 淡定,好醒神

唔多掂:
其實呢part冇乜邊個出事,要挑剔既可能係11號,有乜理由錄定既聲帶可以逐個字"戥"出黎架呢? (佢當晚其他時間講野冇咩事)


第二PART - 娃娃裙嘉年華
第一Part都未讚完,即刻要收口。

呢d咁既娃娃裙其實冇咩,擺響兒歌頒獎典禮好靚添,放響港姐即刻出事!  大家記得楊婉儀扮美少女戰士嗎?  其恐怖程度不下於張嘉兒扮William Hung架!  要知道港姐好多佳麗都係屬於成熟大方派,要佢地扮細路女跳黎跳去,實屬不智。兒歌揀較女性化既(如小忌廉, 千年女王)好正常,但以為今晚可以唔洗見到班巨聲,點知隻耳都係要聽到,搵佢地唱兒歌仲要打埋佢地個名,驚死人唔知!  我想問下TVB本身係咪想將d佳麗打造成音樂盒上既公仔咁既效果呢?  即係音樂一出就會逐格擺pose?  好彩15個群舞時效果唔錯,睇港姐幾時都係唔少得呢樣!

掂:
冇乜邊幾個

唔多掂:
太多,1號個髮型勁師奶,3號個樣錯哂,5號想笑唔笑點做細路女,7號塊面僵硬到,9號嘥氣,11號可以扮路家敏唱"個鐘的嗒跳",12號以為fit哂點知個妝咁

第三PART - 自選Catwalk
首先想問,點樣自選?  即係有15 set甫士俾佢地揀,定係佢地自由創造鍾意點行點擺甫士都得?

今年主題係花生騷行Catwalk,少咗繁(煩)多既舞步,確係對一班選美迷一個好消息。不過TVB好鍾意畫蛇添足,行Catwalk都硬係要加d騷首弄姿,驚你嫌悶,點知越搞得多越衰。估唔到Janet Ma都勇於指出呢個問題,但乜呢三位嘉賓(加埋Benny Yeung & Grace Yu)原來每人講得一句架咋?  睇佢地個樣都唔多Happy咁喎!  話時話,我幾鍾意睇佢地5位佳麗行完匯埋一齊,個pattern幾好!

掂:
都係10號啦,應該呢個時候先播千年女王啦,成個Queen咁
8號: 單眼單得幾自然喎,d宅男實暈曬浪

唔多掂:
12號 - 行到似機械人
4號 - 一出黎嬲咗成村人咁,真係行runway咩
5號 - 都係患得患失既笑容,唔知佢想點

第四PART - 泳裝加問答
成個問答,歷時一粒鐘!

預咗呢一part福祿壽會扮野問d港姐,其實選美要咁樣做問答,即刻係要打大交叉,不過TVB係TVB,當無奈要接受下,都要分做得好定做得衰。問心嗰句,佢地今次做得唔算太cheap,係幾好笑添,但點解唔係每個佳麗都有人扮野問先?  呢個變咗係公唔公平既問題,有d佳麗遇著有福祿壽扮野,時間都預咗3/4俾佢地,得1/4時間可以答,答答下又要俾人窒住;有d呢,就可以輕輕鬆鬆答哂成條問題,暢所欲言。好戥6號林碧珍唔抵,雖則佢既speaking skill我都唔寄予厚望,但成part只能說一句: 我冇欠你架!   無言....................

掂:
9號 - 把聲同個Tone 9成似楊婉儀,答得係好得體
15號 - 說話技巧都係佢強項之一
2號 - 世界女聲氣
4號 - 講野確係成熟d,好少hmmmm, errrrrr之類
8號 - 出奇地鎮定同流利,keep住笑容燦爛

唔多掂:
1號 - 講野甩甩咳咳
5號 - 講野其實ok既,但聲氣好鬼"倔雷搥"
6號 - 講得一句

勁唔掂:
3號 - 遊魂一樣

第唔知幾PART - 歌舞加歷屆港姐
近幾年港姐,幾乎唔會請TVB藝人以外既嘉賓,今年一樣!

乘大結局餘威,先黎「情越雙白線」既主角黃浩然同徐子珊。

再黎唱咗幾日紅館都唔厭既「亞太區最受歡迎男歌手」林峰!

再請近排冇得去殯儀館所以得閒行過幾步到紅館既鄭嘉穎!

歷屆港姐出場,有久違了既羅錦如同梁小冰,仲有陳法蓉以阿姐身份叉住腰講: 一日港姐、一世港姐!  邊個夠佢威!!

成個畫面同07年致敬一樣,都係果班人,都係類似既衫,都係果紮花!

Top 8
第一期心臟病發開始!

首先,本來一直好地地既髮型,點解變咗紮起哂架?  紮都算,唔好紮到咁衰丫,5號個「達摩頭」咁都可以出鏡?  唔係路呀....   不過對比之後既驚嚇,原來呢d係濕濕碎!

第一個嗌3號出黎,我諗全香港人O咀半秒,然後慘叫!!
點解呀?  個樣包底,講野遊魂,都可以入到8強?  點講都講唔通啦!  呢個款真係講野講到好似余若薇咁都唔入得啦下嘛! (諗諗下真係其實余若薇可以選並能進身8強)!

第二個嗌4號,ok啦!

第三個嗌5號: 喂TVB唔係呀嘛,學92年咁乜都順序嗌呀?  邊刺激呀?

第四個嗌8號,但第五個嗌15號喎,以為會random宣布,點知第六個嗌13號,原來係換湯唔換藥,調轉嗌!

第七個嗌10號,跟住我即刻同其他人講,咁一定係9號喇,順住落,點知真係!

11號係可以好多野挑剔,但佢點秤都衰唔過3號同9號卦?
我地既14號,我都知唔會去得遠,但都不至於入唔到8強囉!

呢刻個心,feel到跌咗落個肚。

Top 4
好,播完廣告,TVB又例牌做d搞喊佳麗環節,播下佢地辛苦片段,問下佢地感受,在亳無比賽環節下再黎宣布4強,實屬無聊!

好,第二期心臟病發開始!

TVB好似每次宣布第一下都要嚇死你為止!

第一個嗌9號,真係想喊,唔係講笑!

第二個嗌13號,可以接受!

第三個嗌5號,哇咁即係8號同10號是但一個冇啦!

sorry係兩個都冇喎,15號入呀!

宣布賽果
到呢一刻,其實冇咩求,只希望9號唔好係冠軍(唔想再黎多個更矮既)!

先頒國際親善小姐,去到呢度,預咗係13號攞架啦!

頒最上鏡小姐時,全屋人喪嗌8號,點知曾志偉一聲: 9號!   我慘叫一聲 (後來成為全晚最慘痛一叫)

驚魂未定,又要應付宣布三甲既挑戰 (好似我選緊咁)

季軍: 5號莊思明,其實係有貼佢,不過佢最尾個妝真係好嚇人下,偏偏D人只係睇頒獎嗰刻,見到咁款,唔鬧鬼咩

亞軍: 15號張秀文,講真我真係冇預佢可以去到亞軍呢個位,不過是夜佢扁桃腺發炎得好勁,有咁既表現算係咁。

呢一刻,台上只剩9同13。

雖則照秤實係13,但Fun提我唔好咁老定,另一戰友亦晦氣地講: 實係9號架喇!  呢刻我真係對賽果冇乜信心,覺得真係五五波!

劉倩婷行出黎,希望佢係要"趷"高腳crown個新港姐!

曾志偉: 2010年香港小姐冠軍係
陳百祥: Two Thousand "廳", Miss Hong Kong "Pigeon", the winner!

13號陳庭欣!

一路開心到彈起,一路抹汗!

睇完個騷,應該用咗3000個卡路里!

冠軍: 13 陳庭欣
亞軍: 15 張秀文
季軍: 5 莊思明
最上鏡小姐: 9 李雪瑩
國際親善小姐: 13 陳庭欣

佳麗短評

冠軍 13 陳庭欣
陳庭欣表現屬中上,穩穩陣陣唔出錯嗰類,
講野係好,但聲線都係有少少尖咗D,可以
Tone down返d會更好! 笑容始終係弱項。本身都係
黑馬人選,入到冇哂大熱既四強,真係唔揀佢揀邊個。

亞軍 15 張秀文
張秀文帶病上陣,開始時還算可以,但後段
至宣布賽果時,疲態盡現,對眼dup哂,笑容
牽強,答問題無厘神氣,相信真係非常之累!
拎亞軍真係超額完成,答問題亦都show到佢witty
既一面,相信佢入娛樂圈都應該幾吃得開!
唔知點解我成晚覺得佢係漲咗既黎姿咁

季軍 5 莊思明

全晚最大敗筆莫過於佢穿旗袍時既「達摩頭」,
事後佢都忍唔住要話信錯個髮型師,認真慘情。
不斷令人感覺進步既佢決賽表現其實只屬OK,
catwalk不俗對答流利,不過笑容唔夠,俾人
惡既感覺,難怪觀眾緣認真麻麻。

最上鏡小姐 9 李雪瑩

賽前冷馬之一,決賽夜樣貌忽然升呢,講進步
佢一定係最勁,但可以去到"最上鏡"我就有d保留,
Top 8 Top 4不斷嗌佢個名更令人驚嚇。講野
真係好鬼似楊婉儀,不過身高仲要矮多一吋,
真係好難接受再多個咁既冠軍。

前八名

3 張藝婷

全晚令人最R頭既佳麗,樣貌急才皆欠奉都可以
殺入八強,全港嘩然!

4 文凱玲
呢晚文凱玲冇俾TVB整得"再衰d"已經還得神落,
入八強尚算合理。原來評判張家輝戥佢拎
唔到冠軍唔抵喎,算啦真係。

8 彭慧中
如果你想知咩叫好上加好,彭慧中絕對係人辦。
平時個樣已經係好,決賽夜成個look可以再好d,
問你死未!  每次出場個樣都係最佳狀態,而且表情
豐富,唔係死擺住一個樣,活力十足。對答亦
出奇地淡定,有自信。最上鏡小姐本應十拿九穩,宣布
時叫咗佢隔離出黎應該搞到全港一地都係眼鏡碎。惟一
挑剔既係身高,不過既然同屬5'3"既9號都入到4強,
佢有乜理由唔入先?

10 馬鈞怡

馬鈞怡同彭慧中一樣,係今屆輸得最慘情既佳麗。
有樣貌有身高有前有後有學歷有catwalk有啖吐,都只係
可以八強止步兼零獎,天理何在?  佢自選catwalk件衫,
真係唔係非一般人可以carry到,但佢就演繹得好好!
top 8時喊住都可以講d咁感性又大方但唔作狀既
肺府之言,一d都唔容易架! 決賽一路做時好多朋友
一路SMS我話10號得,其實選咗佢,今屆既反響會
唔會細好多?

其他佳麗

1 黃安琪
成件事都好Forgettable,個樣好悶唔在講,
估唔到答問題都好一般,四平八穩得黎
好反面教材feel!

2 張莉莎

講真佢係ok喎,樣貌上鏡,對鏡頭敏感自然,
行Catwalk唔錯。不過as a 香港小姐就真係
好難令人受落。

6 林碧珍
同1號一樣,都係過目即忘佳麗,我懷疑
佢係15個裡面最低分。

7 何樂翩

每次見佢出場都以為郭可盈選緊,好多選美experts都
唔多buy佢但我真係覺得佢個樣幾decent喎。冇錯佢係
過瘦,而且面部表情頗僵硬,死顧住1號樣,2號pose咁!
講野ok,但成晚冇果種港姐神采,注定落選。

11 李文煊

其實我覺佢個樣可以係好靚,但偏偏TVB硬係要搞到佢塊
面又圓又多油。講真計當晚齋樣佢未必入到五甲添呀,又
一慘遭糟蹋既佳麗。佢既廣東話接近91李似白Level,真係
好難叫人選佢,但亦不至於入唔到8強卦?

12 湯寶珍

個妝非常出事,係咪俾人整古先? 老咗10年!
一出場都知應該同最上鏡小姐呢個獎bye bye!
講野堅持keep住annoying聲氣,冇得救!

14 李俍嬿
我勁like呢張相,靚啦! 一出場見佢個樣神采
飛揚,問答環節又尚算流暢,以為佢有d機,點知
8強都冇,好失望呀!
(補充: Fun話呢張相靚到好似D環姐semi-finalist添)


後記
心水清既網友們,有冇覺得是次賽果同某一屆特別相似?

估中喇,係2006年!

1) 三甲依次序均為 13、15、5  Win & Place都中哂!
2) 冠軍都係姓陳 (2006年陳茵媺)
3) 季軍都係當屆三甲裡最高 (2006年呂慧儀 5'9.5")
4) 兩屆頂頭大熱但都倒灶既都係8號 (當年為徐淑敏),兩個都叫咪神!

有d野就係咁岩得咁橋!



12 則留言:

A.T. 提到...

仲有2年嘅國際親善都好似係13號miss chan攞啊~
btw,個化妝真係好唔得, 好多人都搞到好多面油, 11號跌watt跌得最勁...
仲有..上年個winner劉倩婷都係..加"免"果時真係...唔知係唔係咁樣先可以襯到今年嘅3甲靚D呢?

robocon 提到...

睇完你篇報導我最欣賞張秀文,帶病上陣表現依然出色, 雖然尾段我都好奇怪為何她好似就快想訓著咁.
同埋我估不到佢講野真係咁decent,以談吐黎講我講得佢講野態度語氣最真誠.

我仲有野未講架,遲些再續.

匿名 提到...

3號可以話係豬扒囉...8強..唉...
俾11/14/7都好呀...
7真係衰在太硬...但真係幾靚~
今年明明QUALI高..但揀D最差GE~

longy 提到...

thanks TT for the WONDERFUL review! im reading it while im having my breakfast right now and im LOVING it!

i wonder if #9 got #11 or #12's make up would she begged the miss photogenic award? too bad i really liked elle and ria but their make up was omg.. esp ria.

8 should have been the winner. tiny or not, i dont care anymore.

adafan 提到...

我真的希望你們提港姐時不要用豬扒、樣衰來話她們!
陳庭欣本身不錯,只是當晚拿冠軍的造型不太靚,但不至於你們這樣話她!
有少許品德的,好不好!
ps:原來以前有個女童星也是叫陳婷欣,不過寫法不同!

匿名 提到...

Agree with Longy. #8 should have won. Totally disagree with the results. Just seems like TVB always choose the ugly ones.

匿名 提到...

好攪笑..TT話5號PARTPART表演同個樣都唔掂..但最後又話有貼佢..
ANYWAY,THANK YOU FOR YOUR SHARING.
我覺得8號當表現真係好好..10都唔錯..
相信同張嘉兒那屆一樣..之前會見評判時...表現較好的佳麗.即使決賽表現一般.亦可獲勝. (因為張嘉兒當晚的分紙也被發現分數一般)﹐希望TVB可公開賽前INTERVIEW的片段,或增加決賽晚分數的比重,以示公平。
若以決賽晚各佳麗的表現..真係很難服眾。

robocon 提到...

有些佳麗我想特別提吓:

兩個亞珍: 其實佢地外型唔差, 尤其林碧珍笑容燦爛, 放在去年分分鐘成為熱門添 .但加埋談吐語氣,扣晒分.

何樂翩: 賽前我都有少少看好佢,但決賽夜真的完全唔掂. 佢真的太瘦, 十分病態, 台步更有點寒背. 我俾佢最低分.

李俍嬿: 很有神彩,有自信,但樣貌真的不太大路, 非戰之罪啦.

張藝婷: 唔得啦,個look成個男人咁, 佢入圍已經好牽強, 仲入埋八強喎.

彭慧中: 好sweet,sweet到令我忘記她只得五呎三.

馬均怡: 有大將之風,唯獨身材有點不合比例囉.

李文煊: tvb糟塌了一位高質素佳麗, 睇番佢面試那個 "的骰子淇" 白衣look仲要比決賽夜清秀得多.

總括來說,今年賽果算可以接受,唯獨最上鏡小姐真的很難服眾.

dty 提到...

TVB choreographer: please stop those stupid hand dances that you make the girls do. It's so silly and undignified. Concentrate on their catwalk skills instead.

#13: I'm not seeing the pretty in her yet.

Eric Tsang: As long as he's the host, the interview part will forever be stuck at cheap humor. Although I must say that many of the girls don't have the quick wit and intelligence to come up with satisfying answers.

adafan: other people don't tell you what to say or think, so please stop telling others what to say or think. And Edelweiss Cheung is still a spoiled princess.

TT 提到...

@A.T: 係喎, 國親都係冠軍兼得! d化粧真係唔應該用哂一種方法去他哂所有佳麗囉

@robocoon: 我都記得你話like #6, 開始時我叫佢做揮手蔡潔雯, 笑容講真好過#13! 8號真係好到要暫時忘記佢係5'3"呀, 不過一同其他佳麗排埋一齊, 又令我紮醒! 講真佢冠軍應該冇, 但三甲我接受架!

@longy: so u were eating mcDonald's?
hhahaha

@adafan: 呢度幾時有人話13係豬扒? 查實我地都算有嗰句講嗰句, 不如你去高登或香港討論區睇下, 你再響果邊幫手撐下港姐!

@棠: 我其實意思係未開騷前有貼佢入五名, 但真係冇諗佢可以去到季軍 (以當晚表現), 雖則我之前對佢感覺幾正面!

@dty: WELL-SAID!!!!!!

robocon 提到...

sorry 容許我多口, 又要搭吓訕.

adafan:
其實你真的要明白大家在網絡上真的有那句講那句, 對被批評的佳麗真的完全沒有惡意的.

可能你覺得 "唔arm睇" 或動氣, 但你是需要接受的,不能限制人地講什麼. 畢竟這個blog不是屬於你.

其實比起刻簿的傳媒,我地呢d網友的留言算得係乜? 而我相信選美佳麗們大部分都有接受 不同的意見的胸襟,俗些講句,佢地都 "預左".

咁唔通若我有天親身見到張舒雅,我會好直接同佢講: "嘩,你好hea丫,你點做港姐架?"咁樣咩..大家咁大個人,什麼場合什麼時候 應有什麼的禮儀, 點會唔識喎.

講左咁多, 希望你明白啦.

盧健揚 提到...

金瓶梅免費視訊
線上視訊
情人視訊
線上視訊怎麼用
線上視訊
后宮視訊聊天
愛戀視訊
完美女人視訊
玩美女人視訊
完美女人視訊網站
視訊美女173
0204視訊美女
視訊盒是什麼
國外視訊
台灣視訊
大中華視訊
免費視訊173liveshow
9158虛擬視訊
9158視頻社區
線上視訊要錢嗎
live173視訊
live173視訊聊天
live173視訊生活秀
live173影音
live173視訊影音生活秀
ShowLive影音聊天網
阿根廷超模內衣寫真
中國乳神胸夾手機
內衣模特視頻
中國內衣模特
內衣秀吧
內衣秀視頻下載
台灣辣妹視訊
A383成人影音
A383成人
A383電影
s383live影音秀
完美女人影音網
住173影音生活秀
173影音生活秀
live173影音生活秀
hilive
showlive
173直播
ING視訊
173視訊
173
173影音
173影音視訊
173影音視訊直播
meme104視訊